ދިވެހިރާއްޖެއަށް އިޤްތިޞާދީ މިނިވަންކަން ގެނެސްދެއްވި ލީޑަރު އޮތީ، ޖަލަށް ލާފައިކަމަށް ކުރީގެ އިކޮނޮމިކް މިނިސްޓަރު އަދި މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ.
ބުދަ ދުވަހުގެ ރޭ އިދިކޮޅުން ކުރިއަށް ގެންދިޔަ އިހުތިޖާޖުގައި ބައިވެރިންނާއި މުޚާތަބުކުރައްވާ ވާހަކަދައްކަވަމުން ސައީދު ވިދާޅުވީ ގައުމުގެ މިނިވަންކަމަށްޓަކައި މަސައްކަތް ކުރާ ކޮންމެ ލީޑަރަކަށް ވެސް ބޮޑެތި އަނިޔާތަކާއި ގޮންޖެހުންތަކާއި ކުރިމަތިލައްވަން ޖެހިވަޑައިގެންނެވި ކަމަށެވެ.
ދިވެހިރާއްޖެ މިއަދު މި ދެކޭ ހަޤީގީ މިނިވަންކަން ހޯއްދަވާ ދެއްވީ ކުރީގެ ރައީސް އަލް މަރުޙޫމު އިބްރާހިމް ނާސިރު ކަމަށާއި، އެމަނިކުފާނަށް ވެސް ބޮޑެތި އަނިޔާތަކާއި ގޮންޖެހުންތަކާއި ކުރިމަތިލައްވަން ޖެހިވަޑައިގެންނެވިކަން ސައީދު ފާހަގަކުރެއްވި އެވެ.
އެ ވާހަކައާއި ގުޅުވާ ސައީދު ވިދާޅުވީ ދިވެހިރާއްޖޭގެ ފުދުންތެރިކަން އިތުރުކޮށް އިޤްތިޞާދީގޮތުން ރާއްޖެއަކީ މިނިވަން ގައުމަކަށް ހެދުމަށް މަސައްކަތްޕުޅު ކުރެއްވި ލީޑަރަކީ ރައީސް ޔާމީން ކަމަށެވެ.
އެމަނިކުފާނަކީ އިޤްތިޞާދީ ގޮތުން ރާއްޖެ މިނިވަންކޮށްދެއްވި ލީޑަރުކަމަށާއި، އެމަނިކުފާނުގެ ވެރިކަން ބަދަލުވި ހިސާބުން ޖަލަށް ލައި، ޖަލުގައި 900 އެތައް ދުވަހެއް ހޭދަކުރެއްވުމުން، މިނިވަންކަމަށްޓަކައި މަސައްކަތް ކުރައްވާ ލީޑަރުންނަށް އަނިޔާދޭކަން ސާފުވެގެންދާކަމަށް ސައީދު ވިދާޅުވި އެވެ.
ޕީއެންސީގެ ނައިބު ރައީސް ސައީދު
"ރާއްޖޭގެ މިނިވަންކަން ދިފާއުކުރަން މަސައްކަތް ކުރި ކޮންމެ ލީޑަރަކު އޭގެ ތެރެއިން އަތްފުނާ އަޅައިގެން ބަލާލީމަ އަޅުގަނޑުމެންނަށް މި ފެންނަނީ މަރުހޫމު އިބްރާހިމް ނާސިރުގެ މަސައްކަތްޕުޅު. އަދި ރައީސް ޔާމިނުގެ 5 އަހަރު ކުރެއްވި ހިތްމަތްތެރި މިންނެތް، ވަރުގަދަ މަސައްކަތްޕުޅު. މި ރާއްޖެ އަޅުވެތި ކުރުމަށްޓަކައި، ރާއްޖެ މިނިވަންކުރި ލީޑަރަކު، ރާއްޖޭގެ އިޤްތިޞާދު މިނިވަންކުރި ލީޑަރަކު.. ހަރުދަނާ ލީޑަރަކު 900 އެތައް ވަންދެން އަނިޔާވެރިކަމާއެކު ޖަލުގައި ބަހައްޓާފައި އެ ހުރީ"
ޕީއެންސީގެ ނައިބު ރައީސް ސައީދު
އިދިކޮޅުން ފާހަގަކުރާ ގޮތުގައި ރައީސް ޔާމީންގެ ވެރިކަމުގައި ހިންގެވި މަޝްރޫއުތަކާއި، ނެންގެވި ލޯނުތަކުން ކުރެއްވި ކަންކަމަކީ ދިވެހިރާއްޖޭގެ "އިޤްތިޞާދީ ސިޔާދަތު" ކަށަވަރުކުރުމަށް ކޮށްދެއްވި ކަންކަމެވެ.
އެގޮތުން އެމަނިކުފާނުގެ ޒައާމަތުގައި ހިންގެވި މަޝްރޫއުތަކުގެ ސަބަބުން އިޤްތިޞާދު ފުޅާވެގެން ގޮސްފައިވާ ކަމަށާއި، އެއީ އަވައްޓެރި ބައެއް ޤައުމުތަކަށް "ހަޖަމު ކޮށްލަން" އެހާ ފަސޭހަކަމަކަށް ނުވިކަން އިދިކޮޅުން ފާހަގަކުރެއެވެ.
މި ވެރިކަން ބަދަލުކުރީ ވެސް ދިވެހިރާއްޖޭގެ އިޤްތިޞާދު ކުރިއަރަމުންދާތީ އަވައްޓެރި ބައެއް ގައުމުތަކަށް އެކަން ހަޖަމުނުވެގެން އެމީހުންގެ ވެސް އެހީތެރިކަމާއެކުގައި ކަމަށް އިދިކޮޅުން ތަކުރާރުކޮށް ތުހުމަތުތައް ކުރަމުންދާއިރު، މިއަދުގެ ހާލަތު ބަދަލުކުރުމަށް އަންނަ ސެޕްޓަމްބަރު މަހުގެ 9 ގައި ލާ ވޯޓުން ރައީސް ޔާމީން އަނބުރާ ވެރިކަމަށް ގެނައުމަށް އިދިކޮޅުން ވަނީ ގޮވާލާފަ އެވެ.
Advertisement
This content is created and paid for by advertisers and does not involve Voice Journalists
