ފަސޭހަކަމާއެކު އިންސާފު ފޯރުކޮށްދިނުމުގައި އެންމެ މުހިންމު އެއް ކަމަކީ އިންސާފު ހޯދުމަށް ރައްޔިތުން ކުރަންޖެހޭ ޚަރަދު ކުޑަކުރުންކަމާއި އިންސާފު ހޯދުމުގެ ޚަރަދު ބޮޑުވާނަމަ އިންސާފު ލިބުމަށް ހުރަސް އެޅިގެންދާނެކަމަށް ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާން ވިދާޅުވެއްޖެއެވެ.
އުއްތަމަ ފަނޑިޔާރު މިފަދައިން ވިދާޅުވީ ކ. ހުރާ މެޖިސްޓްރޭޓް ކޯޓުގެ އައު އިމާރާތް ރަސްމީކޮށް ހުޅުވުމުގެ ރަސްމިއްޔާތު ޝަރަފުވެރި ކޮށްދެއްވައި ވާހަކަދައްކަވަމުންނެވެ.
އެގޮތުން އުއްތަމަ ފަނޑިޔާރު ދެއްކެވި ވާހަކަފުޅުގައި އިންސާފު ޤާއިމްކުރުމުގެ ބާރަކީ ފަނޑިޔާރުންނަށް ރައްޔިތުން ދީފައިވާ ރައްޔިތުންގެ ބާރެއްކަމަށާއި، ރައްޔިތުންނެކޭ އެއްފަދައިން ކޯޓުގެ އަދަބު ސަދަބު ހިފަހައްޓައި ކޯޓުގެ ހުރުމަތް ހިފެހެއްޓުމަކީ ފަނޑިޔާރުންގެވެސް ޒިންމާއެއްކަމުގައި ވަނީ ފާހަގަކުރައްވާފައެވެ. އަދި ފަސޭހަކަމާއެކު އިންސާފު ފޯރުކޮށްދިނުމުގައި އެންމެ މުހިންމު އެއް ކަމަކީ އިންސާފު ހޯދުމަށް ރައްޔިތުން ކުރަންޖެހޭ ޚަރަދު ކުޑަކުރުންކަމާއި އިންސާފު ހޯދުމުގެ ޚަރަދު ބޮޑުވާނަމަ އިންސާފު ލިބުމަށް ހުރަސް އެޅިގެންދާނެކަމަށް ވިދާޅުވެފައިވެއެވެ.
މީގެ އިތުރުން، ރާއްޖޭގައިވެސް ފީ އަކާ ނުލާ މަސައްކަތްކޮށްދެއްވާ ވަކީލުން އެބަ ތިއްބެވިކަމަށާއި، އެބޭފުޅުން އެކުރައްވާ މަސައްކަތުން ރައްޔިތުންނަށް އިންސާފަށް ވާޞިލްވުމުގައި ބޮޑެތި ލުއިތަކެއް ލިބިގެންދާކަން ފާހަގަކޮށް އެބޭފުޅުން ކޮށްދެއްވާ މަސައްކަތުގެ އަގު ވަޒަންކޮށް އެފަރާތްތަކަށް އުއްތަމަ ފަނޑިޔާރު ވަނީ ޝުކުރު އަދާކުރައްވާފައެވެ.
އަދި ޝަރީޢަތްތަކާ ގުޅުންހުރި ދުވަސްވީ ލިޔުންތައް ފަނޑިޔާރުން ދިރާސާކުރުމުގެ މުހިންމުކަމަށް އަލިއަޅުވާލައި، މިފަދަ ދިރާސާތައް ކުރުމަކީ ފަނޑިޔާރުންގެ ޢިލްމީ ޤާބިލްކަން އިތުރުވެގެން ދާނެކަމެއްކަމުގައި އުއްތަމަ ފަނޑިޔާރު ފާހަގަކުރެއްވިއެވެ. ހަމައެހެންމެ، މިފަދަ ދިރާސާތައް ކުރުމަކީ ޢަދަލު އިންސާފު ފޯރުކޮށްދިނުމަށް ބޭނުންކުރެވޭ މުހިންމު ޢިލްމީ ވަޞީލަތަކަށް ވެގެންދާނެކަންވެސް އުއްތަމަ ފަނޑިޔާރުގެ ވިދާޅުވި އެވެ.
މި ރަސްމިއްޔާތުގައި ޖޭ.އެސް.ސީގެ ނާއިބު ރައީސް އަލްއުސްތާޛު މަސްތޫރު ޙުސްނީގެ ވާހަކަފުޅުގައި، ކޯޓުތަކުގެ ތަރައްޤީއަށް ގިނަގުނަ މަސައްކަތްތަކެއް ކުރެވިފައިވާކަމަށާއި، މިގޮތުން ގިނަ ކޯޓުތަކެއްގެ ޢުމްރާނީ ތަރައްޤީއަށް ގިނަ މަސައްކަތްތަކެއް ކުރެވި، ޝަރުޢީ ދާއިރާގެ ބަޖެޓު އެހެން އަހަރުތަކަށްވުރެ އިތުރުވެފައިވާކަން ފާހަގަކުރެއްވިއެވެ.
އަދި ކޯޓުތަކުގައި މަސައްކަތްކުރާ މުވައްޒަފުން، އެއްވެސް ތަފާތުކުރުމެއް ނެތި، ހުރިހާ ފަރާތްތަކަށްވެސް ޚިދުމަތް ފޯރުކޮށްދިނުމުގެ މުހިންމުކަމުގެ މައްޗަށް ނާއިބު ރައީސްގެ ވާހަކަފުޅުގައި އަލިއަޅުއްވާލައްވާފައިވެއެވެ.
މިގޮތުން ޚިދުމަތް ލިބިގަންނަ ފަރާތަކީ ވަކީލެއް ކަމުގައިވިޔަސް ނުވަތަ ޢާންމު ރައްޔިތަކު ކަމުގައިވިޔަސް އެފަރާތްތަކަށް ހަމަހަމަކަމާއެކު ފެންވަރު ރަނގަޅު ޚިދުމަތެއް ފޯރުކޮށްދިނުން މުހިންމުކަމަށް ވަނީ ވިދާޅުވެފައެވެ.
މީގެ އިތުރުން، ކ. ހުރާ މެޖިސްޓްރޭޓް ކޯޓުގެ މަސައްކަތުގައި އަމަލީ ގޮތުންނާއި އެހެނިހެން ގޮތްތަކަށް އެހީތެރިވެދެއްވި އެންމެ ބޭފުޅުންނަށް ޖޭ.އެސް.ސީގެ ނައިބު ރައީސް ވަނީ ޝުކުރު ދަންނަވާފައެވެ.
2 ކޮޓަރީގެ އިމާރާތެއްގެ ޖާގައިގައި ހިންގުނު ހުރާ މެޖިސްޓްރޭޓް ކޯޓުގެ އައު އިމާރާތް ފަރުމާކުރެވިފައިވަނީ، މިހާރުގެ ޤާނޫނުތަކުން ތަސައްވަރު ކުރާ ފަދަ ގޮތަކަށް ޝަރީޢަތްތައް ހިންގުމަށް ބޭނުންވާނެ ޖާގައާއި ވަސީލަތްތައްވެސް ހިމެނޭ ގޮތަށް ކަމަށް ޖުޑީޝަލް އެޑްމިނިސްޓްރޭޝަން އިން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
