ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ށ އަތޮޅަށް ކުރައްވާ އެމަނިކުފާނުގެ ރިޔާސީ ކެމްޕޭނު ދަތުރުފުޅުގައި ދެވަނަ މަންޒިލަކަށް ށ އަތޮޅު މަރޮއްޓަށް ވަޑައިގެންފި އެވެ.
ރައީސް ޞާލިހު ށ އަތޮޅަށް ކުރައްވާ ދަތުރުފުޅުގައި އެންމެ ފުރަތަމަ ވަޑައިގެންނެވީ އެ އަތޮޅު ކޮމަންޑޫއަށެވެ. އެ ރަށުގައި އެމަނިކުފާނު ވަނީ ރިޔާސީ ކެމްޕޭނު ރަސްމީކޮށް ފައްޓަވާފައެވެ. އަދި ކޮމަންޑޫގއި ކެމްޕޭނު ޖަލްސާއެއްވެސް ކުރިއަށް ގެންދެވިއެވެ.
އެފަހުން އެމަނިކުފާނު ވަނީ މަރޮއްޓަށް ވަޑައިގެންފަ އެވެ. މިއީ މި ދަތުރުފުޅުގެ ދެވަނަ މަންޒިލެވެ.
ރައީސް ޞާލިހު މަރޮއްޓަށް ވަޑައިގަތުމުން އެ ރަށުން ވަނީ އެމަނިކުފާނަށް ވަރަށް ހޫނު މަރުހަބާއެއް ދަންނަވާފަ އެވެ. އެގޮތުން އެމަނިކުފާނުގެ އިސްތިއގުބާލުގައި ގިނަ އަދަދެއްގެ ބަޔަކު ތިބިތަން ފެނިގެން ދިޔައެވެ.
ރައީސް ޞާލިހުގެ މި ދަތުރުފުޅުތަކުގައި ރައްޔިތުންނާއި ބައްދަލުކުރައްވާ، ރައްޔިތުން ބޭނުންވާ ކަންކަން ދެނެގަތުމަށް މަޝްވަރާ ބައްދަލުވުންތަކާއި، ޖަގަހަ ބައްދަލުވުންތައް ކުރިއަށް ގެންދިއުމަށް ވަނީ ނިންމަވާފައެވެ.
ކުރިއަށް އޮތް ރިޔާސީ އިންތިޚާބަށް އެމަނިކުފާނުގެ މެނިފެސްޓޯ އެކުލަވާލުމުގެ މަސައްކަތް ކުރަމުންދާއިރު، ރަށްތަކަށް ކުރައްވާ ދަތުރުފުޅުތަކުގެ ތެރެއިން ޙާލަތު ވަޒަންކުރުމާއި ރައްޔިތުންނަށް އެންމެ ބޭނުން ޖެހިފައިވާ ކަންކަން ބަލައި ދެނެގަތުމުގެ މަސައްކަތްތައް ވެސް ކުރިއަށް ގެންދިއުމަށް ވަނީ ނިންމާފަ އެވެ.
އޭގެ އިތުރުން ކުރިއަށް އޮތް 5 އަހަރު ވެރިކަން ލިބިއްޖެނަމަ ކުރުމަށް ނިންމާފައިވާ ބައެއް ކަންކަމާއި، އެމަނިކުފާނުގެ ރިޔާސީ ވައުދުފުޅުތައްވެސް ކޮންމެސް ވަރަކަށް މި ދަތުރުފުޅުތަކުގައި ބާއްވާ ޖަލްސާތަކުގެ ތެރެއިން އިއުލާނު ކުރާނެ އެވެ.
ށ އަތޮޅަށް ރައީސް ކުރައްވާ މި ދަތުރުފުޅުގައި ށ. ފޯކައިދޫގެ ފެނާއި ނަރުދަމާގެ ނިޒާމުގެ އިފްތިތާހު ކުރައްވާ ބަނދަރު ހުޅުވައިދެއްވުމުގެ އިތުރުން ފޯކައިދޫ ފުޓުބޯޅަ ދަނޑު ހުޅުވައިދެއްވުން ވެސް ހިމެނެއެވެ.
ރައީސްގެ ދަތުރުފުޅު ހަމަޖެހިފައިވާ ގޮތަށް ބަލާއިރު، މަރޮށިން ދެން އެމަނިކުފާނު ވަޑައިގަންނަވާނީ އެ އަތޮޅުގެ ނޫމަރާއަށެވެ.
Advertisement
This content is created and paid for by advertisers and does not involve Voice Journalists
