ބޮޑުތިލަދުންމައްޗަށް ތަރައްގީގެ ބޮޑު ބަދަލެއް ގެންނާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހު މިފަދައިން ވިދާޅުވެފައިވަނީ އެމަނިކުފާނު ހއ އަތޮޅަށް ކުރައްވާ ކެމްޕޭނު ދަތުރުފުޅުގައި އެ އަތޮޅު އިހަވަންދޫގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.
ރައީސް ޞާލިހުގެ ވާހަކައިގައި ވަނީ ބޮޑުތިލަދުންމަތީގައި ހިންގެވުމަށް ވިސްނަވާ ތަރައްގީގެ ބިޔަ މަޝްރޫއުތަކަށް އަލިއަޅުވާަލައްވާފަ އެވެ.
"ބޮޑު ތިލަދުންމައްޗަށް ބޮޑު ބަދަލެއް އިރާދަކުރެއްވިޔާ އަޅުގަނޑުމެން ގެންނާނަން. ތަރައްގީގެ ބޮޑު ބަދަލެއް އަޅުގަނޑުމެން ގެންނާނަން. އެގޮތުން ހަނިމާދޫ އިންޓަނޭޝަނަލް އެއާޕޯޓާއި، ކުޅުދުއްފުށީ ޓާޝަރީ ހޮސްޕިޓަލާއި، ކުޅުދުއްފުށީ ކޮމާޝަލް ޕޯޓާއި، އިހަވަންދުއަށް މި އަންނަ ބޮޑު ބަދަލާއި، ދިއްދޫއަށް އެ އަންނަ ބޮޑު ބަދަލާއި، މިހެން ގޮސް ހޯރަފުށީ އެއާޕޯޓު މި ހުރިހާ އެއްޗެއް އެއްކޮށްލުމުން އަޅުގަނޑު މި ދަންނަވާ ތަސައްވަރު އަޅުގަނޑުހިތުން ތިބޭފުޅުންނަށް ފަހުމުވާނެ"
ރައީސް ޞާލިހު
ރައީސް ޞާލިހު ހއ އަތޮޅަށް ކުރައްވާ މި ދަތުރުފުޅުގައި އިހަވަންދޫއަށް ވަޑައިގެން އިހަވަންދޫގެ ޢުމްރާނީ ތަރައްޤީއަށް ސަރުކާރުން ކުރިޔަށްގެންދިޔަ ގިނަ މަޝްރޫޢުތަކެއް ވަނީ އިފްތިތާހުކޮށްދެއްވާފަ އެވެ.
އެގޮތުން ރައީސުލްޖުމްހޫރިއްޔާ ވަނީ އިހަވަންދޫގެ ބަނދަރާއި، ފެނަކަ އޮފީހާއި، އިހަވަންދޫ ސްކޫލުގެ މަލްޓިޕަރޕަސް ހޯލުގެ އިތުރުން އެރަށުގެ ކޮމިއުނިޓީ ސެންޓަރު ހުޅުއްވައިދެއްވާފައެވެ.
ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ ހއ އަތޮޅަކީ އިޤްތިޞާދީ ހަބަކަށް ހެދޭނެކަމަށެވެ. އަދި އެ އަތޮޅުގައި މިހާރު ކުރިއަށްދާ މަޝްރޫއުތަކާއެކު އެ ތަސައްވަރު ފުރިހަމަ ވެގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
