އިލެކްޝަންސް ކޮމިޝަންގެ ރައީސްގެ އިތުބާރު ނެތްކަމުގެ މައްސަލައެއް އެ ކޮމިޝަނަށް ވައްދައި، އެ މައްސަލަ ފާސްކޮށްފައިވާ ކަމުގެ މައުލޫމާތު ކޮމިޝަންގެ އެއްވެސް މެންބަރަކު އަންގާފައި ނުވާ ކަމަށް އެ ކޮމިޝަނުގެ ރައީސް ފުއާދު ތައުފީގު ވިދާޅުވެއްޖެއެވެ. 

އިލެކްޝަންސް ކޮމިޝަނުގެ ފަސް މެމްބަރުންގެ ތެރެއިން ހަތަރު މެމްބަރުން ތިބި ޖަލްސާއެއްގައި ފުއާދުގެ އިތުބާރު ނެތް ކަމުގެ މައްސަލަ އެއް ހުށަހަޅައި، އެއާ އެއްކޮޅަށް ތިން މެމްބަރުން ވޯޓު ދެއްވިކަމަަށް ބައެއް ނޫސްތަކުން ވަނީ ރިޕޯޓް ކޮށްފަ އެވެ. އެ ވޯޓު ނެގީ މި ހިނގާ ޖުލައި 18، ގައި ކަމަށްވެސް އެ ނޫސްތަކުގައި ބުނެފައި ވެއެވެ. 

އެކަމާއި ގުޅިގެން 'ވޮއިސް' އަށް މައުލޫމާތު ދެއްވަމުން ފުއާދު ވިދާޅުވީ އެފަދަ އެއްވެސް މައްސަލައެއް ފާސްކޮށްފައިވާ ކަމަށް އެއްވެސް މެންބަރަކު އަންގަވާފައި ނުވާކަމަށެވެ. 

"އެއްވެސް މެންބަރަކު އަޅުގަނޑަށް އަންގާފައެއް ނުވޭ. އެންގިޔަސް އެއީ މާނައެއް އޮތް ކަމަކަށް ނުވާނެ" ފުއާދު ވިދާޅުވި އެވެ. 

އިލެކްޝަންސް ކޮމިޝަނުގެ ގާނޫނު އޮންނަ ގޮތުން އިތުބާރު ނެތްކަމުގެ މައްސަލައެއް ހުށަހަޅައިގެން މެމްބަރަކު ނުވަތަ ރައީސް އަދި ނައިބު ރައީސް ވަކި ކުރެވޭނެ އުސޫލެއް ބުނެފައެއް ނޯވެ އެވެ.

އެ ކޮމިޝަނުގެ ގާނޫނުގެ 10 ވަނަ މާއްދާގެ ށ. ގައި ބުނެފައި އޮންނަނީ "ކޮމިޝަނުގެ ރައީސްގެ މަގާމު ނުވަތަ ނައިބު ރައީސްގެ މަގާމު ހުސްވެއްޖެ ކަމަށް ބެލޭނީ، ކޮމިޝަނުގެ މެމްބަރުކަމުގެ މަގާމު ހުސްވެއްޖެ ކަމަށް ބެލެވޭ ހާލަތެއް ކުރިމަތިވުމުން" ނުވަތަ "ރައީސާއި ނައިބު ރައީސް އާއި ދެމީހުންކުރެ މީހަކު އެމީހެއްގެ މަގާމުން އިސްތިއުފާދިނުމުން" ކަމަށެވެ.

ގާނޫނުގައި ބުނެފައިވާ ގޮތުން ކޮމިޝަނުގެ މެމްބަރުން ވަކި ކުރެވޭނީ ރައްޔިތުންގެ މަޖިލީހުންނެވެ.