ޖުމްހޫރީ ޕާޓީގެ ރިޔާސީ ކެންޑިޑޭޓުގެ ރަނިންގމޭޓަކަށް ކުރީގެ ރައީސް ޑރ މުޙައްމަދު ވަހީދު ހަމަޖެއްސިކަމަށް ބުނާ ވާހަކަ އެމަނިކުފާނު ދޮގުކުރައްވައިފިއެވެ.

އޮންލައިން ނޫހެއްގައި ރައީސް ވަޙީދު ޤާސިމްގެ ރަނިންގމޭޓަކަށް ހަމަޖެއްސިކަމަށް ބުނެ ލިޔެފައިވާ ލިޔުމެއް ޓުވިޓަރގައި ޙިއްސާ ކުރައްވަމުން ޑރ ވަޙީދު ވިދާޅުވެފައިވަނީ  އެއީ އެއްވެސް އަސާސެއް އޮތް ވާހަކައެއް ނޫން ކަމަށެވެ.

ރައީސް މުޙައްމަދު ނަޝީދުގެ ވެރިކަމުގައި އެމަނިކުފާނުގެ ނައިބެއްގެ ގޮތުގައި ހުންނަވައި، ރައީސް ނަޝީދު އިސްތިއުފާ ދެއްވުމުން ރާއްޖޭގެ ވެރިކަމާއި ހަވާލުވެވަޑައިގެންނެވި ޑރ ވަޙީދަކީ މިހާރުގެ އިދިކޮޅު އެންމެ ބޮޑު ޕާޓީ ޕީޕީއެމްގެ އިސްސަފުން ފެންނަ ބޭފުޅެކެވެ.

Advertisement

އިންތިޚާބަށް ނަންހުށައެޅުމުގެ ވަގުތު ކުޑަތަންވެފައި ވާއިރު މިހާރު ރަނިންގމޭޓެއް ކަނޑައަޅައި އިޢްލާނު ނުކޮށްވަނީ ޖޭޕީގެ އިތުރުން މިނިވަން ކެންޑިޑޭޓުންގެ ގޮތުގައި ވަދަކުރައްވަ ފާރިސް މައުމޫން އަދި ޢުމަރު ނަސީރެވެ.

ރައީސް އިބްރާހިމް މުހައްމަދު ޞާލިޙްގެ ރަނިންގމޭޓެއްގެ ގޮތުގައި އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވަނީ ހަމަޖައްސައިފައެވެ.

އަދި ޕީއެންސީގެ ރިޔާސީ ކެނޑިޑޭޓު ޑރ މުހައްމަދު މުޢިއްޒުގެ ރަނިންގމޭޓަކަށް ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް (ސެންބެ)ވަނީ  ހަމަޖައްސައިފައެވެ.

އެމްއެންޕީގެ ރިޔާސީ ކެންޑިޑޭޓް މުޙައްމަދު ނާޒިމްގެ ރަނިންގމޭޓަކަށް ހަމަޖައްސައިފައިވަނީ  އައްޑޫ ސިޓީއަށް ނިސްބަތްވާ ބޭފުޅެއްކަމަށްވާ ޑރ އަޙްމަދު ޢަދީލް ނަސީރެވެ.