ޕޯސްޓް މެދުވެރިކޮށް އެތެރެކުރަން އުޅުނު ގިނަ ޢަދަދެއްގެ މަސްތުވާތަކެތި ކަސްޓަމްސްއިން އަތުލައިގެންފިއެވެ.

ކަސްޓަމްސް އިން މިއަދު ނެރުނު ނޫސްބަޔާނެއްގައި ބުނެފައިވަނީ މަސްތުވާތަކެތީގެ ބާވަތެއް ކަމަށްވާ މެފެޑްރޯންގެ ދެ ކިލޯ އަތުލައިގަތީ މި މަހު ހަތެއްގައި ކަމަށެވެ. އެ ތަކެތި ފެނުނީ އިނގިރޭސިވިލާތުން ރާއްޖެ ގެނައި ޕެކޭޖެއްގެ ތެރޭގައި ޝައްކުކުރެވޭ ޒާތުގެ ބާވަތެއް ހުރުމުން އެ ތަކެތި ބަލައި ފާސްކުރުމުން ކަމަށް ކަސްޓަމްސް އިން ބުނެފައިވެއެވެ.

ބަލައި ފާސްކުރި ޕެކޭޖުގެ ތެރޭގައި އޮތް ދެ ޕެކެޓުގައި ހުރި އެއްޗެހި ފުރަތަމަ މަރުހަލާގައި ޓެސްޓުކުރުމުން، މެފެޑްރޯން އަށް ޕޮޒިޓިވްވި ކަމަށް އެ ބަޔާނުގައި ބުނެފައިވެއެވެ.

ކަސްޓަމްސްގެ ބަޔާނުގައިވަނީ އެ ތަކެތީގެ މަގުމަތީ އަގު 3.6 މިލިއަން ރުފިޔާއަށް އަރާ ކަމަށެވެ.

އެ މައްސަލަ އިތުރަށް ތަހުޤީޤު ކުރުމަށް، އަތުލައިގަތް މަސްތުވާތަކެތި ފުލުހުންނާ ހަވާލުކޮށްފައިވާ ކަމަށް ވެސް ކަސްޓަމްސް އިން ބުނެފައިވެއެވެ.

މީގެ ތިން މަސް ކުރިން ވެސް ޕޯސްޓް މެދުވެރިކޮށް ރާއްޖެ އެތެރެކުރަން އުޅުނު 1.8 ކިލޯގެ މަސްތުވާތަކެތި ކަސްޓަމްސް އިން އަތުލައިގަތެވެ.