ތަކެތީގެ އަގުތައް ދަށަށްދާކަމަށް ވިދާޅުވެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދެއްކެވި ވާހަކަފުޅުތަކަށް މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ރައްދުދެއްވައިފި އެވެ. 

މ. މުލަކުގައި ބޭއްވި ރައީސް ޞާލިހުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ ކިތަންމެ ބާރަށް އަދި ކިތަންމެ އަޑު ހަރުކޮށް ތަކެތީގެ އަގު ބޮޑު ވެޔޭ ވާދަވެރިން ބުނިކަމުގައި ވީނަމަވެސް، ތަކެތީގެ އަގު ދަށަށް ދާ ކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސް ހިސާބުތަކުން ހާމަވާ ކަމަށެވެ. އަދި ރާއްޖޭގެ އިޤްތިޞާދު ވެސް ރަނގަޅުވަމުން އަންނަ ކަމަށެވެ. 

ރައީސް ޞާލިހުގެ އެ ވާހަކަތަކަށް ރައްުދެއްވާ ވައްޑެ ކުރެއްވި ޓްވީޓެއްގައި ވިދާޅުވީ ރައީސް ޞާލިހު އަމިއްލަފުޅަށް ފިހާރަތަކަށް ވަޑައިގެން ތަކެތީގެ އަގުތައް ހުރިގޮތް ސާފުކުރެއްވުމަށް މަސައްކަތްޕުޅު ކުރައްވާނަމަ ތަކެތީގެ އަގުތަށް ހުރި ހިސާބު އެނގިލައްވާނެ ކަމަށެވެ. އަދި ޑޮލަރުގެ އަގުތަކާއި ދަތުރުފަތުރުގެ އަގުތައް އުފުލިފައިވާ މިންވަރު ވެސް ރަނގަޅަށް އެނގިލައްވާނެ ކަމަށެވެ. 

ވައްޑެ ވަނީ ތަކެތީގެ އަގުތައް ހުރިގޮތް ސާފުކޮށްލެއްވުމަށް ރިޔާސީ ގަނޑުވަރުކޮޅުން ނިކުމެވޑައިގެން ކަންކަން ބެއްލެވުމަށް ވެސް ރައީސް ޞާލިހުގެ އަރިހުން އެދިލައްވާފަ އެވެ.

ވަހީދު މިފަދައިން ވިދާޅުވެފައިވާއިރު ޖީއެސްޓީއަށް އައި ބަދަލާއި އިންފްލޭޝަން މަތިވުމާއި ގުޅިގެން އައި ބަދަލުގެ ސަބަބުން ތަކެތީގެ އަގުތައް ވަނީ ވަރަށް ބޮޑަށް އުފުލިގެން ގޮސްފައެވެ. 

ތަފާސް ހިސާބުތަކުން ދައްކާގޮތުގައި އެންމެ ބޮޑެތި ބަދަލުތަކެއް އައިސްފައިވަނީ ކެއިން ބުއިމުގެ ބާވަތްތަކާއި ކޮސްމެޓިކްސްގެ ބާވަތްތަކަށެވެ. ކެއިން ބުއިމުގެ ބާވަތްތަކުގެ އަގުތައް އުފުލުމާއި ގުޅިގެން ކެފޭ އަދި ރެސްޓޯރެންޓުތަކުން ފޯރުކޮށްދޭ ޚިދުމަތަށް ވެސް ބޮޑެތި ބަދަލުތަކެއް އައިސްފައިވާކަމަށް ތަފާސް ހިސާބުތަކުން ދައްކައެވެ. 

މީގެ އިތުރުން ތަކެތީގެ އަގުތައް އުފުލުމަށް ދިމާވި އެންމެ ބޮޑު އެއް ސަބަބަކީ ފާއިރުވި 2 އަހަރު ތެރޭ 4 ބިލިއަން ރުފިޔާ ޗާޕުކޮށްގެން އިޤްތިޞާދަށް ނެރުން ކަމަށާއި، އެކަމުގެ ސަބަބުން ޑޮލަރުގެ އަގު ކޮންޓްރޯލުކުރުމަށް ވެސް ބޮޑެތި ގޮންޖެހުންތަކާއި ކުރިމަތިވެފައިވާކަން އިޤްތިޞާދު ދިރާސާ ކުރައްވާ ފަރާތްތައް ދަނީ ވިދާޅުވަމުން ނެވެ.