ހަލަބޮލިކަން ނައްތާލައި އަމާންކަމާއިއެކު ކުރިއަށްދެވޭނީ ގިނަ ޕާޓީތަކެއް އެކުލެވޭ ސަރުކާރެއް އުފައްދައިގެން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރޭ ފުވައްމުލަކުގައި ބޭއްވި ރިޔާސީ ކެމްޕޭނުގެ ޖަލްސާގައި ވާހަކަ ދައްކަވަމުންނެވެ.
"ސަރުކާރުގެ އެންމެ އެއް މުހިންމު އަމާޒަކީ މީހުން ބިނާ ކުރުން، ތަޢުލީމީ އައު ޖީލެއް ބިނާކުރުން، ޤައުމާއިގެން ކުރިއަށްދާނެ ވިސްނުން ތޫނު ޒަމާނީ ވިސްނުމުގެ ޒުވާނުންތަކެއް އުފެއްދުން، އެގޮތުން ހިލޭ ޑިގްރީ އާއި ސްކޮލަރޝިޕާއި ލޯނުގެ ފުރުސަތު ހުޅުވާލީ" ރައީސް ޞާލިޙް ވިދާޅުވިއެވެ.
ރައީސްގެ ވާހަކަފުޅުގައި އިތުރަށް ވިދާޅުވީ މިހާތަނަށް އައިރުގައި 18000 އަށްވުރެ ގިނަކުދިން ހިލޭ ޑިގްރީގެ ޕްރޮގްރާމުގައި ބައިވެރިވެ ކިޔަވަމުންދާކަމަށެވެ. އަދި އޭގެ ތެރެއިން 7000 ކުދިން މިހާރުވަނީ ކިޔަވައި ނިންމައިފައި ކަމަށާއި އޭގެ ތެރޭގައި ފުވައްމުލަކުގެ 700 އެތައް ކުދންނެއް ހިމެނޭ ކަމަށް ރައީސް ވިދާޅުވިއެވެ. އަދި އޭގެ ތެރެއިން 300 ކުދިން މިހާރު ވަނީ ޑިގްރީ ނިންމައިފައިކަމަށްވެސް ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ކުރިއަށް މިއޮތް ފަސް އަހަރުވެސް މިކަންކަން ކުރެވޭނީ ހަމަޖެހުން ޤާއިމް ކޮށްގެން، ހަލަބޮލިކަން ރާއްޖެއިން ނައްތާލައިގެންކަމަށެވެ. އަދި އެމަނިކުފާނު ދެކިވަޑައިގަންނަވާ ގޮތުގައި އެކަން ކުރެވޭނީ ގިނަ ޕާޓީތަކެއް އެކުލެވޭ ސަރުކާރެއް އުފައްދައިގެން ކަމަށެވެ. މިފަސްއަހަރު އެމަނިކުފާނު މިތަޖްރިބާ ކުރެއްވީ އެކަންތައް ކަމަށް ރައީސް ވިދާޅުވިއެވެ.
"ކޯލިޝަނުން ސަރުކާރެއް އުފައްދައި އެތަފާތު ޙިޔާލުތަކުގައި ގޮތް ނިނިމުމުން މަސައްކަތް ކުރީމާ ރައްޔިތުންނަށް އެކަމުގެ ފައިދާ ވާނީ ފަހަރުގައި އަޅުގަނޑަށް އޭގެ އެންމެ ފައިދާ ނުލިބިދާނެ، އެހެންނަމަވެސް އެހިޔާލުތައް އަޑުއަހައި އޭގެ އެންމެ ރަނގަޅުގޮތް ނިންމައި ކަންކުރީމާ އެކަމުގެ ފައިދާ ވާނީ ރައްޔިތުންނަށް، މިއަދުވެސް އެހެންވެ އަޅުގަނޑުމެން ނުކުމެ މިތިބީ ކޯލިޝަނަކާއި އެކީގައި"
ރައީސް އިބްރާހިމް މުޙައްމަދު ޞާލިޙް
ރިޔާސީ އިންތިޚާބަށް ކެމްޕޭނު ކުރެއްވުމަށް ފުވައްމުލަކުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ދެން އަންނަ ދައުރެއްގައި ފުވައްމުލަކަށް ކޮށްދެއްވާނެ ކަންކަން ރައީސް ވަނީ ވިދާޅުވެދެއްވައިފައެވެ.
Advertisement
This content is created and paid for by advertisers and does not involve Voice Journalists
