"ޗެސްޓަރ ވިމެންސް ފުޓްސެލް 2023" މާދަމާ ފެށުމަށް ހަމަޖެހިފައިވާ ކަމަށް އެ މުބާރާތް ކުރިއަށް ގެންދާ ޗެސްޓަރ އިން ބުނެފިއެވެ.
މި މުބާރާތަކީ ނޫނު މަނަދޫ ޖަމިއްޔާއެއް ކަމަށްވާ ޗެސްޓަރގެ ފަރާތުން ކޮންމެ އަހަރެއްގެ މިނިވަން ދުވަހާއި ގުޅިގެން ބާއްވަމުން އަންނަ އަންހެން ފުޓްސެލް މުބާރާތެކެވެ.
ޗެސްޓަރ އިން ބުނީ މުބާރާތް ބޭއްވުމުގެ އެއްމެ ފަހުގެ ތައްޔާރީތައް ވަމުންދާކަމަށެވެ.
މި މުބާރާތަކީ މުޅި ނޫނު އަތޮޅަށް ހުޅުވާލެވިގެން އަންހެން ކަނބަލުންނަށް ޚާއްސަކުރެވިގެން އެ އަތޮޅުގައި ބޭއްވޭ އެއްމެ ބޮޑު މުބާރާތެވެ. މި މުބާރާތުގެ މަޤުސަދަކީ ނޫނު އަތޮޅުގެ އަންހެން ކަނބަލުންގެ މެދުގައި ފުޓްސެލް ލޯބި އިތުރުކޮށް ދުޅަހެޔޮ ސިއްހަތެއް ހޯދައިދިނުމާއި ރާއްޖޭގެ ފެންވަރުގެ މޮޅެތިކުޅުންތެރިންތަކެއް ބިނާކުރުމުގެ އިތުރުން އަތޮޅުގެ ރަށްތަކުގެ މެދުގައި އެކުވެރިކަން އާލާކުރުމެވެ.
މި މުބާރާތުގައި ނޫނު އަތޮޅު ރަށްތަކާއި ރިސޯޓެއްގެ އިތުރުން ރާއްޖޭގެ އަންހެން ޤައުމީ ޓީމްގެ ކުޅުންތެރިން ކުޅޭކަން އެއީ މުބާރާތް އިތުރަށް ފޯރިގަދަވެ ވާދަވެރިވެގެންދާ ކަމެއްކަމުގައި ޗެސްޓަރއިން ބުނެފައިވެއެވެ.
މި މުބާރާތް ކުރިޔަށްދާނީ ޖުލައި 26ން އޮގަސްޓް 4 އަށް މަނަދޫ ފުޓްސެލް ދަނޑުގައެވެ. އަދި މި މުބާރާތުގެ މެޗްތައް ޗެސްޓަރ ފޭސްބުކް ޕޭޖުން ލައިވްކޮށް ފެންނާނެ ކަމަށް އެޖަމިއްޔާއިން ބުނެއެވެ.
Advertisement
This content is created and paid for by advertisers and does not involve Voice Journalists
