ރައްޔިތުންގެ މަޖިލިހުގެ ދައުރުން ބޭރު އިތުރު ޖަލްސާއެއް އަންނަ ހޯމަ ދުވަހަށް ތާވަލްކޮށްފިއެވެ.

މަޖިލީހުގެ ދާއިމީ ކޮމިޓީތައް އެކުލަވާލުމުގެ މަސައްކަތާއި އެހެނިހެން ވެސް މުހިންމު މަސައްކަތްތައް ނުނިމު ހުރުމުން އެ މަސައްކަތް ނިމެންދެން ދައުރު ދަންމާލަން އެމްޑީޕީން އެދިފައި ވަނިކޮށް މަޖިލީހުގެ ރައީސް މުހައްމަދު ނަޝީދު ވަނީ ދައުރު ނިންމަވާލައްވާފައެވެ. 

އެއާއެކު އެމްޑީޕީގެ 29 މެންބަރުން ސޮއި ކުރައްވައި، ދައުރުން ބޭރުގައި ޕާޓީގެ ޖަލްސާއެއް ބޭއްވުމަށް މަޖިލީހަށް ވަނީ ހުށަހަޅުއްވާފައެވެ. އެ އެދުމާއި އެއްގޮތަށް، 3 ޖުލައި 2023 ވީ އާދިއްތަ ދުވަހު ވަނީ ދައުރުން ބޭރު ޖަލްސާއެއް ބާއްވާފައެވެ.

Advertisement

އެ ދުވަހުގެ ޖަލްސާގެ އެޖެންޑާގައި އޮތީ، ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި، ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ގެނެވޭ ބަދަލާގުޅޭ މައްސަލަ އަށް ބަހުސް ކުރުމެވެ.

އެހެންނަމަވެސް, މަޖިލީހުގެ ޖަލްސާ ފަށްޓަވަމުން ރިޔާސަތުގައި އިންނެވި ވިލިފުށި ދާއިރާގެ މެންބަރު ހަސަން އަފީފު ވިދާޅުވީ، ވެރިކަންކުރާ މައި ޕާޓީ، އަދި މަޖިލީހުގެ މެޖޯރިޓީ ޕާޓީ، އެމްޑީޕީގެ ކުރީގެ ރައީސް، އަދި މަޖިލީހުގެ ރައީސް މުހައްމަދު ނަޝީދު އާއި އެޕާޓީގެ އެހެން މެންބަރެއް ޕާޓީން ވަކިވެވަޑައިގެންނެވުމާއި ގުޅިގެން މަޖިލީހުގެ އެމްޑީޕީ މެންބަރުންގެ ނިސްބަތަށް ބަދަލު އައިސްފައިވާ ކަމަށެވެ.

އެހެންކަމުން، މެންބަރުން ހިމެނޭނެ ގޮތާއި ގުޅިގެން ކުރިން އެކުލަވައިލެވުނު ރިޕޯޓަށް މިވަގުތު އަމަލު ކުރެވެން ނެތް ކަމަށާ، އަލުން އެ ރިޕޯޓް އެކުލަވައިލަންޖެހޭ ކަމަށްވެސް އަފީފު ވިދާޅުވި އެވެ. ވުމާއެކު އެދުވަހުގެ ޖަލްސާ ކުރިއަށް ގެންދެވެން ނެތް ކަމަށް ވިދާޅުވެ އޭނާ ވަނީ ޖަލްސާ ނިންމަވާލައްވާފައެވެ.