ޕީޕީއެމްގެ ނާއިބު ރައީސް އަދި މާލެ ސިޓީ ކައުންސިލްގެ މޭޔަރު ޑރ މުހައްމަދު މުއިއްޒު، އެ ޕާޓީ ދޫކުރައްވައި، ޕީއެންސީއަށް ސޮއިކުރައްވައިފި އެވެ. މިކަން ޕީޕީއެމުން ވަނީ އިއުލާން ކުރައްވައިފަ އެވެ. 

މުޢިއްޒު ޕީއެންސީއަށް ސޮއިކުރައްވައިފައި މިވަނީ، ޕީއެންސީން ރިޔާސީ ކެންޑިޑޭޓެއް ނެރެން ނިންމައި، ޕްރައިމަރީގައި ވާދަކުރުމަށް ނަން ހުށަހެޅުމަށް ފުރުސަތު ހުޅުވާލާފައިވާ ދަނޑިވަޅެއްގައި ކަން ފާހަގަކޮށްލަންޖެހެ އެވެ. 

ރިޔާސީ އިންތިހާބުގައި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ވާދަކުރުމަށް އެ ޕާޓީގެ 3/2023 މަޝްވަރާ މަޖިލީހުގައި ބައިވެރިވި 47 މެމްބަރުންގެ ތެރެއިން 44 މެމްބަރުންގެ އަގްލަބިއްޔަތުން މިއަދު ވަނީ ފާސްކޮށްފައެވެ. 

އެއާއެކު ޕީއެންސީން ވަނީ، ރިޔާސީ ޓިކެޓަށް ޝައުގުވެރިވެލައްވާ ފަރާތްތަކުން އެ ޕާޓީގެ ރައީސްއަށް އެޑްރެސްކޮށް ޝައުގުވެރިކަން ފާޅުކުރައްވައި ލިޔުމެއް، މިއަދުގެ 14:00 ގެ ކުރިން ފޮނުވުމަށް އެދިފައެވެ. 

މައުލޫމާތު ލިބިފައިވާ ގޮތުގައި، ޕީއެންސީގެ ފަރާތުން މި ޕްރައިމަރީގައި މުއިއްޒު ވާދަކުރައްވާނެއެވެ. އަދި މުޢިއްޒު ގެ އިތުރުން މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވެސް ވާދަކުރައްވާނެ ކަމަށް އަޑުތައް ވަނީ ފެތުރިފަ އެވެ. 

އިދިކޮޅު ކޯލިޝަނުން މީގެ ކުރިން ބުނެފައިވާ ގޮތުގައި، ޕީއެންސީ އިން ކެންޑިޑޭޓަކު ނެރުމާއި މެދު ގޮތެއް ނިންމުމުގެ އިޚްތިޔާރު، ޕީޕީއެމް/ޕީއެންސީގެ ލީޑަރ ރައީސް ޔާމީން އަށް ދިނުމަށް ނިންމާފައިވާ ކަމަށާ، ޕީޕީއެމް/ޕީއެންސީ ގެ މުހިންމު ބޮޑެތި ނިންމުންތައް ނިންމުމުގައި ރައީސް ޔާމީންގެ ލަފާ އާއި މަޝްވަރާ ހޯދާނެ ކަމަށެވެ. އެހެންކަމުން އެކަން ކުރިއަށް ދަނީ ރައީސް ޔާމީންގެ ލަފާއާއި އެކުގައި ކަމަށް އެ ކޯލިޝަނުން ބުނެއެވެ. 

ރައީސް ޔާމީން މިވަގުތު ހުންނެވީ، ވ. އާރަށް ކުއްޔަށް ދިނުމާއި ގުޅޭ މައްސަލާގައި އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައެވެ. އެހެންކަމުން އެމަނިކުފާނުގެ ކެންޑިޑެސީ އާއި މެދު ގިނަ ސުވާލު ތަކެއް ވަނީ އުފެދިފައެވެ.