ހުޅުމާލޭގައި ލަގްޒަރީ ރެސިޑެންޝަލް އިމާރާތްތަކެއް ހެދުމަށް ފަސް ބިމެއް ވިއްކުމަށް ނިންމައި ބީލަމަށް ހުށަހެޅުމުގެ ފުރުސަތު އާބަންކޯ އިން ހުޅުވާލައިފިއެވެ.

އެގޮތުން އިއްޔެ އެ ކޯޕަރޭޝަނުން ކޮށްފައިވާ އިއުލާޏެއްގައި ބުނެފައިވަނީ ބީލަމަށް ޕްރޮޕޯޒަލް ހުށަހެޅުމުގެ ފުރުސަތު ހުޅުވާޅެވިފައި އޮންނާނީ 17 އޮގަސްޓްގެ 14:00 ގެ ނިޔަލަށް ކަމަށެވެ.

މިއާއިއެކު ބީލަމަށް ހުށަހަޅާއިރު ބީލަމުގެ ސެކިއުރިޓީ އާއި ބޭންކް ގެރެންޓީވެސް ހުށަހަޅަން ޖެހޭނެ ކަމަށް އާބަންކޯއިން ވަނީ ފާހަގަކޮށްފައެވެ.

Advertisement

މި އިމާރާތްތައް ހަދަން ވިއްކާ ފަސް ބިމުގެ ތެރޭގައި ހިމެނެނީ ހުޅުމާލެ ފެރީ ޓާމިނަލް ކުރިމަތީގައި އޮންނަ ދެ ބިމަކާއި ދިރާގު ހުޅުމާލެ އޮފީސް ކުރިމަތީގައި އޮންނަ ތިން ބިމެކެވެ. އެގޮތުން:

- ލޮޓް 10322: 25،660 އަކަފޫޓުގެ ބިމެއް

- ލޮޓް 11808: 24،961 އަކަފޫޓުގެ ބިމެއް

- ލޮޓް 11809: 24،652 އަކަފޫޓުގެ ބިމެއް

- ލޮޓް 11828: 20،727 އަކަފޫޓުގެ ބިމެއް

- ލޮޓް 11829: 23،229 އަކަފޫޓުގެ ބިމެއް

މި ބިންތަކުގައި އަޅައި ފްލެޓްތަކުގައި ފިޓްނަސް ސެންޓަރަކާއި ސްވިމިންގް ޕޫލް އަކާއި ކޮމިޔުނިޓީ ރޫމްއަކާއި ކުޑަ ކުދިންގެ ކުޅޭ ސަރަހައްދެއް ހުންނަސް ޖެހޭނެ ކަމަށް އަރބަންކޯއިން ވަނީ ބީލަމާއި އެއްކޮށް އާންމުކުރި މައުލޫމާތު ކަރުދާހުގައި ބުނެފައެވެ.

މިއާއިއެކު މި ބިންތަކުގައި ހަދަން ޖެހެނީ 2+1 (1،000 އަކަފޫޓް) އާއި 3+1 (1،300 އަކަފޫޓް) ކޮޓަރީގެ އެޕާޓްމަންޓްތަކެއް ކަމަށް ވެސް އާބަންކޯއިން ވަނީ ބުނެފައެވެ.

އަމިއްލަ ކުންފުނިތަކާ ހަވާލުކޮށްގެން އާބަންކޯ އިން މިހާރު ވެސް އަންނަނީ ހުޅުމާލޭގެ އެކި ތަންތަނުގައި ރެސިޑެންޝަލް އިމާރާތްތައް ހަދަމުންނެވެ.