ވޯޓުލުމުގެ ހައްގު ލިބިގެންވާ މީހުންގެ ލިސްޓު އާއްމު ކޮށް ޝަކުވާ ހުށަހެޅުމަށް ހުޅުވާލެވުނު ފުރުސަތުގައި، ލިސްޓުގައި ހުރި މީހުންގެ ތެރެއިން 465 މީހުން، ނިޔާވެފައިވާ ކަމަށް ޝަކުވާ ލިބުނު ކަމަށާ، އެހެން ނަމަވެސް، އޭގެ ތެރެއިން ކަށަވަރު ކުރެވުނީ 267 މީހުން ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަން (އީސީ) އިން ސިޔާސީ ޕާޓީތަކާ އެކު މިއަދު ބޭއްވި ގައުމީ ލަފާ ދޭ ކޮމިޓީގެ ބައްދަލުވުމުގައި އެ ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވީ، ވޯޓާސް ލިސްޓާއި ގުޅިގެން ޝަކުވާ ހުށަހެޅުމަށް ހުޅުވާލި ފުރުސަތުގައި ޖުމުލަ 551 ޝަކުވާ ލިބިފައިވާ ކަމަށެވެ. އެގޮތުން ލިބުނު ޝަކުވާ ތަކުގެ ތެރޭގައި؛
1) ނިޔާވެފައިވާ 465 މީހުން ލިސްޓުގައި ހިމެނުން
2) އެޑްރެސް ބަދަލުވެގެން 58 ޝަކުވާ
3) ނަން ބަދަލު ވެގެން 5 ޝަކުވާ
4) ލިސްޓުގައި ނަން ނެތީގެން 20 މީހުންގެ ޝަކުވާ
5) އައިޑީކާޑް ނަންބަރު ބަދަލުވެގެން 1 ޝަކުވާ
6) ދާއިރާ ބަދަލުވެގެން 3 މީހުންގެ ޝަކުވާ
މި ޝަކުވާތައް ހުށަހެޅި ފަރާތްތަކަށް މިހާރު ޖަވާބުދެވުފައިވާނެ ކަމަށާ، އެއާއި ގުޅިގެން އައި ބަދަލުތައް އިއްޔެ ގެޒެޓު ކޮށް, މިމަހު 16 އާއި ހަމައަށް އަލުން ޝަކުވާ ހުށަހެޅުމުގެ ފުރުސަތު އެ ފަރާތްތަކަށް ހުޅުވާލާފައިވާ ކަމަށްވެސް ހަބީބު ވިދާޅުވި އެވެ.
މިއާއެކު ހަބީބު ވިދާޅުވީ، ވޯޓާސް ލިސްޓާއި ގުޅިގެން އަންނަ ޝަކުވާ އާއި ގުޅިގެން މައުލޫމާތު ތައް ބަދަލު ކުރެވެނީ ޑީއެންއާރު އާއި ކަމަށެވެ. އެހެނީ، ގާނޫނުގައިވާ ގޮތުން އެފަދަ ކަންކަމުގައި މަސްދަރެއްގެ ގޮތުގައި ބެލުމަށް ކަނޑައަޅާފައިވާ އިދާރާ އަކީ އެއީ ކަމަށް އޭނާ ވިދާޅުވި އެވެ.
"ޑީއެންއާރުގެ ރެޖިސްޓްރީ އަށް ބަލާފައި، ނިޔާވި މީހުންގެ ތެރެއިން ކުރީގައި އަޅުގަނޑު މިދެންނެވި، 465 މީހުން. އެކަމަކު ޑީއެންއާރުން އަޅުގަނޑުމެން ޗެކު ކޮށްލާއިރު ނިޔާވެފައި ތިބި މީހުންގެ އަދަދަކަށް މިވަނީ 267 މީހުން. އެޑްރެސް ބަދަލުވެގެން އައި މީހުންނަށް މައްސަލަ އެއް ނެތް. 58 މީހުން. ނަން ބަދަލު ވެގެން 5 މީހުން، ލިސްޓުގައި ނަން ނެތީގެން 20 މީހުން ހުށަހަޅާފައި އޮތް އިރު, އަސްލު ޝަކުވާ އަކަށް މިވަނީ ހަމަ އެކަކު. އައިޑީކާޑް ނަންބަރު ބަދަލުވެގެން އެކަކު. ދާއިރާ ބަދަލުވެގެން 3 މީހަކު."
އިލެކްޝަން ކޮމިޝަންގެ ނައިބް ރައީސް އިސްމާއިލް ހަބީބު
ހަބީބު ވަނީ، ޝަކުވާއަށް ޝަކުވާ ހުށަހަޅަން ހުޅުވާލާފައިވާ ފުރުސަތުގައި ސިޔާސީ ޕާޓީ ތަކުން ވެސް ލިސްޓު ޗެކުކުރުމަށް އެދިލައްވާފައެވެ. އަދި ވޯޓާސް ލިސްޓުގެ ސައްހަ ކަމާއި މެދު ސުވާލު އުފެއްދުމުގެ އެއްވެސް ޖާގައެއް ނޯންނާނެ ކަމަށާ، އެ ލިސްޓު ހުންނާނީ މިހާރުވެސް އެންމެނަށް ފެންނަށް ކަމަށް އޭނާ ވިދާޅުވި އެވެ.
2023 ސެޕްޓެމްބަރ 9 އަށް 18 އަހަރު ފުރޭ، 138317 އަންހެނުންނާއި، 144355 ފިރިހެންނާއެކު ޖުމްލަ 282672 މީހުންނަށް ވޯޓުދިނުމުގެ ޙައްޤު ލިބިފައިވާ ކަމަށް އިލެކްޝަންސް ކޮމިޝަނުން އެންމެ ފަހުން ނެރުނު ލިސްޓުގައި ވެއެވެ.
Advertisement
This content is created and paid for by advertisers and does not involve Voice Journalists
