ސްވިޑެންގައި ކީރިތި ޤުރުއާނަށް ހުރުމަތްތެރިކަން ކުޑަކުރަ މައްސަލަ ރާއްޖެއިން ކުށްވެރިކޮށްފިއެވެ.

ޚާރިޖީ ވުޒާރާއިން ނެރެފައިވާ ބަޔާނެއްގައި ބުނެފައިވަނީ ސްވިޑެންގައި ތަކުރާރުކޮށް ހިންގަމުން އަންނަ މި ޢަމަލު އެންމެ ހަރުކަށި ޢިބާރާތުން ކުށްވެރިކުރާ ކަމަށެވެ. މިއީ ދުނިޔޭގެ އެކި ކަންކޮޅުތަކުގައި ދިރިއުޅޭ އެތައް މިލިޔަން މުސްލިމުންގެ އިޙްސާސްތަކާ ކުޅެ، އެމީހުންނަށް ސްވިޑްންއިން އެއްވެސް އިޙްތިރާމެއް ނުކުރާކަން ހާމަވާކަމެއްކަމަށް ދޭހަވާގޮތަށް ދިވެހި ސަރުކާރުންވަނީ ނުރުހުން ފާޅުކޮށްފައެވެ.

 އަދި މި ޢަމަލަކީ ޚިޔާލު ފާޅުކުރުމުގެ މިނިވަންކަމުގެ ތެރެއިން ހިންގި ކަމެއްކަމަށް ބުނެ ނިންމާ ނުލެވޭނެކަމަށް އެބަޔާނުގައި ބުނެފައިވެއެވެ. އަދި މިއީ ދީނަށް ފުރައްސާރަކުރުމުގެ ޢަމަލެއްކަމަށްވެސް ދިވެހި ސަރުކާރުން ދެކޭ ކަމަށް އެބަޔާނުގައި ބުނެފައިވެއެވެ. މިފަދަ ޢަމަލުތަކަކީ އެއިން އެއްވެސް ފައިދާއެއް ނުނުކުންނާނޭކަމެއްކަމަށާއި އަދި އޭގެ ސަބަބުން ބައިނަލްއަޤުވާމީ އެއްބައިވަންތަކަމުގެ އަސާސްތައް ނެތިގެންގޮސް ސުލްޙަޔަށް ބުރޫއެރުން ނޫންކަމެއް ނުވާނެކަމަށްވެސް ދިވެހިސަރުކާރުން ދެކޭ ކަމަށް ޚާރިޖީ ވުޒާރާގެ ބަޔާނުގައި ބުނެފައިވެއެވެ.

އެ ބަޔާނުގައި ބައިނަލްއަޤްވާމީ ދުނިޔެއަށް ރާއްޖެއިން ގޮވާލައިފައިވަނީ އިސްލާމް ދީނާ ދެކޮޅަށް ހިންގާ މިފަދަ ހަރުކަށި އަމަލުތައް ހުއްޓުވުމަށެވެ.

 ޚާރިޖީ ވުޒާރާއިން މި ބަޔާން ނެރެފައިމިވަނީ މިދިޔަ ބުރާސްފަތި ދުވަހު ސްވިޑެންގެ ސްޓޮކްހޮމްގައި ހުންނަ ޢިރާޤުގެ އެމްބަސީ ކުރިމަތީގައި ސަލްވާން މޮމިކާ ނަމަކަށް ކިޔާ މީހަކު ކީރިތި ޤުރުއާނުގައި ފައިންޖަހައި އެއަށް އިޚްތިރާމް ކުޑަކޮށްފައިވާ ދަނޑިވަޅެއްގައެވެ.

މީގެ ކުރިންވެސް ސަލްވާން ވަނީ ކީރިތި ޤުރުއާނުގެ ކޮޕީއެއް އަންދައިލައިފައެވެ. އެފަހަރު އޭނާ އެކަންކޮށްފައިވަނީ ސްޓޮކްހަމްގައި ހުންނަ އެންމެ ބޮޑު މިސްކިތުގެ ކުރިމަތީގައެވެ. އޭނަގެ މި ޢަމަލުތައް އިސްލާމީ ޤައުމުތަކުން އަންނަނީ ކުށްވެރިކުރަމުންނެވެ.

ސަލްވާން މޮމިކާއަކީ ސްވިޑެންއަށް ނިސްބަތްވާ ޢިރާޤުގެ ރެފިޔުޖީއެކެވެ.

ސްވިޑެންގައި ހިންގަމުންދާ މި ޢަމަލުތައް މީގެ ކުރިންވެސް ރާއްޖެއިން ވަނީ ކުށްވެރިކޮށްފައެވެ.