އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ މާލޭ ސިޓި ކެމްޕޭނު ކޯޑިނޭޓަރާއި ޑެޕިއުޓީ ކެމްޕޭނު ކޯޑިނޭޓަރު ކަނޑައަޅައިފި އެވެ. 

އެގޮތުން މާލެ ސިޓީގެ ކެމްޕޭނު ކޯޑިނޭޓަރެއްގެ ގޮތުގައި ކަނޑައަޅުއްވާފައިވަނީ ޑިފެންސް މިނިސްޓަރު މާރިޔާ ދީދީއެވެ. އަދި ޑެޕިއުޓީ ކެމްޕޭނު ކޯޑިނޭޓަރަކަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމު (އަނދުން ހުސެއިން) ކަމުގައި ވަނީ ކަނޑައަޅާފަ އެވެ. 

ހުޅުމާލޭގައި ކުރިއަށް ގެންދިޔަ ހަރަކާތުގެ ތެރެއިން 

ރައީސް ޞާލިހުގެ ރިޔާސީ ކެމްޕޭނުގެ ހަރަކާތްތައް އެމްޑީޕީން ވަނީ ރަސްމީކޮށް ފައްޓާފަ އެވެ. 

އެ ކެމްޕޭނު ހަރަކާތްތަކުގެ ތެރެއިން މާލޭގައި ދޮރުން ދޮރަށް ކެމްޕޭނު ހަރަކާތެއް ވެސް އެ ޕާޓީން ވަނީ ކުރިއަށް ގެންގޮސްފަ އެވެ. 

އޭގެ އިތުރުން ރައީސް ޞާލިހުގެ ކެމްޕޭނުގެ މާލޭ ސިޓީގެ ކޯޑިނޭޓަރާއި ޑެޕިއުޓީ ކޯޑިނޭޓަރު ބައިވެރިވެ ވަޑައިގެން ހުޅުމާލޭ ދާއިރާގައި ވެސް ވަނީ ދޮރުން ދޮރަށް ހަރަކާތެއް ކުރިއަށް ގެންގޮސްފަ އެވެ. 

ހުޅުމާލޭގައި ކުރިއަށް ދިޔަ ހަރަކާތުގެ ތެރެއިން 

ރައީސް ޞާލިހުގެ ކެމްޕޭނު ރަސްމީކޮށް އަތޮޅުތެރޭގައި ފެއްޓެވުމަށް އެމަނިކުފާނު ވަނީ ށ އަތޮޅަށް ވެސް ދަތުރުފުޅެއް ކުރައްވާފަ އެވެ. 

އެގޮތުން އެމަނިކުފާނުގެ ކެމްޕޭނު ރަސްމީކޮށް ފައްޓަވާފައިވަނީ ށ. ކޮމަންޑޫގަ އެވެ. ކޮމަންޑޫގައި އެ ކެމްޕޭނު ފައްޓަވައި އެ އަތޮޅުގެ ގިނަ ރަށްތަކަށް ރައީސް ޞާލިހު ޒިޔާރަތްކުރައްވާފައިވާއިރު، އެމަނިކުފާނުގެ އަރިހުގައި ސަރުކާރުގެ އިސް ބޭފުޅުންވެސް ށ އަތޮޅަށް ވަޑައިގެންފައި ވެއެވެ. 

މި އަހަރުގެ ރިޔާސީ އިންތިޚާބުގައި ރައީސް ޞާލިހުގެ ސްލޯގަން އަކީ "އަމާން ރާއްޖެ" އެވެ. 

މިއަހަރުގެ ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބު ރައީސް ޞާލިހު ބޮޑުތަނުން ކާމިޔާބު ކުރައްވާނެ ކަމަށާއި، އެމަނިކުފާނާއި ނުލާ އަމާން ރާއްޖެއެއް ނުހޯދޭނެކަމަށް އެމަނިކުފާނަށް ތާއީދުކުރައްވާ ސަރުކާރުގެ ވަޒީރުން ދަނީ ވިދާޅުވަމުން ނެެވެ.