އަންނަ ހަފްތާއިން ފެށިގެން ރ އުނގޫފާރު ހޮސްޕިޓަލުގައި ގާއިމް ކޮށްފައިވާ ނަފްސާނީ ބަލިތަކާއި ގުޅޭ ޔުނިޓުން ފަރުވާދޭން ފެށުމަށް ހަމަޖެހިއްޖެއެވެ.

ނަފްސާނީ ބައްޔަށް ފަރުވާ ދިނުމަށް ޚާއްސަ ޔުނިޓުގެ ޚިދުމަތް ފެށުމަށް ހަމަޖެހިފައިވާއިރު  މިހާރުވެސް އެ ހޮސްޕިޓަލުން މި ޚިދުމަތްދެއެވެ. އެކަމަށް ޚާއްސަ ޑިޕާޓްމަންޓާއެކު ޚިދުމަތް ހޯދުމަށާއި ޚިދުމަތް ފޯރުވައިދިނުމަށް ލުއިފަސޭހަވެގެންދާނެ ކަމަށް އެހޮސްޕިޓަލުން ބުނެފައިވެއެވެ.

ޢިމާރާތުގެ މަސައްކަތްތަކާއި ބޭނުންވާ ސާމާނާއެކު ޖުމުލަ 5.7 މިލިޔަން ރުފިޔާ ޚަރަދުކޮށްގެން ތަރައްޤީކޮށްފައިވާ މިޑިޕާޓުމަންޓްގެ މަސައްކަތް ނިންމާ ޚިދުމަތް ދިނުމަށް މިހާރު ވަނީ ތައްޔާރުވެފައެވެ. އަދި އަންނަ ހަފްތާގެ ތެރޭގައި އެ ޔުނިޓުން ޚިދުމަތް ފަށާނެކަމަށް އުނގޫފާރު ހޮސްޕިޓަލުން ބުނެއެވެ.

އެ ޔުނިޓް ފަރުމާކޮށްފައިވަނީ ބަލިމީހުން އެޑްމިޓްކޮށްގެންވެސް ފަރުވާދެވޭނެގޮތަށެވެ. އަދި ނަފްސާނީ ބަލި ތަޙައްމަލު ކުރަމުން އަންނަ މީހުންގެ ހާލަތު ދެނެގަތުމަށް ބޭނުންވާނެ ސާމާނުވެސް ހިމެނޭގޮތަށެވެ.

ވަކި ޚާއްސަ ޔުނިޓަކުން ޚިދުމަތްދޭން ފެށުމާއެކު ނަފްސާނީ ބަލި ތަޙައްމަލު ކުރަމުންދާ މީހުންނަށް ފޯރުވައިދޭ ޚިދުމަތުގެ ފެންވަރު މަތިވެގެންދާނެއެވެ. ރާއްޖޭގައި ނަފްސާނީ ބައްޔަށް ފަރުވާ ހޯދާ މީހުންގެ ޢަދަދު އަންނަނީ ދުވަހެއް ދުވަހަކަށް އިތުރުވަމުންނެވެ.