ރާއްޖެގައި އެންމެ ދިގު މުއްދަތަކަށް ވެރިކަން ކުރެއްވި ކުރީގެ ރައީސް މައުމޫނު އަބްދުލްގައްޔޫމުގެ ވެރިކަން ނިމުމަކަށް ގެނައިފަހުން 15 އަހަރު ވަންދެން ރާއްޖޭގެ ވެރިކަން ބޮޑު ދެ ޕާޓީއެއްގެ ދެމެދުގައި ބެހިއްޖެ ކަމަށާއި، އެކަމުން ރައްޔިތުންނަށް ލިބުނު މާ ބޮދު ކުރިއެރުމެއް ނެތްކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމްގެ އެޑްވައިޒަރު އަދި މި ސަރުކާރުގެ ފުރަތަމަ ޓުއަރިޒަމް މިނިސްޓަރު އަލީ ވަހީދު ބުނެފިއެވެ. 

އަލީ ވަހީދު މިފަދައިން ބުނެފައި ވަނީ މި އަހަރުގެ ރިޔާސީ އިންތިޚާބުގައި ޖުމްހޫރީ ޕާޓީގެ މެނިފެސްޓޯ އިފްތިތާހުކުރުމަށް ބޭއްވި ހަފްލާގައި ވާހަކަދައްކަމުން ނެވެ. 

އަލީ ވަހީދު ބުނީ މައުމޫނުގެ 30 އަހަރުގެ ވެރިކަން ނިމުމަކަށް ގެނައީ ރައްޔިތުން ދަބަލަކަށް ބޭނުންވެގެން ކަމަށެވެ. އެހެން ނަމަވެސް، އެއީ ގެނެވުނު ހެޔޮ ބަދަލެއްކަމާއި މެދު މިހާރު ސުވާލު އުފެދޭކަމަށް އޭނާ ބުނެފައިވެއެވެ. 

އެގޮތުން އެ ވެރިކަން ނިމުމަކަށް ގެނެސް މިވީ 15 އަހަރުގެ ތެރޭގައި އަދިވެސް ރައްޔިތުން ދައްކަމުންދަނީ އަސާސީ ޚިދުމަތްތައް ލިބެމުން ނުދާ ވާހަކަތައްކަން އަލީ ވަހީދު ފާހަގަކުރިއެވެ. ބޮޑު ދެ ޕާޓީގެ މެދުގައި ވެރިކަން ބަހާލައިގެން 15 އަހަރު ފާއިތުވެގެން ދިޔައިރު، ރައްޔިތުންނަށް ވީ ވައުދުތައް ނުފުއްދި ހުރުމުން، އެ ނޫން ވިސްނުންތައް ގެންގުޅެން ޖެހޭކަމަށް އެނާ ބުންޏެވެ. 

އެކަން ކަން ފާހަގަކުރައްވާ އަލީ ވަހީދު ބުނީ 15 އަހަރު ވީ އިރު ފުރުސަތު ނުލިބި އޮތީ ޖުމްހޫރީ ޕާޓީއަށް ކަމަށެވެ. 

އެހެން ނަމަވެސް ޖުމްހޫރީ ޕާޓީއަކީ ޤާބިލު މީހުން ތިބި ޕާޓީއެއް ކަމަށާއި، އެ ޕާޓީން މި އަހަރުގެ ރިޔާސީ އިންތިޚާބަށް ނެރެ މެނިފެސްޓޯއަކީ ވެސް ރައްޔިތުންގެ ވަރަށް ގިނަ މައްސަލަތައް ޙައްލުކުރާނެ ގޮތްތައް ހިމަނާފައިވާ މެނިފެސްޓޯއެއްކަމަށް އަލީ ވަހީދު ބުންޏެވެ. 

އޭނާ އިތުރަށް ބުނީ ސެޕްޓެމްބަރު މަހު 9 ވަނަ ދުވަހު، ރައްޔިތުން ގޮތެއް ނިންމާއިރު، ޖޭޕީހެ މެނިފެސްޓޯ ކިޔާ ދިރާސާކުރުން މުހިންމު ކަމަށެވެ. އަދި މާޒީގައި ކަންކަން ވެފައިވާ ގޮތާއި ދޭތެރޭގައި ވިސްނާ ފިކުރުކުރުން ވެސް މުހިންމު ކަމަށެވެ. 

ބޮޑު ދެ ޕާޓީގެ މެދުގައި ވެރިކަން ބަހައިގެން ރައްޔިތުންނަށް ވީ ފައިދާއެއް ނެތްއިރު، މިފަހަރު މީ ޖުމްހޫރީ ޕާޓީގެ ފަރަހަށް ހެއްދެވުމަށް އަލީ ވަހީދު ވަނީ އިލްތިމާސްކޮށްފައެވެ.