މިއަހަރު ބާއްވާ ރިޔާސީ އިންތިޚާބު އެއްބުރުން ކާމިޔާބު ކުރައްވާނެ ކަމަށާ، އެ މަންޒަރު މިހާރުވެސް ފެނިވަޑައިގަންނަވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހުގެ ކެންޕެއިނަށް އެމަނިކުފާނު ވަނީ މިއަދު މާލޭގެ ގަލޮޅުގެ ގެތަކަށް ދޮރުން ދޮރަށް ވަޑައިގެންފައެވެ. އެ ހަރަކާތަށް ފަހު މީޑިއާތަކަށް މައުލޫމާތު ދެއްވަމުން ރައީސް ސޯލިހު ވިދާޅުވީ، މިއަދު ޒިޔާރަތް ކުރެއްވި ގަލޮޅު ދެކުނުގެ ގޭގެއިން އެމަނިކުފާނަށް ވަރަށް ބޮޑު "އުއްމީދެއް ލިބިއްޖެ" ކަމަށެވެ.
އެއާއެކު އެމަނިކުފާނު ވިދާޅުވީ ކުރިއަށް އޮތް ރިޔާސީ އިންތިހާބު އެއްބުރުން ކާމިޔާބު ކުރެވޭނެ ކަމަށާ، މަސައްކަތް ކުރައްވަނީ 2018 ގައި ކެމްޕޭނު ތެރޭގައި އެހުރި ފޯރި އަލުން އަނބުރާ ގެނައިސް އެ ނަތީޖާ ނެރުއްވުމަށް ކަމަށެވެ.
"އިރާދަކުރެއްވިޔާ اللهގެ ރަހުމަތާއި އެކު އެއްބުރުން އަޅުގަނޑުމެން ކާމިޔާބު ކުރާނަން. ކުރީގެ ޓާގެޓަށް ދެވޭތޯ, 2018 ގައި އެ ލިބުނު، ހިސާބަށް ދެވޭތޯ އަޅުގަނޑުމެން މި މަސައްކަތް ކުރަނީ، އަޅުގަނޑަށް އެ މަންޒަރު އެބަ ފެނޭ. އޮންނާނީ މަސައްކަތް ކުރުން. މަސައްކަތް ނުކޮށެއް ނުލިބޭނެ"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު ރައީސް ޞާލިހް ވިދާޅުވީ، މި ސަރުކާރުގެ ކަންކަމާއި ގުޅިގެން ބައެއް ފަރާތްތަކުން ރައްޔިތުންނަށް އޮޅުވާލާފައިވާކަމަށެވެ. އެހެން ކަމުން، މިސަރުކާރުން މިވީ ތަނުގައި ކޮށްދީފައިވާ ކަންކަން ސާފުކޮށް ރައްޔިތުންނަށް ބުނެދޭން ޖެހޭ ކަމަށެވެ. އެފަދައިން ބުނެދީގެން ރައްޔިތުންގެ ތާއީދު ވަރަށް ބޮޑަށް ލިބޭނެ ކަމަށް އެމަނިކުފާނު ވިދާޅުވިއެވެ.
ކުރިއަށް އޮތް ރިޔާސީ އިންތިހާބުގައި ރައީސް ޞާލިހަށް ތާއީދު ހޯއްދެވުމަށް އެމްޑީޕީން މިހާރު ވަނީ އަތޮޅު ތެރޭގައިވެސް ކެންޕެއިން ހަރަކާތްތައް ފަށާފައެވެ. އަދި އެމްޑީޕީއާއި އެކު ކޯލިޝަން ހަދާފައިވާ އެމްޑީއޭ އާއި އަދާލަތު ޕާޓީންވެސް އަންނަނީ ރައީސް ޞާލިހުގެ ކެންޕެއިން ހަރަކާތްތައް ކުރިއަށް ގެންދަމުންނެވެ.
Advertisement
This content is created and paid for by advertisers and does not involve Voice Journalists
