ރަތަފަންދޫ އައިލެންޑް ޑިވެލޮޕްމެންޓް ސޮސައިޓީ (ރިޑްސް)އިން އިންތިޒާމްކޮށްގެން ފަރެސްމަތޮޑާ ދާއިރާއަށް ޙާއްސަކޮށްގެން ކުރިއަށްގެންދާ ވޮލީ މުބާރާތް އިއްޔެ ފަށައިފިއެވެ.

ރިޑްސް ދާއިރާ ރައީސް ކަޕްގެ ނަމުގައި ކުރިއަށްދާ މި މުބާރާތް ހުޅުވުމުގެ ރަސްމިއްޔާތުގައި، މުބާރާތުގައި ބައިވެރިވާ ޓީމްތަކުގެ ރަށު ކައުންސިލްތަކުންނާއި އެމް.ޑީ.ޕީގެ ދާއިރާގެ ރައީސް ބައިވެރިވެ ވަޑައިގެންނެވިއެވެ. ކުލަ ގަދަ ރަސްމިއްޔާތަކާއި އެކު ފެށި މި މުބާރާތުގައި އަންހެން އަދި ފިރިހެން ޑިވިޜަންގައި ޖުމްލަ 8 ޓީމް ކުޅޭނެއެވެ. މި މުބާރާތުގައި ވާދަކުރަނީ ރަތަފަންދޫ، ފިޔޯރީ، ނަޑެއްލާ އަދި ވާދޫއެވެ. 

މުބާރާތްހުޅުވުމުގެ ގޮތުން ކުޅުނު ފުރަތަމަ ކުޅުނީ އަންހެން ޑިވިޜަންގެ މެޗެކެވެ. ނަޑެއްލާ ސްޕޯޓްސް ކްލަބު އަދި ވާދޫ ޓީމް ބައްދަލުކުރި ފޯރިގަދަ މިމެޗް 3 ސެޓް އެއް ސެޓުން ކާމިޔާބުކުރީ ވާދޫ ޓީމެވެ. މިމެޗްގެ ކުއީން އޮފްދަ މެޗުގެ މަގާމް ހޯދީ ވަދޫ ޓީމްގެ ޖާރޒީ ނަމްބަރ 9، ޒަހާނާ އިބްރާހީމްއެވެ. 

Advertisement

މި މުބާރާތުގެ ފިރިހެން ޑިވިޝަންގެ ފުރަތަމަ މެޗްގައި ވާދަކުރީ ރަތަފަންދޫ ސްޕޯޓްސް ކްލަބުގެ ވެޓެރަންސް ޓީމާއި ޔޫތް ޓީމެވެ. ފޯރިގަދަ އަދި ހުނަރުވެރި ކުޅުމެއް ފެނިގެންދިޔަ މި މެޗް ސީދާ ތިން ސެޓުން ކާމިޔާބުކުރީ ރަތަފަންދޫ ސްޕޯޓްސްގެ ވެޓަރަންސް ޓީމެވެ. މެޗްގެ އެންމެ މޮޅު ކުޅުންތެރިޔާއަށް ހޮވުނީ ޖާޒީ ނަމްބަރު 5، މުހައްމަދު އަލީ (ޕުއްލާ)އެވެ. 

މި މުބާރާތުގައި މިއަދުވެސް ފޯރިގަދަ ދެމެޗް ކުޅޭނެއެވެ. ފުރަތަމަ މެޗްގައި ބައްދަލުކުރާނީ ފިރިހެންޑިވިޜަންގެ ވަދޫ ވޮލީ ޓީމާއި ފިޔޯރީ ޓީމެވެ. އަދި ރޭގަނޑުކުޅޭ އަންހެން ޑިވިޜަންގެ މެޗްގައި ބައްދަލުކުރާނީ ފިޔޯރީ ޓީމާއި ރަތަފަންދޫ ސްޕޯޓްސް ކްލަބުގެ ރަނިން ޓީމެވެ. 

މިމުބާރާތުގެ ކުޅުން މިމަހު 17 އާއި ހަމައަށް ކުރިއަށް ދާނެއެވެ.