ސަރުކާރުގެ "ބިންވެރިޔާ ސްކީމް"ގެ ދަށުން މާލެ ސަރަހައްދުން ދޫކުރި ގޯތި ލިބުމަށް ޝަރުތު ހަމަ ނުވާކަމަށް ޕްލޭނިންގ މިނިސްޓްރީން ކަނޑައެޅި މީހަކު، ގޯތި ލިބޭ އުސޫލުގައި "މާލޭ މީހާ" ޝަރުތު މާނަ ކުރާ ގޮތް ހާމަކޮށްދިނުމަށް އެދި ހައިކޯޓަށް ދުސްތޫރީ މައްސަލައެއް ހުށަހަޅައިފި އެވެ.
މި މައްސަލަ ހުށަހަޅާފައިވަނީ މި ސަރުކާރުގެ މިނިސްޓްރީ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީގެ އެގްޒެކެޓިވް ޑިރެކްޓަރުގެ މަގާމުން ވަކިކުރެވުނު ލަބީގު މުހައްމަދު މާހިދެވެ.
ލަބީގު ހައި ކޯޓަށް ހުށަހެޅި މައްސަލާގައި ބުނެފައިވާ ގޮތުގައި އޭނާއަށް ގޯތި ނުލިބޭނެ ކަމަށް ހައުސިން މިނިސްޓްރީން ބަޔާންކުރާ ސަބަބަކީ އޭނާ އަކީ "ކުރިން މާލެ ފިޔަވައި އެހެން ތަނެއްގައި ރަޖިސްޓްރީވެފައިވާ ފަރާތަކަށް ވެފައި، ތިޔަ ފަރާތުގެ މައިންބަފައިންގެ ތެރެއިން އެއްވެސް މީހެއް އުފަންވީއްސުރެން މާލެ ފިޔަވައި އެހެން ތަނެއްގައި ރަޖިސްޓްރީ ވެފައި ނުވާ ފަރާތެއް ގޮތުގައި މިނިސްޓްރީއަށް ސާބިތު ކުރެވިފައި ނުވާތީ" ކަމަށެވެ.
އެހެން ނަމަވެސް އެ އިބާރާތަކީ މާލެ ރައްޔިތެއް ކަން ބެލުމުގެ މިންގަނޑު ބަޔާންކޮށްފައިވަނީ އުސޫލުގައިވެސް ނުހިމެނޭ އިބާރާތެއް ކަން އޭނާ ފާހަގަކޮށްފައިވެއެވެ. އެހެންކަމުން އޭނާ އަށް ގޯތި ދިނުމަށް ޝަރުޠު ހަމަނުވާ ކަމަށް ސަރުކާރުން ކަނޑައަޅާފައިވަނީ ވުޖޫދުގައިވެސް ނެތް އިބާރާތެއް ބޭނުން ކޮށްގެން ކަމަށް ބުނެފައިވެއެވެ.
މާލެ ރައްޔިތެއް ކަން ބެލުމުގެ މިންގަނޑު ބަޔާންކޮށް ޕްލޭނިންގ މިނިސްޓްރީން އާއްމު ކުރި އުސޫލުގެ 11 ވަނަ މާއްދާގެ ހ. ގައި ވަނީ "އެ މީހެއްގެ މަންމަ ނުވަތަ ބައްޕައަކީ މާލެ ރައްޔިތަކަށް ވެފައި ސަރުކާރުން ހިންގާފައިވާ ސިޔާސަތެއްގެ ސަބަބުން ނުވަތަ ކަނޑައެޅިފައިވާ އުސޫލުގެ ސަބަބުން އެހެން ތަނެއްގައި ރަޖިސްޓްރީ ޖެހުމަށް ފަހު މިހާރު މާލޭގެ ރަޖިސްޓްރީގައިވާނަމަ އެ މީހަކު ބަލާނީ މާލޭގެ ރައްޔިތެއްގެ ކަމުގަ" އެވެ.
ކަން މިހެން ހުރުމުން، ދިވެހިރައްޔިތަކަށް ވީތީ އޭނާ އަށް ލިބެންޖެހޭ ހައްގުތަކަށް ޕްލޭނިންގ މިނިސްޓްރީން އަރައިގަނެފައިވާ ކަަމަށް މައްސަލާގައި ބުނެފައިވެއެވެ.
އެހެންކަމުން، ގޯތި ލިބުމަށް ޝަރުތު ހަމަނުވި ސަބަބުގެ ގޮތުގައި މިނިސްޓްރީން ދީފައިވާ ޖަވާބުގައި ހިމެނޭ އިބާރާތަކީ އުސޫލުގައި ނުހިމެނޭ އިބާރާތެއް ކަމުގައި ކަނޑައަޅައިދިނުމަށް އޭނާ ވަނީ އެދިފައެވެ. އަދި އެ އުސޫލު މަނާކޮށްދިނުމުގެ އިތުރަށް، އޭނާއަށް ގޯތި ނުލިބޭ ކަމަށް މިނިސްޓްރީން ކަނޑައަޅާފައިވަނީ އުސޫލާ ހިލާފަށް ކަމަށް ކަނޑައަޅައިދިނުމަށް ވެސް އޭގައި އެދިފައިވެ އެވެ.
އެ މައްސަލަ ބަލައިގަތުމާ މެދު ހައިކޯޓުން އަދި ގޮތެއް ނުނިންމަ އެވެ.
Advertisement
This content is created and paid for by advertisers and does not involve Voice Journalists
