ސައުދީ އަރަބިއްޔާގެ ދެ އެއާޕޯޓަކަށް ހޫތީ ޖަމާއަތުން ދިން ހަމަލާތައް ހަރުކަށި އިބާރާތުން ކުށްވެރިކޮށް، މި ދަނޑިވަޅުގައި ސައުދީއާ އެކު ސާބިތުކަމާ އެކު ދެމިތިބޭނެ ކަމުގެ ޔަގީންކަން ދިވެހި ސަރުކާރުން ދީފި އެވެ.
މި މަހުގެ ހަ ވަނަ ދުވަހާއި ހަތް ވަނަ ދުވަހު ހޫތީން ވަނީ އަބްހާ އިންޓަނޭޝަނަލް އެއާޕޯޓާއި ވެރިރަށް ރިޔާޒުގެ ކިންގް ހާލިދު އިންޓަނޭޝަނަލް އެއާޕޯޓަށް ހަމަލާ ދީފަ އެވެ. އެ ހަމަލާތަކުގެ ސަބަބުން ފުރާނަ ގެއްލި، ގިނަ ބަޔަކު ޒަހަމްވެ، އެއާޕޯޓުގެ ވަސީލަތްތަކަށް ވެސް ބޮޑެތި ގެއްލުންތައް ލިބިފައިވާ ކަމަށް ސައުދީން ރިޕޯޓުކޮށްފައިވެއެވެ.
ދިވެހި ސަރުކާރުން ވަނީ މި ހަމަލާތަކަކީ ސައުދީ އަރަބިއްޔާގެ މިނިވަންކަމާއި އިސްތިގުލާލަށް އަމާޒުކޮށް ދީފައިވާ ހަމަލާތަކެއް ކަމުގައި ސިފަކޮށްފަ އެވެ. ހަމައެހެންމެ، ސަރަހައްދީ ހަމަޖެހުމާއި ރައްކާތެރިކަމަށް ބުރޫ އެރުވުމުގެ ބޭނުމުގައި ދީފައިވާ ހަމަލާތަކެއް ކަމަށް ވެސް ބަޔާނުގައި ވެ އެވެ.
ހަމަލާތަކުގައި ފުރާނަ ގެއްލުނު މީހުންގެ އާއިލާތަކަށް ދިވެހި ސަރުކާރުން ވަނީ ތައުޒިޔާ ފޮނުވާފަ އެވެ. އަދި ޒަހަމްވި މީހުންނަށް އަވަސް ޝިފާއަކަށް އެދިފައިވެ އެވެ.
ހާރިޖީ ވުޒާރާގެ ބަޔާނުގައި އިތުރަށް ބުނީ، ދިވެހި ސަރުކާރާއި ރައްޔިތުން ސައުދީ ސަރުކާރާއި ރައްޔިތުންނާ އެކު ސާބިތުކަމާ އެކު ދެމިތިބި ކަމަށެވެ. އޭގެ އިތުރުން، ސައުދީގެ ސިޔާދަތާއި އިސްތިގުލާލު ހިމާޔަތްކޮށް، ސަރަހައްދުގައި ރައްކާތެރިކަމާއި ހަމަޖެހުން ދެމެހެއްޓުމަށް އެ ގައުމުން އަޅުއްވާ ފިޔަވަޅުތަކަށް ރާއްޖެއިން ފުރިހަމައަށް ތާއީދު ކުރާނެ ކަމަށް ވެސް ބުނެފައިވެ އެވެ.
ސައުދީ މަދަނީ ވައިގެ ދަތުރުފަތުރާ ބެހޭ އިދާރާއިން ހާމަކޮށްފައިވާ ގޮތުގައި، ކިންގް ހާލިދު އިންޓަނޭޝަނަލް އެއާޕޯޓަށް ދިން ހަމަލާގައި އެކަކު މަރުވެ، އަށް މީހުން ޒަހަމްވެފައިވެއެވެ. އަބްހާ އެއާޕޯޓަށް އަމާޒުކުރި ހަމަލާގައި ދެ މީހުން މަރުވެ، 28 މީހުން ޒަހަމްވެފައިވެ އެވެ.
މި ދެ ހަމަލާގައި ޖުމްލަ ތިން މީހުން މަރުވެ، 36 މީހުންނަށް އެކިވަރުގެ އަނިޔާ ލިބިފައިވެ އެވެ.
Advertisement
This content is created and paid for by advertisers and does not involve Voice Journalists
