ހަނިމާދޫ ޓޫރިޒަމް ޒޯނުގައިހުރި ބައެއްބިންތަށް ޓޫރިޒަމް ވިޔަފާރިއަށް ކުއްޔަށް ދޫކުރުމަށް ހުޅުވާލައިފިއެވެ. 

ހަނިމާދޫ ކައުންސިލުން ކުރި އިއުލާނެއްގައި ބުނީ، ޓުރިޒަމް ޒޯނުން ދޫކުރަން ހަމަ ޖެހިފައިވަނީ 10،000 (ދިހަހާސް އަކަފޫޓު) 4 ބިމާއި 5000 (ފަސްހާސް އަކަފޫޓު) 8 ބިން ކަމަށެވެ. 

އެގޮތުން 10,000 އަކަފޫޓުގެ ބިން ކުއްޔަށް ދޫކުރަން ހަމަޖެހިފައިވަނީ 40 އަހަރު ދުވަހުގެ މުއްދަތަށް ކަމަށާއި، އަދި 5000 އަކަފޫޓުގެ ބިން ކުއްޔަށް ދޫކުރަން ހަމަޖެހިފައިވަނީ 30 އަހަރު ދުވަހުގެ މުއްދަތަށް ކަމަށެވެ.

މިއާއެކު އެ ކައުންސިލުން ބުނީ، ދިހަ ހާސް އަކަފޫޓުގެ ބިންތަކުގެ މަޢުލޫމާތު ސާފުކުރުން އޮންނާނީ 20 ޖުލައި 2023 ވާ ބުރާސްފަތި ދުވަހުގެ 10:30 ގައި ހަނިމާދޫ ކައުންސިލް އިދާރާގައި ކަމަށެވެ. އަދި މިބިންތަކުގެ ބިޑު ހުޅުވުން އޮންނާނީ 03 އޯގަސްޓް 2023 ވާ ބުރާސްފަތި ދުވަހުގެ 10:30 ގައި ކައުންސިލް އިދާރާގެ މީޓިންގ ރޫމުގައި ކަމަށެވެ. 

މީގެ އިތުރުން، ފަސްހާސް އަކަފޫޓުގެ ބިންތަކުގެ މައުލޫމާތު ސާފު ކުރުން އޮންނާނީ 24 ޖުލައި 2023 ވާ ހޯމަ ދުވަހުގެ 10:30 ގައި އެ ރަށު ކައުންސިލް އިދާރާގައި ކަމަށާ، މިބިންތަކުގެ ބިޑު ހުޅުވުން އޮންނާނީ 06 އޯގަސްޓް 2023 ވާ އާއްދީއްތަ ދުވަހުގެ 10:30 ގައި ކައުންސިލް އިދާރާގެ މީޓިންގ ރޫމުގައި ކަމަށްވެސް އިއުލާންގައި ބުނެފައިވެ އެވެ.

ހަނިމާދޫ ކައުންސިލުން ބުނީ، މަޢުލޫމާތު ސާފުކުރުމަށް ނާންނަ ފަރާތްތަކުގެ ބިޑުތަކާއި، ކަނޑައެޅިފައިވާ ގަޑީގެ ފަހުން ގެންނަ ބިޑުތައް ހުށަހެޅުމުގެ ފުރުޞަތެއް ނުދެވޭނެ ކަމަށެވެ.