ޖުމްހޫރީ ޕާޓީގެ ލީޑަރ އަދި ރިޔާސީ ކެންޑިޑޭޓް ގާސިމް އިބްރާހިމް ގެ ސްޕެޝަލް އެޑްވައިޒަރ އަކަށް، އެ ޕާޓީގެ ކުރީގެ ރައީސް އަލީ ވަހީދު ހަމަޖައްސައިފި އެވެ.

މިއަދު ބޭއްވި ޖުމްހޫރީ ޕާޓީގެ 159 ވަނަ ކައުންސިލް ބައްދަލުވުމުގައި ގާސިމްގެ ސްޕެޝަލް އެޑްވައިޒަރު ކަމަށް ތިން ބޭފުޅަކު ވަނީ އައްޔަނު ކޮށްފައެވެ. އޭގެ ތެރޭގައި އަލީ ވަހީދު ވެސް ހިމެނޭކަމަށް އެ ޕާޓީން ކޮށްފައިވާ ޓުވީޓެއް ގައި ހާމަކޮށްފަ އެވެ. އަލީ ވަހީދުގެ އިތުރުން ގާސިމްގެ އެޑްވައިޒަރުންނަށް ހަމަޖައްސާފައިވަނީ އިސްމާއިލް ޝުޖާ އަދި އިބްރާހިމް ޝުޖާއުއެވެ. 

އަލީ ވަހީދު މީގެ ކުރިން ވެސް ގާސިމްގެ ހާއްސަ ޕޮލިޓިކަލް އެޑްވައިޒަރެއްގެ ގޮތުގައި މަސައްކަތް ކުރިއެވެ. އެއަށްފަހު، އެ އެ ޕާޓީގެ ރައީސްކަން އޭނާ ކޮށްފައިވާއިރު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ކޯލިޝަން ސަރުކާރުގެ ޓޫރިޒަމް މިނިސްޓްރ ކަމަށްވެސް އޭނާ އައްޔަނު ކުރެވުނީ ޖޭޕީގެ ސްލޮޓެއްގަ އެވެ.

އެހެންނަމަވެސް، އެ މަގާމުގައި ހުރެގެން ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާ ކުރި ކަމުގެ ތުހުމަތުގައި އޭނާގެ މައްޗަށް ދައުވާ އުފުލުމާއި އެކު، އިނގިރޭސި ވިލާތަށް އަރުވާލެވިގެންވެސް ގިނަ ދުވަސްތަކެއް ވަންދެން އޭނާ ހުއްޓެވެ.

އެއަށްފަހު، އެ މައްސަލާގައި ދައުވާތައް ސާބިތު ކުރަން ހެކިބަސް ދޭން ތިބި ގިނަ ބަޔަކު މިހާރު ހެކިބަސް ދޭން ބޭނުންނުވާތީ އެ މައްސަލަތައް ސާބިތުކުރެވޭނެ ގޮތެއް ނެތް ކަމަށް ބުނެ ޕީޖީ އޮފީހުން މައްސަލަ އަނބުރާ ގެންދިޔުމުން އަލީ ވަހީދު ވަނީ ރާއްޖެ އައިސްފައެވެ.

އަލީ ވަހީދު ރާއްޖެ އައުމުން ގާސިމް އާއި ޖުމްހޫރީ ޕާޓީގެ ފަރާތުން އޭނާއަށް ވަނީ ހޫނު މަރުހަބާއެއް ކިޔާފައެވެ.