ދިވެހިރާއްޖޭގެ އަމާންކަން ނަގާލުމަށް ކުރާ އެއްވެސް ކަމަކަށް ޖާގަ ނުދެއްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ. 

މ ދިއްގަރުގައި ބޭއްވި ރައީސް ޞާލިހުގެ ކެމްޕޭނު ޖަލްސާއެއްގައި ވާހަކަދައްކަވަމުން ރައީސް ޞާލިހު ވިދާޅުވީ 2018 ވަނަ އަހަރު ރައްޔިތުންނަށް ވީ އެންމެ ބޮޑު ވައުދަކީ ދިވެހިރާއްޖޭގައި އޮތް ބިރުވެރިކަން ނައްތާލާ އަމާންކަން ރައްޔިތުންނަށް ކަށަވަރުކޮށްދިނުމަށް ވީ ވއުދުކަމަށެވެ. 

އެ މަސައްކަތުގެ ތެރެއިން ރާއްޖޭގައި އޮތް ސިޔާސީ ހަލަބޮލިކަން ނައްތާލެވިއްޖެ ކަމަށާއި، ޝަރުއީ ދާއިރާއާއި މިނިވަން މުއައްސަސާތަކަށް އޮތް ނުފޫޒު ނައްތާލެވިއްޖެ ކަމަށެވެ. 

މިހާރު ޚިޔާލުފާޅުކޮށްގެން ވަޒީފާއިން ވަކިވާން ޖެހިދާނެކަމުގެ ބިރެއް ނޯންނާނެކަމަށާއި، ރާއްޖެއަށް ޒަމާނީ ޑިމޮކްރަސީ ގެނައުމަށް ކުރެވުނު މަސައްކަތުގެ ތެރެއިން އެކަށީގެންވާ ނަތީޖާތަކެއް ހާސިލްކޮށްދެވިފައިވާކަމަށް ރައީސް ޞާލިހު ވިދާޅުވި އެވެ. 

އެކަންކަން ފާހަގަކުރައްވާ ރައީސް ޞާލިހު ވިދާޅުވީ ރާއްޖެއަށް ފާއިތުވ 5 އަހަރު ގެެނެވުނު ބަދަލު އެގޮތުގައި ދެމެހެއްޓުން އޮތީ ރައްޔިތުންގެ އަތްމަތީގައި ކަމަށެވެ. އެއާއެކުވެސް މި ސަރުކާރުން އަމާންކަން ނަގާލަން ބަޔަކު ކުރާ އެއްވެސް ކަމަކަށް ޖާގަ ނުދެއްވާނެކަމަށް ރައީސް ޞާލިހު ވިދާޅުވި އެވެ. 

ރައީސް ޞާލިހު ވަނީ ރިޔާސީ އިންތިޚާބުގައި އެމަނިކުފާނާއި ވާދަވެރި ކެމްޕޭނެއް ކުރުމަށް އިދިކޮޅު ކެންޑިޑޭޓުންނަށް ގޮވާލައްވާފަ އެވެ. 

އެމަނިކުފާނު ވިދާޅުވީ އެމްޑީޕީއާއި އެމަނިކުފާނު ހުންނެވީ ވާދަކުރައްވަން ތައްޔާރަށް ކަމަށެވެ. އަދި ރިޔާސީ އިންތިޚާބު ބޮޑުތަނުން ކާމިޔާބުކުރައްވާނެ ކަމުގެ ފުރިހަމަ ޔަގީންކަން ވެސް އޮތް ކަމަށެވެ.