ދިވެހިރާއްޖޭގެ އެކި ރަށްރަށުގައި ދައުރުގެ މިހާތަނަށް 41 ފުޓުބޯޅަ ދަނޑު އަޅާ ނިންމާފައިވާ ކަމަށާ، އަދި އެ އަދަދަށް ފުޓުބޯޅަ ދަނޑުތައް އެޅެމުންދާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

ރައީސް ޞާލިހު ގެ ކެންޕެއިނަށް މ އަތޮޅަށް ކުރައްވަމުންދާ ދަތުރުފުޅުގެ އެ އަތޮޅު ވޭވަށަށް ވަޑައިގެން، ރައްޔިތުންނާއި ބައްދަލުކުރައްވާ ވާހަކަދައްކަވަމުން ވިދާޅުވީ، މ އަތޮޅުގެ ރަށްތަކަކީ އާބާދީގެ ގޮތުން މަދު މީސްކޮޅެއް އުޅޭ ރަށްތަކަކަށް ވުމުން، މީގެ ކުރީ ސަރުކާރު ތަކުން އެ ރަށްރަކަށް އޮތީ ވަރަށް ބޮޑަށް އަޅާ ނުލައި ކަމަށެވެ. އެ ލިސްޓުގައި ވޭވަށްވެސް ހިމެނޭ އިރު، މިސަރުކާރުން އެކަން ބަދަލު ކޮށްފައިވާ ކަމަށް އެމަނިކުފާނު ވިދާޅުވިއެވެ. 

އެގޮތުން، 2018 ވަނަ އަހަރުގެ ރިޔާސީ އިންތިހާބުގައި ވޭވަށަށް އެމަނިކުފާނު ވަޑައިގެންނެވުމުން ރައްޔިތުން އެދުނު އެންމެ ބޮޑު އެދުމަކީ އެ ރަށު ބަނދަރު ތަރައްޤީ ކުރުން ކަމަށާ، އެ އިންތިހާބުގައި އެމަނިކުފާނު އެ ރަށަށް ވެވަޑައިގެންނެވި ހަމައެކަނި ވައުދަކީ ވެސް އެއީ ކަން ރައީސް ޞާލިހު ފާހަގަކުރެއްވިއެވެ. އަދި އެ ވައުދު މިހާރު ފުައްދައިދެއްވާފައިވާއިރު، އޭގެ އިތުރުންވެސް ކަންކަން ކޮށްދެއްވާފައިވާ ކަމަށް ވިދާޅުވި އެވެ. 

Advertisement

އޭގެ ތެރޭގައި، އެ ރަށު އިންޖީނުގޭގެ މަސައްކަތާއި، އައުޓުޑޯ ޖިމާއި, ކައުންސިލްގެ އައު އިމާރާތުގެ މަސައްކަތާއި، މެޖިސްޓްރޭޓް ކޯޓުގެ މަސައްކަތުގެ އިތުރުން ޒަމާނީ ފެންވަރުގެ ފުޓުބޯޅަ ދަނޑެއް އެޅުމުގެ މަސައްކަތް ހިމެނޭ ކަމަށް ރައީސް ވިދާޅުވި އެވެ. 

މިއާއެކު ރައީސް ޞާލިހް ވިދާޅުވީ، ކުޑަރަށެއް ބޮޑު ރަށެއް ބެލުމެއް ނެތި، ރައްޔިތުން ބޭނުންވާ އަސާސީ ޚިދުމަތްތައް ފޯރުކޮށްދިނުމަށް މަސައްކަތް ކުރައްވަމުންދާ ކަމަށެވެ. 

އަދި އެމަނިކުފާނުގެ ކުރިއަށް އޮތް ދައުރުގައި، ވޭވަށުގައި ހަދާފައިވާ ބަނދަރުގައި ހުރި ތިލަ ތަން ތަން ފުން ކޮށް ގިރާ ސަރަހައްދު ހިމާޔަތް ވެސް ކުރައްވާނެ ކަމަށް ވަނީ ވައުދުވެވަޑައިގެންފައެވެ.