ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުގެ ކިރިޔާވެސް ލަދުހަޔާތެއްހުރިނަމަ މޫނުބުރުގާ އެޅި އުޚުތުން އިޙްތިޖާޖްކުރަން ނުޖެހުނީސް ކަމަށް ދީނީ ޢިލްމުވެރިޔާ ޝެއިޚް އަބްދުالله ސައުދާން ވިދާޅުވެއްޖެއެވެ.

ދާދިފަހުން، ތައުލީމުގެ ގާނޫނުގެ ދަށުން އާއްމުކުރި މުދައްރިސުންގެ ސުލޫކީ މިންގަނޑުގެ އުސޫލުގެ މައިގަނޑު 7 އަސާސް ކަމުގައި ބުނެފައިވާ އަސާސް ތަކުގެ ތެރެއިން، ފަންނީ ގުޅުމާއި ރަސްމީ ގުޅުން ދެމެހެއްޓުމަށް ކޮންމެ މުދައްރިސަކު ވެސް ކުރަންޖެހޭ ކަން ކަމުގެ ތެރޭގައި ފާހަގަކޮށްފައިވާ ކަންކަމުގެ ތެރެއިން (ބ) ގައި ބަޔާން ކޮށްފައިވާ ގޮތުން ޓީޗަރާއި އެކުގައި މަސައްކަތްކުރާ އެހެން މުވައްޒަފުންނާއި ބެލެނިވެރީންނާ މުޢާމަލާތުކުރުމުގައި އެ ޓީޗަރަކު ހުންނަންވާނީ ތިމާއަކީ ކާކުކަން އެނގޭގޮތަށް، ސްޓާފް ކާޑު އަޅައިގެން ކަމަށެވެ. 

އަދި އޭގެ (ޅ) ގައި ވާގޮތުން އުނގަންނައިދިނުމުގެ ހަރަކާތްތައް ކުރިއަށްގެންދާ އިރު، އަދި ދަރިވަރުންނާ މުޢާމަލާތް ކުރާއިރު އެ ޓީޗަރަކު ހުންނަންވާނީ ތިމާއަކީ ކާކުކަން އެނގޭ ގޮތަށް ކަމަށްވެސް ބުނެފައިވެއެވެ. 

މިމާއްދާ އާއި ގުޅިގެން މޫނުބުރުގާ އަޅާ ކަނބަލުންގެ ދިފާޢުގައި އިއްޔެ އުޚުތުން ވަނީ އިހްތިޖާޖަށް ނުކުމެފައެވެ. އެ އިޙްތިޖާޖްގެ ބައިވެރިން ވަނީ މޫނު ބުރުގާ އަޅައިގެން ތަޢުލީމީ ދާއިރާގައި ހަރަކާތްތެރިވުމާއި ތައުލީމް ދިނުމަށް ހުރަސް އެޅިދާނެ ގޮތަށް ދެމާނަ ދޭހަވާ ގޮތަށް އޮތް މާއްދާ އުވާލައި ސާފު ނައްސުން މޫނު ބުރުގާ އަޅައިގެން ތައުލީމީ ދާއިރާގައި ހަރަކާތްތެރި ވެވޭނެ ކަމާއި ތަޢުލީމް ދެވޭނެކަމަށް އުސޫލުގައި ބަޔާންކުރުމެވެ.

އަދި މޫނު ބުރުގާ އަޅާތީ، ހައްގުތަކުން މަހްރޫމް ނުކުރުމަށްވެސް އިހްތިޖާޖުގެ ބައިވެރިން ވަނީ ގޮވާލާފައެވެ. 

މިކަމާއި ގުޅިގެން ޝެއިޚް ސައުދާން ކުރެއްވި ޓްވީޓެއްގައި ވިދާޅުވީ ފަރަގުތައް ނަންތާލާނަން ކަމަށްބުނެ ވީ ވަޢުދުގައި ކޮޅުފައިންޖަހާ ނިގާބު އެޅި އުޚްތުންގެ ޙައްޤުތައް ނިގުޅައިގަތް ބަޔަކަށް ދެވަނަ ދައުރެއް ނުދެވޭނެ ކަމަށެވެ.

އަދި މި ސަރުކާރުގެ ކިރިޔާވެސް ލަދުހަޔާތެއް ހުރި ނަމަ މޫނުބުރުގާ އެޅި ކަނބަލުން އިހްތިޖާޖުކުރާކަށް ނުޖެހުނީސް ކަމަށްވެސް ޝެއިޚް ސައުދާން ވިދާޅުވިއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް އައި އިރު ވީ އެންމެ މުހިންމު އެއް ވައުދަކީ މޫނު ބުރުގާ އަޅައިގެން ތިބި ނަމަވެސް ވަޒީފާ އަދާކުރެވޭނެ ކަމަށް ބުނެ ވީ ވައުދެވެ. 

އެހެންނަމަވެސް، ވެރިކަމަށް އައުމަށްފަހު، މޫނުބުރުގާ އެޅި ޓީޗަރުންނަށް އެކި ކަހަލަ ދަތިތައް އެޑިއުކޭޝަން މިނިސްޓްރީން ފޯރުކުރަމުންދާ ކަމަށް ބައެއް ޓީޗަރުން ބުނެއެވެ. އެގޮތުން، ދަރިވަރުންނަށް ކިޔަވައިދޭ ގަޑީގައި މޫނު ބުރުގާ ނޭޅޭނެ ކަމަށް އެ ޓީޗަރުންނަށް އަންގާ ކަމުގެ ތުހުމަތު މީގެ ކުރިންވެސް ކުރެވިފައި އޮތް އިރު، މި އުސޫލުގައި މިހެން އޮތުމުން، އެކަން ކުރަން ބުނެ ނުކުރުމުން އެ ޓީޗަރަކާއިމެދު ފިޔަވަޅުވެސް އެޅޭނެއެވެ. 

މިފަދަ ސަބަބު ތަކާއި ހުރެ، މޫނު ބުރުގާ އަކީ މިސަރުކާރުން ވެރިކަމަށް އަންނަން ވެގެން ދީނަށް ލޯބިކުރާ މީހުންގެ ލޮލުގައި އެޅުވި އަނދުނެއް ކަމުގައި މިހާރު ގިނަ ބަޔަކު ދެކެއެވެ.