ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިތުރު ދައުރަކަށް އިންތިހާބުވެ ވަޑައިގެންފި ނަމަ, އެ ދައުރުގެ 5 އަހަރުތެރޭ، ނޫމަރާގައި، ގިނަ ކަންތައްތަކެއް ކޮށްދެއްވާނެ ކަމަށް ވައުދުވެވަޑައިގެންފިއެވެ.
ރައީސް ޞާލިހު ށ. އަތޮޅަށް ކުރައްވާ ކެމްޕޭނު ދަތުރުފުޅުގައި އެ އަތޮޅުގެ ނޫމަރާއަށް ވަޑައިގެން ބޭއްވި ޖަގަހަ ޖަލްސާގައި ވާހަކަދައްކަވަމުން އެމަނިކުފާނު ވަނީ، ނޫމަރާ އަކީ މީގެ ކުރީ ސަރުކާރު ތަކުން ވަރަށް އެކަހެރި ކޮށްފައިވާ ރަށެއް ކަން ފާހަގަކުރައްވާފައެވެ. އެހެންނަމަވެސް، އެމަނިކުފާނުގެ މި ވެރިކަމުގައި، އާބާދީ ބޮޑު ރަށެއް، އަދި ކުޑަ ރަށެއް ބެއްލެވުމެއްނެތި ރަށް ރަަށަށް އަސާސީ ޚިދުމަތްތައް ފޯރުކޮށްދެއްވަމުންދާ ކަމަށާ، އެ ގޮތުގެ މަތިން ނޫމަރާގައިވެސް ގިނަ މަސައްކަތްތަކެއް ކުރެއްވުމަށް ޕްލޭން ކުރައްވާފައިވާ ކަމަށް އެމަނިކުފާނު ވިދާޅުވިއެވެ.
އެގޮތުން ނޫމަރާގެ ބަނދަރު ތަރައްޤީ ކުރުމުގެ މަސައްކަތް މިހާރު ކުރިއަށްދާކަން ފާހަގަކުރައްވައި ރައީސް ޞާލިހު ވިދާޅުވީ އެ މަސައްކަތް ނިމިގެންދާއިރު، އެ ރަށުގެ ގިރާ ސަރަހައްދު ހިމާޔަތް ކުރުމުގެ މަސައްކަތް ވެސް ކުރިއަށް ދާނެ ކަމަށެވެ. އަދި މީގެ އިތުރުން ވެސް ގިނަ ކަންކަން އެ ރަށަށް ކޮށްދެއްވާނެ ކަމަށް އެމަނިކުފާނު ވަނީ ވައުދުވެވަޑައިގެންފަ އެވެ.
އިރާދަކުރެއްވިޔާ މި ރަށުގެ ރައްޔިތުން އެ ބޭނުންވާ ގޮތަށް، މި ރަށުގައި ފުލުހުންގެ ޚިދުމަތް އަޅުގަނޑުމެން ގާއިމް ކޮށްދޭނަން. މި ރަށުގެ ސުކޫލު އެއް ދަންފަޅިއަކަށް ހެދުމަށްޓަކައި، އިތުރަށް ބޭނުންވާ 4 ކްލާސްރޫމާއި، އޭޓީއެމްގެ ޚިދުމަތާއި، އަދި މި ރަށަށް ބޭނުންވާ، ބޮޑު ޒަމާނީ މިސްކިތް އިރާދަކުރެއްވިޔާ، ކުރިއަށް އޮތް 5 އަހަރުގެ ތެރޭގައި، އަޅުގަނޑުމެންގެ ދައުރުގައި، މި ރަށަށް ފޯރުކޮށްދޭނަން.
ރައީސް އިބްރާހިމް މުހައްމަދު ޞާލިހު
މިއާއެކު ރައީސް ޞާލިހް ވަނީ، ނޫމަރާ އިންޖީނުގެ ގޭގެ މަސައްކަތާއި ރަށު އޮފީހުގެ މަސައްކަތް ކުރިއަށް ނުގޮސް މަޑު ޖެހިފައިވާ ކަން ފާހަގަކުރައްވައި، ކުރިއަށް އޮތް އެއް މަސް ދުވަހުގެ ތެރޭގައި އެ ކަމަށް ހައްލެއް ހޯދައިދެއްވާނެ ކަމަށް ވިދާޅުވެފައެވެ. އަދި އިންޖީނުގޭގެ މަސައްކަތް ކޮށް ނިންމަވާނީ އެ ރަށު ރައްޔިތުން އެދިލެއްވި ގޮތަށް ކަމަށްވެސް ރައީސް ޞާލިހު ފާހަގަކުރެއްވި އެވެ.
މީގެ އިތުރުން ފެނާއި ނަރުދަމާގެ މަސައްކަތް ނޫމަރާގައި ކުރިއަށްދާއިރު, މުޅި ރާއްޖެ ދަތުރުފަތުރުގެ ނިޒާމަކުން ގުޅުވާލެވޭއިރު, އެ ރަށަށް ވެސް އޭގެ ފައިދާ ކުރާނެ ކަމަށް އެމަނިކުފާނު ވިދާޅުވިއެވެ.
"މިރަށަށް ކޮށްދޭން އޮތް ކަންތައް ތަކުގެ ތެރޭގައި އަދި އެބައޮތް، މަސްވެރިންނަށް ބޭނުންވާ ކަނދުފައްޗެއް އެޅުން. އޮޑިއެހެލާ ތަނެއް ގާއިމް ކުރުން. އިރާދަކުރެއްވިޔާ، ތި ބޭފުޅުން އެ އެދިވަޑައިގެންނެވި ގޮތަށް، މި ކަންތައްތައް ވެސް އަޅުގަނޑުމެން ކޮށްދޭނަން. ބޮޑު ދަނޑުގައި ޓާފު އެޅުން. ވޮލީ ކޯޓު. މިހުރީ އަޅުގަނޑުމެން މިރަށުގެ ވައުދު ލިސްޓު ގައި މިހާރުވެސް ހިމަނާފައި ހުރި ކަންކަން. އިރާދަކުރެއްވިޔާ އެއީ ކުރިއަށް އޮތް ތަނުގައި، ތިޔަ ބޭފުޅުންނަށް އަޅުގަނޑުމެން ކޮށްދޭނެ ކަންކަން. އަދި އެއްކަމެއްގެ ގޮތުގައި ތިޔަ ބޭފުޅުން އެދިފައި އެބަ އޮތް، މިރަށު ކައިރީގައި މިއޮތް ނެޔޮ، ރަށުގެ ރައްޔިތުންނަށް ބޭނުން ކުރެވޭ ގޮތަށް ހޯދައި ދިނުން. އެ ރަށް ކައުންސިލާއި ހަވާލުކޮށް، އެ ރަށުގެ ބޭނުން މި ރަށުގެ ރައްޔިތުންނަށް ލިބޭނެ ގޮތަކަށް އެކަން ކުރެވޭތޯ އަޅުގަނޑުމެން ބަލައިދޭނެ ވާހަކަވެސް ދަންނަވަން."
ރައީސް އިބްރާހިމް މުހައްމަދު ޞާލިހު
ރައީސް ޞާލިހު ވިދާޅުވީ، އެމަނިކުފާނުގެ ކުރިއަށް 5 އަހަރުގެ ދައުރު ނިންމަވާލައްވާނީ، އެ އެންމެހައި ކަމެއް ކުރައްވައި ނިންމަވާފައި ކަމަށެވެ.
މިއަހަރުގެ ރިޔާސީ އިންތިޚާބުގައި އެމަނިކުފާނުގެ ސްލޯގަން އަކީވެސް އަމާން ދިވެހި ރާއްޖެ މި ޝިއާރެވެ.
Advertisement
This content is created and paid for by advertisers and does not involve Voice Journalists
