މިއަހަރުގެ ސެޕްޓެމްބަރު މަހު، ކ. ގުޅީގެ ބިން ހިއްކަން ފަށްޓަވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހުގެ ރިޔާސީ ކެމްޕެއިނަށް މާލެ އަތޮޅު ގުޅި, ގުރައިދޫ އަދި މާފުށްޓަށް ކުރައްވާ ދަތުރުފުޅުގެ ތެރެއިން މިއަދު މެންދުރު އެމަނިކުފާނު ވަނީ ގުޅިއަށް ވަޑައިފެންފައެވެ.
ގުޅީގައި ބޭއްްވުނު ބައްދަލުވުމުގައި ވާހަކަދައްކަމުން ރައީސް ޞާލިހު ވިދާޅުވީ، މާލެ އަތޮޅުގެ ރަށްތަކުން ގުޅި އަކީވެސް މީގެ ކުރިން ވަރަށް ބޮޑަށް އަޅާ ނުލާ ދޫކޮށްލާފައިވާ ރަށެއް ކަމަށެވެ. އަދި ގުޅިއަށް އިސްކަންދެވުނު އެއް ސަބަބަކީވެސް އެއީ ކަމަށް ރައީސް ޞާލިހު ވިދާޅުވި އެވެ.
މި ރަށުގެ ފެން ތަޣައްޔަރުވެފައި އޮތީ. އަޅުގަނޑު މި ދެންނެވީ ނަރުދަމާގެ ނިޒާމެއް ނެތް. އެތައް އެތައް އަސާސީ ޚިދުމަތް ތަކުން މަހްރޫމް ވެފައި ތިބީ. އެހެން ނަމަވެސް އިރާދަކުރެއްވިޔާ ގުޅީގައި ހުރި ފެން، މިއަދު ބޯން ކަމުދާނެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު ކުރިއަށް އޮތް ދައުރުގައިވެސް ގުޅިއަށް ބޭނުންވާނެ ގިނަ ކަންކަން ހުންނާނެކަން ފާހަގަކުރައްވައި ރައީސް ޞާލިހު ވަނީ، ކުރިއަށް އޮތް ދައުރުގައި އެކަންކަން ކޮށްދިނުމަށް ނިންމާފައިވާ ކަމަށެވެ. އެގޮތުން މި ދައުރާއި ކުރިއަށް އޮތް ދައުރުގައި، ގުޅީގެ ރައްޔިތުންނަށް 5 ކަމެއް ކޮށްދެއްވާނެ ކަމަށް ރައީސް ޞާލިހު ވަނީ ވިދާޅުވެފަ އެވެ.
އިރާދަކުރެއްވިޔާ މި ރަށުގެ ބިން ހިއްކުމުގެ މަސައްކަތް މިހާރު ވަނީ އެމްޓީސީސީއާ ހަވާލުކޮށްފަ. ތި ބޭފުޅުން މިއަދު އެދި ވަޑައިގަތީ އެ މަސައްކަތް ފެށޭނީ ކޮން ތާރީޚެއްގައި ތޯ. އިރާދަކުރެއްވިޔާ މި ރަށުގެ މަސައްކަތް އަމަލީގޮތުން ސެޕްޓެމްބަރު މަހުގެ ތެރޭގައި ފެށިގެން ކުރިއަށް ދާނެ. ކުނި މެނޭޖް ކުރުމަކީ އަޅުގަނޑުމެންގެ މަޝްރޫއު ތެރޭގައި ހުރިހާ ދާއިރާއެއްގައި ކުރުމަށް ނިންމާފައިވާ ކަމެއް. މިރަށުގެ ކުނި މެނޭޖް ކުރުމަށްޓަކައި ކުރަންޖެހޭ ކަންކަން މިހާރު އޮތީ ޓެންޑަރ ޕްރޮސެސްގައި. ނިމުމާއިއެކީގައި ވީހާވެސް އަވަހަށް އަޅުގަނޑުމެން އެ މަސައްކަތް ފަށާނަން. އޭޓީއެމްގެ ޚިދުމަތް ދިނުމަށް މިހާރު ވަނީ ވަކި ރަށްރަށެއް ލިސްޓުކުރެވުފައި. އޭގެ ތެރެއިން އެންމެ އިސްކަންދޭނެ ރަށްތަކުގެ ތެރޭގައި ގުޅި ހިމެނޭ. އިރާދަކުރެއްވިޔާ މި އަންނަ މަހު އޭޓީއެމް ބެހެއްޓުމުގެ މަސައްކަތް ރަށްރަށުގައި ފެށިގެން ދާނެ. އިރާދަކުރެއްވިޔާ ދެން މި އޮތް ދައުރުގައި ބަނދަރަށް ދިމާވެފައިވާ ދަތިކަން ހައްލުކޮށް، ސިއްހީ މަރުކަޒުގައި ލެބޯޓްރީއެއް ގާއިމް ކުރުމުގެ މަސައްކަތް ފެށޭނެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މީގެ އިތުރުން، ރައީސް ޞާލިހު ވަނީ މީގެ ކުރިންވެސް ކ ގުޅުން އެމްޑީޕީއަށް އަގުލަބިއްޔަތު ލިބޭކަން ފާހަގަކުރައްވާފައެވެ. އެހެންނަމަވެސް، ދާއިރާ އެއްކޮށް ލުމުން އަގުލަބިއްޔަތު ލިބެނީ ޕީޕީއެމަށް ކަން ފާހަގަކުރައްވަމުން ރައީސް ޞާލިހު ވަނީ އެކަން މިހާރު ބަދަލުވެފައިވާ ކަމަށް ވިދާޅުވެފައެވެ. އެގޮތުން، ދާދިފަހުން ބޭއްވުނު ގުރައިދޫ ދާއިރާގެ ބައި އިލެކްޝަނުގައި އެމްޑީޕީ ކެންޑިޑޭޓް ކާމިޔާބު ކުރެއްވި ކަން ރައީސް ޞާލިހު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
