ކުރިޔަށް އޮތް ރައްޔިތުންގެ މަޖިލީހުގެ މެންބަރުންގެ ޢަދަދު މި މަހު 28 ގެ ކުރިން އިލެކްޝަންސް ކޮމިޝަން (އީސީ) އިން ކަނޑައަޅާނެ ކަމަށް އެ ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.
އެގޮތުން ހަބީބު މިއަދު ކުރެއްވި ޓްވީޓުގައި ވިދާޅުވީ ދިވެހިރާއްޖޭގެ ޤާނޫނުއަސާސީގެ 71 ވަނަ މާއްދާގައި ބުނެފައިވާގޮތުން، ރައްޔިތުންގެ މަޖިލީހުގެ މެންބަރުންގެ ޢަދަދު ކަނޑައަޅަނީ ދިވެހިރާއްޖޭގެ ކޮންމެ އިދާރީ ދާއިރާއެއްގައި ރަޖިސްޓަރީ ކުރެވިފައިވާ އާބާދީގެ ފުރަތަމަ ފަސް ހާސް މީހަކަށް ނުވަތަ ފަސް ހާސް މީހުން ހަމަނުވާ ކޮންމެ އިދާރީ ދާއިރާއަކަށް ދެ މެންބަރުން ކަމަށެވެ.
އަދި ދިވެހިރާއްޖޭގެ އިދާރީ ދާއިރާއެއްގައި ރަޖިސްޓަރީ ކުރެވިފައިވާ އާބާދީ ފަސް ހާހަށްވުރެ އިތުރުވާނަމަ، އާބާދީގެ ފުރަތަމަ ފަސްހާސް މީހުންނަށްވުރެ އިތުރުވާ ކޮންމެ ފަސްހާސް މީހަކަށް މެންބަރެއް ގާނޫނުގައި ކަނޑައަޅާފައިވާ ކަަމަށް ހަބީބު ވިދާޅުވެފައިވެއެވެ.
މިއާއިއެކު ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައެޅުމުގެ ޤާނޫނު ގައިވާގޮތުން، ހިނގަމުންދާ ރައްޔިތުންގެ މަޖިލީހުގެ 12 މަހާއި 10 މަސް ދުވަހުގެ ތެރޭގައި، ދިވެހިރާއްޖޭގެ ކޮންމެ އިދާރީ ދާއިރާއަކަށްވާ ރައްޔިތުންގެ މަޖިލީހުގެ މެންބަރުންގެ ޢަދަދު އިލެކްޝަންސް ކޮމިޝަނުން ކަނޑައަޅަންޖެހޭނެ ކަމަށް ހަބީބު ވަނީ ފާހަގަކުރައްވާފައެވެ.
އެހެންކަމުން މި ހިނގާ ޖުލައި މަހުގެ 28 ވަނަ ދުވަހުގެ ކުރިން، ކުރިޔަށް އޮތް ރައްޔިތުންގެ މަޖލީހުގެ މެންބަރުންގެ ޢަދަދު އީސީ އިން ކަނޑައަޅާނެ ކަމަށް ހަބީބު ވަނީ ވިދާޅުވެފައެވެ.
އަދި 2024 ގެ ރައްޔިތުންގެ މަޖިލީހުގެ މެންބަރުންގެ ޢަދަދަށް ބަދަލު އައުމަކީ އެކަށީގެންވާ ކަމެއް ކަމަށް ހަބީބު ވަނީ ފާހަގަކުރައްވާފައެވެ.
ދަ ޑިމޮކްރެޓްސް ސިޔާސީ ޕާޓީއެއްގެ ގޮތުގައި ރަޖިސްޓްރީ ވުމާއިއެކު ރައްޔިތުން މަޖިލީހަށް ވަނީ ބޮޑެތި ބަދަލުތަކެއް އައިސްފައެވެ.
އެގޮތުން ސަރުކާރުގެ މި ދައުރު ފެށުނީއްސުރެ ރައްޔިތުން މަޖިލީހުގެ މައިނޯރިޓީ ދަމަހައްޓަމުން އައި ޕީޕީއެމް ޕީއެންސީ ކޯލިޝަނުން ވަނީ މި މަޤާމް ގެއްލިފައެވެ.
އަދި 14 މެމްބަރުންނާއިއެކު މަޖިލީހުގައި ދެވަނަ އެންމެ ގިނަ މެމްބަރުން އައްޔަން ކޮށްފައިވާ ޕާޓީއަކީ މިހާރު ދަ ޑިމޮކްރެޓްސްއެވެ.
Advertisement
This content is created and paid for by advertisers and does not involve Voice Journalists
