އެމްޑީޕީގެ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދަކީ ޕްރައިމަރީއިން ބަލިވެވަޑައިގެންނެވުމުން، ކާމިޔާބުވި ކެނޑިޑޭޓުގެ ފަހަތްޕުޅަށް ނާރަން އެކި ބަހަނާ ދެއްކެވި ބޭފުޅެއް ކަމަށާ އެމަނިކުފާނު ރައީސް ޞާލިހު ގެ އުމުރުފުޅާ ސިއްހަތާއި ގުޅޭގޮތުން ވާހަކަދައްކަވާ ދަރަޖައަށް ވެއްޓުނީމާ ހައިރާން ނުވާ ކަމަށް ރައީސް އޮފީހުގެ ތަރުޖަމާނު މުޙައްމަދު މިއުވާން ވިދާޅުވެއްޖެއެވެ.

މިއުވާން މިހެން ވިދާޅުވީ ރައީސް ޞާލިޙާއި ގުޅުވައިގެން ރައީސް ނަޝީދު ރޭގެ ޖަލްސާގައި ދެއްކެވި ވާހަކަފުޅުތަކަކާއި ގުޅިގެނެވެ.

ރޭގެ ޖަލްސާގައި ރައީސް ނަޝީދުވަނީ ރައީސް ޞާލިޙްގެ ސިއްޚީ ޙާލުކޮޅާއި ގުޅުވައި ވާހަކަތަކެއް ދައްކަވާފައެވެ.

ރައީސް ނަޝީދު ވިދާޅުވީ ރައީސް ޞާލިޙް މިހާރު ހުންނަވަނީ "މުށެއް ގެ ބޭސް" ފަރިއްކުޅުވައިގެން ކަމަށެވެ. އަދި ވެރިކަމަށް ކުރެއްވުމަށް އެމަނިކުފާނުގެ ސިއްޙީ ހާލުކޮޅު ތަން ނުދެއްވާ ކަމަށްވެސް ނަޝީދު ވިދާޅުވިއެވެ.

މީގެއިތުރުން އެ ޙާލަތުގައި ޤައުމު ބިނާ ކުރުމުގެ އާ ވިސްނުންތަކާއި ޕްލޭނުތައް ނުނެރެވޭނެކަމަށްވެސް އެމަނިކުފާނު ވިދާޅުވިއެވެ.

ހަމަމިޔާއި އެކު ރައީސް ނަޝީދު  ވިދާޅުވީ މި ޙާލަތުގައި ވެރިކަން ކުރަން އުޅުއްވުމަށް ވުރެ ރަނގަޅުވާނީ ޒުވާން ބޭފުޅުންނަށް ފުރުސަތު ދެއްވުންކަމަށެވެ. އަދި ނަޝީދު ވިދާޅުވީ އޭނާ އެ ދައްކަވާ ވާހަކަފުޅާއި ރައީސް ޞާލިހުވެސް އެއްބަސްވެވަޑައިގަންނަވާނެ ކަމަށެވެ.

ރައީސް ނަޝީދުގެ މިވާހަކަތަކާއި ގުޅިގެން ރައީސް އޮފީހުގެ ތަރުޖަމާނު ވިދާޅުވީ މިއީ ޕްރައިމަރީއިން ބަލިވީމާ، ކާމިޔާބުކުރި ކެންޑިޑޭޓުގެ ފަހަތަށް ނާރަން އެކިފާޑުގެ ތާކުންތާކުނުޖެހޭ ބަހަނާ ދެއްކެވި ބޭފުޅަކު އެއް ގޮތް ނެތިއްޔާ އަނެއް ގޮތަކުން ފަތުރަމުންދާ ފިތުނައިގެ އިތުރު ބޮޅެއް ކަމަށެވެ. އަދި އެ ދަރަޖައަށް އެފަދަ ބޭފުޅަކު ވެއްޓުނީތީ ހިތާމަކުރާ ކަމަށާއި އެކަމާއި ހައިރާން ނުވާ ކަމަށެވެ.

މިއުވާންގެ އިތުރުން ރައީސް އޮފީހުގެ ޗީފް އޮފް ސްޓާފް ޢަލީ ޒާހިރުވެސް ވަނީ ރައީސް ނަޝީދުގެ ވާހަކަފުޅުތަކަށް ރައްދުދެއްވާފައެވެ.