ޑްރޯން ބޭނުންކޮށްގެން ރަށްރަށުގެ ލެބޯޓަރީތަކަށް ތަކެތި ފޯރުކޮށްދިނުމުގެ ހިދުމަތަކީ މި އަހަރު ފެށުމަށް ހަމަޖެހިފައި އޮތް ކަމެއް ކަމަށް އެސްޓީއޯ ގެ ކުރީގެ އެމްޑީ އަދި ޑިމޮކްރެޓްސް ގެ ރަނިންމޭޓް ހުސައިން އަމްރު ވިދާޅުވެއްޖެއެވެ. 

އެމްޑީޕީގެ އާ ސަރުކާރެއްގައި، ޑްރޯން ބޭނުންކޮށްގެން ރަށްރަށުގެ ލެބޯޓަރީތަކަށް ތަކެތި ފޯރުކޮށްދިނުމުގެ ހިދުމަތް ފަށާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވުމާއި ގުޅިގެން އަމްރު ކުރެއްވި ޓްވީޓެއްގައި ވިދާޅުވީ، ޑްރޯން ބޭނުން ކޮށްގެން ބެހާއި ލެބޯޓަރީ ސާމާނު ފޯރުކޮށްދިނުމަކީ މިއަހަރު ތެރޭގައި ފަށަން ރާވާފައި އޮތް ކަމެއް ކަމަށެވެ. 

ބޭހާއި ލެބޯޓަރީ ތަކެތި ފޯރުކޮށްދިނުމަށް ބޭނުން ކުރާނެ ޑްރޯންގެ ފޮޓޯއެއް އިންސްޓަގްރާމް ގައި ހިއްސާ ކުރައްވައި، މިދިޔަ އަހަރުގެ ޖަނަވަރީ މަހު އަމްރު އިންސްޓަގްރާމް ގައި ކޮށްފައިވާ ޕޯސްޓެއްގެ ފޮޓޯއާއި އެކު ކުރި އެ ޓުވީޓުގައި އޭނާ ވަނީ، މިދިޔަ އަހަރު ތެރޭގައި އެ ކަމަށް ޕްލޭން ހެދި, ޑްރޯން ހޯދި، އެކަން ސަރުކާރުގެ އެކި ފަރާތްތަކާއި ހިއްސާވެސް ކުރެވުނު ކަަމަށެވެ. އެހެންކަމުން ރައީސް ޞާލިހު ވެވަޑައިގެންނެވީ ވައުދެއްތޯ އޭނާ ވަނީ ސުވާލު ކުރައްވާފައެވެ. 

ކުރިއަށް އޮތް ރިޔާސީ އިންތިހާބަށް ކެމްޕޭން ކުރެއްވުމަށް މިހާރު ކުރައްވާ ދަތުރުފުޅުގައި، މިއަދު ގދ. މަޑަވެލީގައި ވާހަކަފުޅު ދައްކަވަމުން ރައީސް ވަނީ، އެމްޑީޕީގެ އާ ސަރުކާރުގެ ބައެއް ސިއްހީ ސިޔާސަތުތައް އިއުލާންކުރައްވާފަ އެވެ.

ސިއްހީ ދާއިރާއަށް ބޮޑު ބަދަލެއް ގެންނާނެ ކަމަށް ވައުދުވެވަޑައިގަންނަވަމުން ރައީސް ވިދާޅުވި ގޮތުގައި، ގައުމީ ސިއްހީ ސިޔާސަތުގެ ބިންގާ ކަމުގައި ހަދާނީ "ބަލިވުމުގެ ކުރިން ބަލިން ސަލާމަތްވުމެ"ވެ.

ސިއްހީ ދާއިރާއަށް ތައާރަފްކުރައްވާނެ އާ ހިދުމަތެއްގެ ގޮތުގައި އެ މަނިކުފާނު އެންމެ ފުރަތަމަ ވިދާޅުވި އެއް ކަމަކީ، ޑްރޯން ބޭނުންކޮށްގެން ލެބޯޓަރީތަކަށް ސަޕްލައި ނުވަތަ ތަކެތި ފޯރުކޮށްދިނުމެވެ. ރާއްޖޭގައި އަދި ރަސްމީކޮށް ދޭން ނުފަށާ މި ހިދުމަތް، ގދ. އަތޮޅުގައި މިހާރު ޓެސްޓުކޮށްފައިވާނެކަން އެ މަނިކުފާނު ފާހަގަކުރެއްވި އެވެ.