ދަރަނިތައް ދެއްކުމަށް ދިވެހި ސަރުކާރުން އެޅި ހަރުދަނާ ފިޔަވަޅުތަކާއެކު ގައުމުގެ މާލީ ގޮންޖެހުންތަކަށް އޮތް ރިސްކު ކުޑަވުމާ ގުޅިގެން ދުނިޔޭގެ މަޝްހޫރު ކްރެޑިޓް ރޭޓިން އެޖެންސީ "މޫޑީޒް" އިން ދިވެހިރާއްޖެއަށް ދީފައިވާ ރޭޓިން މަތިކޮށްފިއެވެ.

މޫޑީޒް އިން މިއަދު އާންމުކުރި އެންމެ ފަހުގެ ވަޒަންކުރުންތަކުގައިވާ ގޮތުން، ރާއްޖޭގެ ސޮވްރިން ކްރެޑިޓް ރޭޓިން ވަނީ CAA2 އިން CAA1 އަށް މަތިކޮށްފައެވެ. އަދި ރާއްޖޭގެ އިގުތިސާދީ އަދި މާލީ ހާލަތު އެއްވަރެއްގައި ހިފެހެއްޓިފައިވާ ކަމަށް ބަލައި، އިގުތިސާދީ އައުޓްލުކް ވަނީ "ސްޓޭބަލް" ހާލަތެއްގެ ގޮތުގައި ކަނޑައަޅާފައެވެ.

މި ބަދަލާ ގުޅިގެން ފިނޭންސް މިނިސްޓްރީން ބުނީ، މިއީ މިއަހަރުގެ ތެރޭގައި ސަރުކާރުން ގިނަ އަދަދެއްގެ ބޮޑެތި ދަރަނިތައް ދައްކައި ހަލާސްކުރުމަށް ކުރި ބުރަ މަސައްކަތުގެ ނަތީޖާ ކަމަށެވެ. އެގޮތުން، މި އަހަރުގެ އޭޕްރީލް މަހު ދައްކަންޖެހުނު 500 މިލިއަން ޑޮލަރުގެ ސުކޫކާއި، 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ ވަނީ އެއްކޮށް ދައްކައި ނިންމާފައެވެ. މީގެ އިތުރުން މެއި އަދި ސެޕްޓެމްބަރު މަހުގެ ތެރޭގައި ޖުމްލަ 100 މިލިއަން ޑޮލަރުގެ ޓީ-ބިލް ދައްކައި ހަލާސްކޮށްފައިވާކަންވެސް އެ މިނިސްޓްރީން ފާހަގަކުރިއެވެ.

ފިނޭންސް މިނިސްޓްރީން އިތުރަށް ފާހަގަކުރި ގޮތުގައި، 100 މިލިއަން ޑޮލަރުގެ ޔޫރޯބޮންޑެއް ދެއްކުމުގެ މުއްދަތު 2031 ވަނަ އަހަރާ ހަމައަށް ފަސްކުރެވިގެން ދިޔުމަކީ، ކުރިއަށް އޮތް އަހަރުތަކުގައި ދަރަނި އަދާކުރުމަށް ސަރުކާރަށް ކުރިމަތިވާން އޮތް ޕްރެޝަރު ވަރަށް ބޮޑަށް ލުއިވެގެންދިޔަ ކަމެކެވެ.

ސަރުކާރުން ބޭރު ފައިސާގެ އާމްދަނީ އިތުރުކުރުމަށް އަޅަމުންދާ އިސްލާހީ ފިޔަވަޅުތަކާއެކު، ރާއްޖޭގެ މާލީ ހާލަތު ދެމެހެއްޓެނިވި ގޮތެއްގައި ކުރިއަށް ގެންދެވޭނެ ކަމުގެ އިތުބާރު ބޭރު ދުނިޔޭގައި ބޮޑުވެފައިވާކަން މޫޑީޒްގެ މި ނިންމުމުން ހާމަވާ ކަމަށްވެސް ފިނޭންސް މިނިސްޓްރީން ވަނީ ބުނެފައެވެ.