ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ވާދަވެރި ސިޔާސީ ލީޑަރު ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް 9 ޖުލައި ވާ އާދިއްތަ ދުވަހަށް ކްރިމިނަލް ކޯޓުގައި ތާވަލުކޮށްފި އެވެ.
އެ މައްސަލައިގެ އަޑުއެހުންތައް ގާތް ގާތުގައި ތާވަލުކުރި ނަމަވެސް ނިމުނު ހަފްތާގައި ތާވަލުކުރި 3 އަޑުއެހުން ވެސް ވަނީ ކެންސަލްކޮށްފަ އެވެ.
އެ އަޑުއެހުންތައް ކެންސަލްކޮށްފައިވާ ފުއްގިރި މުއާމަލާތާއި ގުޅިގެން ދައުލަތުން ދައުވާ އުފުލާފައިވާ އަހުމަދު ކުރިކް ރިޒާ އާލާސްކަންފުޅާ އުުއްވާތީ ކޯޓަށް ހާޒިރު ނުވެވުމާއި ގުޅިގެން ނެެވެ.
މިހާރު އެ މައްސަލައިގައި ކުރިއަށް ދަނީ ދައުލަތުގެ ފަރާތުން ހުށައަޅާފައިވާ ހެކިންގެ ހެކިބަސް ނެގުމުގެ މަރުހަލާއެވެ.
އެގޮތުން އެ މައްސަލައިގައި އަހުމަދު އަދީބާއި އަބްދުﷲ ޒިޔަތު ހިމެނޭހެން ހަ ފަރާތެއްގެ ހެކިބަސް ވަނީ ނަގާފައެވެ. އަދި ވެސް ދައުލަތުން ހުށައަޅާފައިވާ ހެކިވެރިންގެ ހެކިބަސް ނަގާ ނުނިމެއެވެ.
ފުއްގިރި މުއާމަލާތާއި ގުޅިގެން ރައީސް ޔާމިނުގެ މައްޗަށް ދެ ދައުވާއެއް ވަނީ އުފުލާފައެވެ. އެއީ ރިޝްވަތު ޤަބޫލުކުރިކަމުގެ ކުށުގެ ދައުވާއާއި މަނީލޯންޑާކުރި ކަމުގެ ކުށުގެ ދައުވާއެވެ.
ރައީސް ޔާމިނު ވަނީ އެ ދެ ދައުވާއަށްވެސް އިންކާރު ކުރައްވާފަ އެވެ. އަދި ވިދާޅުވެފައިވަނީ އެއީ އެމަނިކުފާނުގެ އަދާވާތްތެރިން ހެކިންނަށް ބޭނުންކޮށްގެން އެމަނިކުފާނާއި ދެކޮޅަށް އުފައްދާފައިވާ ދައުވާތަކެއް ކަމަށެވެ.
ރައީސް ޔާމިނުގެ ފަރާތްޕުޅުން ވަނީ އަދީބާއި ޒިޔަތުގެ ހެކިބަސް ބަލައިނުގަތުމަށް ވެސް އެދިވަޑައިގެންފަ އެވެ.
އެހެން ނަމަވެސް އެ ދެމީހުންގެ ހެކިބަސް ނޫން އިތުރު އެއްވެސް ކާފީ ހެއްކެއް މި މައްސަލައިގައި ނެތްކަމަށް ދައުލަތުން ބުނުމާއި ގުޅިގެން ޝަރީއަތުން ވަނީ އަދީބާއި ޒިޔަތުގެ ހެކިބަސް ބަލައިގަތުމަށް ނިންމާފައެވެ.
އެހެން ނަމަވެސް ހުކުމް ކުރާއިރު އެ ހެކިންނަށް ބުރަދަން ދޭނެތޯ ނުދޭނެތޯ ގާޒީ ފަހުގެ މަރުހަލާއެއްގައި ނިންމަވާނެކަމަށް ވަނީ ވިދާޅުވެފަ އެވެ.
ފުއްގިރި މައްސަލައިގެ އަޑުއެހުން އާދިއްތަ ދުވަހަށް ތާވަލުކޮށްފައިވާއިރު، އާރަށު މައްސަލައާއި ގުޅިގެން އެމަނިކުފާނުގެ މައްޗަށް ކުރި 11 އަހަރުގެ ޖަލުހުކުމް މިހާރު ވަނީ ހައިކޯޓުގައި އިސްތިއުނާފުކޮށްފަ އެވެ.
އޭގެ އަޑުއެހުންތައް މިހާރު ކުރިއަށްދާއިރު، ރައީސް ޔާމިނުގެ ފަރާތްޕުޅުން އިސްތިއުނާފީ ނުކުތާތައް ހުށައަޅާ ދައުލަތުން ވަނީ އެ ނުކުތާތަކަށް ޖަވާބުވެސް ދީފައެވެ.
އާރަށު އިސްތިއުނާފުގެ މައްސަލަ އަވަސްކޮށްދިނުމަށް ރައީސް ޔާމިނުގެ ފަރާތްޕުޅުން ދަނީ ކެނޑިނޭޅި އެދިވަޑައިގަންނަވަމުންނެވެ.
މިހާރު ވެސް އެމަނިކުފާނު ގެންދަވަނީ އާރަށު މައްސަލައިގައި ދަށު ކޯޓުން ކުރި ޖަލު ހުކުމެއް ތަންފީޒުކުރައްވަމުން ކަމަށްވާއިރު، އިސްތިއުނާފު މައްސަލަ އަވަސް ކުރުމަކީ އެމަނިކުފާނަށް އިންސާފު ހޯދުމަށް މުހިންމުކަމެއްކަމަށް ޤާނޫނީ ވަކީލުން ވެސް ފާހަގަކުރައްވައެވެ.
އެހެން ނަމަވެސް އެ މައްސަލައިގެ އަޑުއެހުމެއް ދެން ބާއްވާނެ ތާރީހެއް އަދި ހައިކޯޓުން ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
