ތެލުގެ އަގު ބޮޑުވަމުންދާ މައްސަލައިގައި ރައްޔިތުންނަށް ލުޔެއް ހޯދައިދިނުމުގެ ގޮތުން، ގޫގުލް މެޕްސް މެދުވެރިކޮށް ޕެޓްރޯލާއި ޑީސަލް އެންމެ އަގުހެޔޮކޮށް ވިއްކާ ތަންތަނުގެ މައުލޫމާތު ހޯދޭނެ އިންތިޒާމް މިއަދުން ފެށިގެން އިނގިރޭސިވިލާތުން ހަމަޖައްސައިފިއެވެ.

އެ ގައުމުގެ ބޮޑުވަޒީރު އޭންޑީ ބާންހަމް އެކްސްގައި ކުރެއްވި ޕޯސްޓެއްގައި ވިދާޅުވީ، ތެލުގެ އަގާ މެދު ރައްޔިތުން ކަންބޮޑުވާކަން އެމަނިކުފާނަށް އެނގިވަޑައިގަންނަވާ ކަމަށެވެ. ތެޔޮ އަޅަން ގޮސް ޕަމްޕުގެ ނަންބަރުތައް މައްޗަށް އަރައިގެންދާ މަންޒަރު ފެނި، ތެލަށް ބޮޑު ހަރަދެއް ކުރަން ޖެހޭކަން އެމަނިކްފާނު ފާހަގަކުރެއްވިއެވެ.

ބާންހަމް ފާހަގަކުރެއްވި ގޮތުގައި، އެކިއެކި ސަބަބުތަކާހެދި ތެލުގެ އަގު މައްޗަށްގޮސް، އޭގެ ބުރަ ސީދާ އާއިލާތަކަށް ތަހައްމަލުކުރަން ޖެހިފައިވާ ކަމަށެވެ.

މި ބަދަލާ ގުޅިގެން މިއަދުން ފެށިގެން ގޫގުލް މެޕްސް މެދުވެރިކޮށް ޕެޓްރޯލާއި ޑީސެލް ވިއްކާ އަގުތައް ބެލޭނެ ކަމަށާއި، ކައިރި ސްޓޭޝަންތައް އަޅައިކިޔައި، ތެޔޮ އެޅުމުގެ ކުރިން އެންމެ ހެޔޮ އަގެއް ލިބޭ ތަން ދެނެގަނެވޭނެ ކަމަށް ބާންހަމް ވިދާޅުވިއެވެ.

މި ފީޗާ ތައާރަފުކުރީ ތެލުގެ އަގު ބޮޑުވުމުގެ ސަބަބުން އިނގިރޭސިވިލާތުގެ ރައްޔިތުންނަށް ކުރިމަތިވެފައިވާ ދިރިއުޅުމުގެ ހަރަދު ބޮޑުވުމާއި ގުޅިގެންކަމަށް އެޤައުމުގެ ސަރުކާރުން ބުނެއެވެ.