ކޮމަންޑޫ ރައްޔިތުން އެދޭގޮތަށް އެ ރަށް ކައިރީގައި އޮންނަ ކުޑަފަރުގައި އެއާޕޯޓު އަޅުއްވައިދެއްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވައުވެވަޑައިގެންފި އެވެ.
ރައީސް ޞާލިހު މިފަދައިން ވިދާޅުވެފައިވަނީ އެމަނިކުފާނު ށ އަތޮޅަށް ކުރައްވާ ކެމްޕޭނު ދަތުރުފުޅުގައި ކޮމަންޑޫއަށް ވަޑައިގެން އެ ރަށުގެ ރައްޔިތުންނާއި މުޚާތަބުކޮށް ވާހަކަދައްކަވަމުން ނެވެ.
ރައީސް ޞާލިހު ވިދާޅުވީ 20 މިނެޓުން އެއާޕޯޓަކާއި ހަމަޔާ ނުދެވޭ އެއްވެސް ރަށެއް ނުބޭއްވުމަށް، 2018 ވަނަ އަހަރު އެމަނިކުފާނު ވައުދުވެވަޑައިގެންފައި ވާނެ ކަމަށެވެ. އަދި އެ ވައުދު ފުއްދުމަށްޓަކައި ގިނަ މަސައްކަތްޕުޅުތަކެއް ވެސް ކުރައްވާފައި ވާނެ ކަމަށެވެ.
އެހެން ނަމަވެސް ކޮަމަންޑޫ އަކީ އަދި އެ ފަސޭހަ ލިބިގެން ގޮސްފައިވާ ރަށެއް ނޫން ކަމަށާއި، ކުރިއަށް އޮތް ފަސް އަހަރު ދުވަހުގެ ތެރޭގައި އެކަމަށް ޙައްލު ހޯއްދަވާދެއްވާނެކަމަށް ރައީސް ޞާލިހު ވިދާޅުވި އެވެ.
އެގޮތުން ރައްޔިތުން މިހާރުވެސް އެދެމުންދާގޮތަށް ކުޑަފަރުގައި އެއާޕޯޓު އަޅުއްވާދެއްވާނެކަމުގެ ޔަގީންކަން ރައީސް ޞާލިހު ވަނީ ދެއްވާފަ އެވެ.
"އިރާދަކުރެއްވިއްޔާ އަޅުގަނޑުމެން ކުރިއަށް އޮތް 5 އަހަރު ދުވަހުގެ ތެރޭގައި މި ކޮމްނަޑޫ ކައިރީގައި އޮތް ކުޑަފަރުގައި ތިބޭފުޅުން އެ ވިދާޅުވާ ގޮތަކަށް އަޅުގަނޑުމެން އެއާޕޯޓެއް އަޅާނަން"
ރައީސް ޞާލިހު
ކޮމަންޑޫ އިން އެމަނިކުފާނުގެ ރިޔާސީ ކެމްޕޭނު ފެއްޓެވި ސަބަބަށް ވެސް ރައީސް ޞާލިހުގެ ވާހަކަފުޅުގައި ވަނީ އަލިއަޅުވާލައްވާފަ އެވެ.
ރައީސް ޞާލިހު ވިދާޅުވީ ކޮމަންޑޫ އަކީ ކެމްޕޭނަށް ފަރިތަ ރަށެއް ކަމަށެވެ. އަދި އިންތިޚާބުތައް ކާމިޔާބުކުރާ ރަށެއްކަމަށެވެ.
ރަށަށް އެންމެ ބޮޑަށް ބޭނުންޖެހިފައިވާ ބޯހިޔާވަހިކަމުގެ މައްސަލަ ޙައްލުކުރުމަށް ދެ ކޮމަންޑޫ ގުޅާލާ މަތިކޮމަންޑޫއިން 300 ހައުސިން ޔުނިޓު ކުރިއަށް އޮތް 5 އަހަރު ތެރޭ އަޅުއްވާދެއްވާނެ ކަމަށް ރައީސް ޞާލިހު ވަނީ ވައުދުވެވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
