ރައްޔިތުންނަށް ހުވަފެން ދައްކާނެ ބޭފުޅަކަށް ވެ ވަޑައިނުގަންނަވާނެ ކަމަށާއި، ވީ ވައުދުތައް ފުއްދަމުން ގޮސްފައިވާތަން ރައްޔިތުންނަށް ދައްކާދެއްވާފައި ވާނެކަމަށް ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ. 

ރައީސް ޞާލިހު މިފަދައިން ވިދާޅުވެފައި ވަނީ ގދ އަތޮޅަށް ކުރައްވާ ކެމްޕޭނު ދަތުރުފުޅުގައި، އެ އަތޮޅުގެ ފަރެސްމާތޮޑާގައި ބޭއްވި ޖަލްސާއެއްގައި ވާހަކަދައްކަވަމުން ނެވެ. 

އެގޮތުން ރައީސް ޞާލިހު ވިދާޅުވީ އެމަނިކުފާނު ވެރިކަމާއި ހަވާލުވެވަޑައިގެންނެވި އިރު ގައުމު އޮތީ ދުރު ރާސްތާ ޕްލޭނެއްގެ ތެރެއިން ހައްލުކުރަން ޖެހޭ ގިނަ ކަންކަމާއި ކުރިމަތިލާން ޖެހިފައި ކަމަށެވެ. 

Advertisement

ވެރިކަމުގެ ފުރަތަމަ ދައުރުގައި ކުރައްވާފައިވަނީ އެ މަސައްކަތްކަން ރައީސް ޞާލިހު ފާހަގަކުރެއްވި އެވެ. 

އެ ވާހަކައާއި ގުޅުވާ ރައީސް ޞާލިހު ވިދާޅުވީ އެމަނިކުފާނު ދެވަނަ ދައުރަކަށް ކުރިމަތިލެއްވީ ދުރު ރާސްތާ ޕްލޭނަކާއި އެކުގައި ކަމަށާއި، އެކަމަށް ބޭނުންވާ ސިޔާސަތުތައް ވެސް މިހާރު އެކުލަވާލާފައިވާނެ ކަމަށެވެ. އަދި އެކަންކަން އެމަނިކުފާނުގެ ކެމްޕޭނު ޖަލްސާތަކުގައި ގެންދަވަނީ ރައްޔިތުންނަށް ހާމަކޮށްދެއްވަމުން ކަމަށް ރައީސް ޞާލިހު ވިދާޅުވި އެވެ. 

އެކަން ފާހަގަކުރައްވާ ރައީސް ޞާލިހު ވިދާޅުވީ އެމަނިކުފާނަކީ ރައްޔިތުންނަށް ހުވަފެންދައްކާ ވައުދު ނުފުއްދާ ބޭފުޅަކަށް ވެވަޑައި ނުގަންނަވާނެކަން މި ދައުރުގައި ވެސް ކޮށްދެއްވާފައިވާ ކަންކަމުން ރައްޔިތުން ކަށަވަރުކުރާނެ ކަމަށެވެ.

ފަރެސްމާތޮޑާގައި ރައީސް ޞާލިހު ދެއްކެވި ވާހަކަފުޅު އަމާޒުކުރެއްވީ މަސްވެރިކަމުގެ ސިނާއަތަށެވެ. އެމަނިކުފާނު ވިދާޅުވި ގޮތުގައި އެ ސިނާއަތް ކުރިއެރުވޭނީ ވަރަށް ދުރުރާސްތާ ޕްލޭނެއްގެ ތެރެއިން ނެވެ. 

އެ މަސައްކަތް ސަރުކާރުން މިހާރު ފަށާފައިވާކަމަށާއި، އަންނަ ދައުރުގައި އެ މަސައްކަތް ފުޅާކޮށް، މަސްވެރިކަމުގެ ސިނާއަތަކީ ފަތުރުވެރިކަމާއި ދާދި އެއްވަރަކަށް ފުޅާކުރެވިފައިވާ ރާއްޖޭގެ އިޤްތިޞާދަށް މަންދާކުރާނެ ވަރުގެ ސިނާއަތަކަށް ހެދޭނެކަމުގެ ޔަގީންކަން އޮތްކަމަށް ރައީސް ޞާލިހު ވަނީ ވިދާޅުވެފަ އެވެ.

އަދި ރައްޔިތުން މިހާރުވެސް އެމަނިކުފާނަށް އިތުބަރުކުރައްވާ ގޮތަށް އިތުބާރު ކުރެއްވުމަށް ރައީސް ޞާލިހު ވަނީ އެދިވަޑައިގެންފަ އެވެ.