މިއަހަރުގެ ރިޔާސީ އިންތިހާބު ކާމިޔާބު ކުރައްވައި, ކުރިއަށް އޮތް ދައުރަށް އިންތިހާބުވެ ވަޑައިގެންފި ނަމަ، އެ ފަސް އަހަރުގެ ތެރޭގައި، ޒުވާން އައު ޖީލަށް ފުރުސަތުތައް ހުޅުވާލައްވާނެ ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.  

ރައީސް ޞާލިހުގެ ރިޔާސީ ކެމްޕެއިނަށް މ. މަޑުއްވަރީ އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ވިދާޅުވީ، މި ސަރުކާރުން ހުޅުވާލާފައިވާ ހިލޭ ޑިގްރީގެ އެހީގައި، 17,858 ދަރިވަރުން ތައުލީމް ހާސިލް ކުރަމުންދާ ކަމަށެވެ. އަދި ކުރިއަށް އޮތް ތިނެއް ނުވަތަ ހަތަރު އަހަރުގެ ތެރޭގައި އެކުދިން ކިޔަވައި ނިމިގެން މަސައްކަތުގެ މާހައުލަށް ނުކުނާނެ ކަން ރައީސް ޞާލިހު ފާހަގަކުރެއްވިއެވެ. 

ރައީސް ޞާލިހު ވިދާޅުވީ ދިވެހިރާއްޖޭގެ މުސްތަޤުބަލު ވަރަށް އުޖާލާ ކަމަށެވެ. އެގޮތުން ރާއްޖެއިން ބޭރުގަޔާއި ރާއްޖޭގައި ތައުލީމް ހާސިލްކުރަމުންދާ އެ ދަރިވަރުންތައް ރާއްޖެ އައިސް، މި ދިވެހި ރާއްޖެ އެހެން މަރުހަލާ އަކަށް ގެންދާނެ ކަމަށް އުއްމީދު ކުރައްވާ ކަމަށްވެސް ވިދާޅުވި އެވެ. 

އެ ފުރުސަތު ތައް ހުޅުވާލައި، ދިވެހިރާއްޖެއަށް އަމާން ރާއްޖެއެއް ހޯދައި ދެވޭނީ އެމަނިކުފާނަށް ވޯޓު ލައި، ވެރިކަމަށް އިންތިޚާބު ކުރުމުން ކަމަށްވެސް ރައީސް ޞާލިހު ވިދާޅުވި އެވެ.