މިވޭތުވެދިޔަ 15 އަހަރުގައި ފޯރުކޮށްނުދެވި ހުރި އަސާސީ ޚިދްމަތް ރައްޔިތުނަށް ފޯރުކޮށްދިނުމަށް މިފަސް އަހަރު މަސައްކަތް ކުރެވުނު ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ އެމަނިކުފާނު ށަވިޔަންޏަށް ކުރައްވަމުންގެންދަވާ ކެމްޕޭނު ދަތުރުފުޅުގައި އެއަތޮޅު ޅައިމަގަށް ވަޑައިގެން އެރަށު ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުންނެވެ.
"ކުރިއަށް އޮތް ރިޔާސީ އިންތިޚާބުގައި ތަފާތު ކެނޑިޑޭޓުން ވާދަކުރައްވާ، ތިބޭފުޅުން ކައިރިއަށްވެސް ވަޑައިގަންނަވާނެ، ވަޢުދުތައްވެސް ވާނެ، އެހެންނަމަވެސް މިވޭތުވެދިޔަ ތަނުގައި ނުކުރެވި ހުރި ކިތަންމެކަމެއް މިފަސް އަހަރުތެރޭގައި އަޅުގަނޑުމެން މިދަނީ ކުރަމުން، ތިޔަބޭފުޅުންނަށް މިސަރުކާރު ޓެސްޓު ކުރެވިފައިވާނީ މިހާރު، ވީ ވަޢުދާއި އެއްގޮތައް ކަންކުރަމުންދިޔަކަން" ރައީސް ޞާލިޙް ވިދާޅުވިއެވެ.
ރައީސް އިތުރަށް ވިދާޅުވީ ކޮވިޑްތެރޭގައި ދަތި އުނދަގޫ ދެއަހަރު ދިމާވި ކަމަށާއި، އެހެންނަމަވެސް މިދިޔަ ފަސްއަހަރަކީ ކުރީގެ ފަނަރަ އަހަރުތެރޭގައި ފޯރުކޮށްނުދެވި ހުރި އެތައް އަސާސީ ޚިދްމަތެއް ފޯރުކޮށްދެވިފައިވާ ފަސް އަހަރު ކަމަށް ވެސް ވިދާޅުވިއެވެ.
އަސާސީ ޚިދްމަތްތަކާއި ގުޅިގެން ޅައިމަގުގައި އިތުރަށް ވާނެ ވަޢުދެއް ނޯންނާނެ ކަމަށް ރައީސް ވިދާޅުވިއެވެ. އަދި އެފަދަ ވައުދެއް ވެވަޑައިގަންނަވާނަމަ ހައްދަވަން ޖެހޭނީ ދޮގު ކަމަށްވެސް އެމަނިކުފާނު ވިދާޅުވިއެވެ.
ށަވިޔަންޏަށް ރައީސް ޞާލިޙް މިކުރައްވާ ދަތުރުފުޅުގައި ސަރުކާރުގެ ބައެއް ވަޒީރުންނާއި އެމްޑީއޭ އަދި ޢަދާލަތު ޕާޓީގެ ބައެއް އިސް ލީޑަރުން ބައިވެރިވެވަޑައިގަންނަވައެވެ.
Advertisement
This content is created and paid for by advertisers and does not involve Voice Journalists
