ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ށ އަތޮޅަށް ކުރައްވާ އެމަނިކުފާނުގެ ރިޔާސީ ކެމްޕޭނު ދަތުރުފުޅުގެ ތިންވަނަ މަންޒިލް، ށ. ނޫމަރާއަށް ވަޑައިގެންފި އެވެ. 

ރައީސް ޞާލިހު ށ އަތޮޅަށް ކުރައްވާ ދަތުރުފުޅުގައި އެންމެ ފުރަތަމަ ވަޑައިގެންނެވީ އެ އަތޮޅު ކޮމަންޑޫއަށެވެ. އެ ރަށުގައި އެމަނިކުފާނު ވަނީ ރިޔާސީ ކެމްޕޭނު ރަސްމީކޮށް ފައްޓަވާފައެވެ. އަދި ކޮމަންޑޫގއި ކެމްޕޭނު ޖަލްސާއެއްވެސް ކުރިއަށް ގެންދެވިއެވެ. 

އެއަށްފަހު އެމަނިކުފާނު ވަނީ މަރޮއްޓަށް ވަޑައިގެންފަ އެވެ. މަރޮށްޓަށް ކުރެއްވި ދަތުރުފުޅުތަކުގައިވެސް އެމަނިކުފާނު ވަނީ ރައްޔިތުންނާއި ބައްދަލުކުރައްވާ، ރައްޔިތުން ބޭނުންވާ ކަންކަން ދެނެގަތުމަށް މަޝްވަރާ ބައްދަލުވުންތަކާއި، ޖަގަހަ ބައްދަލުވުންތައް ކުރިއަށް ގެންދަވާފައެވެ. 

Advertisement

މާރޮށީގެ ދަތުރުފުޅު ނިންމަވާލައްވައި، މިހާރު ނޫމަރާއަށް ރައީސް ޞާލިހުގެ ކެންޕެއިން ޓީމު ވަޑައިގެންފައިވާއިރު, އެރަށުން އެމަނިކުފާނަށް މަރުހަބާ ދެންނެވުމަށް އެރަށުގެ ކުދި ބޮޑު ގިނަ އަދަދެއްގެ ރައްޔިތުން ވަނީ އެއްވެފައެވެ. 

ރައީސް ޞާލިހުގެ ނޫމަރާގެ މި ދަތުރުފުޅުގެ ތެރެއިންވެސް އެމަނިކުފާނު ވަނީ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވާފައެވެ.

މީގެ އިތުރުން ރައްޔިތުން ބޭނުންވާ ކަންކަން ދެނެގަތުމަށް މަޝްވަރާ ބައްދަލުވުންތައްވެސް ބޭއްވުމަށް ވަނީ ހަމަޖެހިފައެވެ. 

ކުރިއަށް އޮތް ރިޔާސީ އިންތިޚާބަށް އެމަނިކުފާނުގެ މެނިފެސްޓޯ އެކުލަވާލުމުގެ މަސައްކަތް ކުރަމުންދާއިރު، ރަށްތަކަށް ކުރައްވާ ދަތުރުފުޅުތަކުގެ ތެރެއިން ޙާލަތު ވަޒަންކުރުމާއި ރައްޔިތުންނަށް އެންމެ ބޭނުން ޖެހިފައިވާ ކަންކަން ބަލައި ދެނެގަތުމުގެ މަސައްކަތްތައް ވެސް ކުރިއަށް ގެންދިއުމަށް ވަނީ ނިންމާފަ އެވެ.