ޢިރާޤުގެ ބަޣްދާދުގައި ހުންނަ ސްވިޑިޝް އެމްބަސީ ކައިރީގައި މުޒާހަރާ ކުރަމުންދިޔަ މީހުން ސްވިޑިޝް އެމްބަސީއަށް ވަދެ އެއެމްބަސީގައި ރޯކޮށްލައިފިއެވެ.

ބަޣްދާދުގައި ހުންނަ ސްވިޑިޝް އެމްބަސީ ކައިރީގައި ކެނޑިނޭޅި  މުޒާހަރާ ކުރަމުން ގޮސްފައިވަނީ ސްވިޑެންގެ ސްޓޮކްހަމްގައި ހުންނަ އެންމެ ބޮޑު މިސްކިތުގެ ކުރިމަތީގައި، ސްވިޑެންގައި ދިރިއުޅޭ ޢިރާޤްގެ މީހެއްކަމަށްވާ  ސަލްވާން މޮމިކާ ކީރިތި ޤުރުއާނުގެ ކޮޕީއެއް އަންދާލުމާއި ގުޅިގެނެވެ.

ބަޣްދާދުގައި ހުންނަ ސްވިޑެންގެ އެމްބަސީގެ ކުރިމަތީގައި މުޒާހަރާކުރަމުން ދިޔަ މީހުން ޢިރާޤުގެ ޝީޢާ ޢިލްމުވެރިންނާއި، ޢިރާޤުގެ އިދިކޮޅު ސިޔާސީ ލީޑަރުންގެ ދިދަތަކާއި މުޒާހަރާގައި ބޭނުންކުރަމުންދިޔަ ބޯޑުތަކާއި އެކު ވަނީ އަޑުއުފުލުން ތައް ކުރިއަށް ގެންގޮސްފައެވެ.

Advertisement

ސްވިޑެންގެ ފޮރިންގ މިނިސްޓްރީ އިން ބުނެފައިވަނީ އެމްބަސީގެ ހުރިހާ މުވައްޒަފުންގެ ޙާލު ރަނގަޅުކަމަށެވެ. އަދި އެމިނިސްޓްރީ އިން ވަނީ ޢިރާޤުގެ ރައްޔިތުންގެ މިޢަމަލު ކުށްވެރިކޮށްފައެވެ.

ކީރިތި ޤުރުއާން އެންދުމާއި ގުޅިގެން ބަޣްދާދުގައި މުޒާހަރާ ކުރަމުންދާ ފަރާތްތަކުން ބުނެފައިވަނީ ކީރިތި ޤުރުއާނުގެ އިތުރު ކޮޕީއެއް އަންދާލައިފިނަމަ މިގޮތަށް މުޒާހަރާތައް ކުރިއަށް ގެންދާނެ ކަމަށްބުނެފައެވެ. އަދި ޢިރާޤު ސަރުކާރުން ސްވިޑިޝް އެމްބަސީ ބަންދު ނުކޮށްފިނަމަ އެމީހުން އެކަން ކުރާނެ ކަމަށް ބުނެފައިވެއެވެ.

މުޒާހަރާ ކުރާ މީހުން މިހެން ބުނެފައިވާއިރު ސްވިޑެންގެ ޕޮލިހުން ވަނީ، ސްޓްކްހޮމްގައި ހުންނަ ޢިރާޤްގެ އެމްބަސީ ކުރިމަތީގައި ޤުރުއާނުގެ ކޮޕީއެއް އަންދާލުމަށް ސަލްވާން އަސް ހުއްދަދީފައެވެ.

އަޟްޙާ ޢީދު ދުވަހު ސަލްވާން ޤުރުއާން އަންދާލުމާއި ގުޅިގެން މުސްލިމް ޤައުމުތަކުން ވަނީ އެކަން ކުށްވެރިކޮށް މުޒާހަރާ ކޮށްފައިވެއެވެ. އޭގެ ތެރޭގައި ޢިރާޤް، ތުރުކިޔޭ، ޔޫއޭއީ، ޖޯޑަން އަދި މޮރޮކޯވެސް ހިމެނެއެވެ.