ބަލިހާލުކޮޅު ހުރިގޮތުން ހޮސްޕިޓަލަށް ވަޑައިގެން ފަރުވާ ހޯއްދަވަން ޖެހިވަޑައިގަންނަވާ ކަމަށާއި، އެހެން ނަމަވެސް އެކަން ނުކުރައްވާ ޖަލުގައި ހުންނަވަނީ ހޮސްޕިޓަލުގައި އެޑްމިޓުވެގެން ފަރުވާ ހޯއްދަވާ ނަމަ އާއިލާއިން ތަހަންމަލުކުރާނެ ހިތްދަތިކަން އިހުސާސްކުރެވޭތީ ކަމަށް ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމު ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި އާރަށު މައްސަލާގައި ރައީސް ޔާމީންގެ މައްޗަށް އިއްވި 11 އަހަރުގެ ޖަލު ހުކުމާއި އެ ހުކުމާ އެކު ކޮށްފައިވާ 5 މިލިއަން ޑޮލަރުގެ ޖޫރިމަނާ ފައިސާ ދެއްކުން ފަސްކޮށްދިނުމަށް އެދި އެމަނިކުފާނުގެ ފަރާތްޕުޅުން ހައިކޯޓަށް ހުށަހަޅާފައިވާ މައްސަލައިގެ އަޑުއެހުމުގައި ވާހަކަދައްކަވަމުން ނެވެ.

ހުކުމް ފަސްކުރުމުގެ އަމުރަކަށް އެދިވަޑައިގެން ސަބަބުތައް ހާމަކުރުމަށް ފުރުސަތެއް ހޯއްދަވާ ރައީސް ޔާމީން ވަނީ އެމަނިކުފާނުގެ ފަރާތްޕުޅުން އެފަދައިން އެދިވަޑައިގަންނަވާ ސަބަބުތަކަށް އަލިއަޅުވާލައްވާފަ އެވެ.

އެމަނިކުފާނު ވިދާޅުވީ އެމަނިކުފާނަކީ އުނަގަނޑުގެ އާލާސްކަންފުޅެއް ހުންނަ ފަރާތެއް ކަމަށެވެ. އެ އާލާސްކަންފުޅާއި ގުޅިގެން މޫދަށް ގޮސް ކުރަންޖެހޭ ކަސްރަތުތަކެއް ޤަވައިދުން ކުރުމަށް ޑޮކްޓަރު އިރުޝާދުދެއްވާފައި ވީ ނަމަވެސް މާފުށީގައި ބިން ހިއްކުމުގެ މަސައްކަތް ވެސް ފަށާފައި އޮތުމާއި ގުޅިގެން އެ ފުރުސަތު މިހާރު ލިބިވަޑައިނުގަންނަވާކަމަށް ރައީސް ޔާމީން ވިދާޅުވިއެވެ.

އެއާއެކު އެމަނިކުފާނު ވިދާޅުވީ މިހާރު އެމަނިކުފާނުގެ ސިއްޙީ ހާލުކޮޅު ހުރިގޮތުން ހަގީގަތުގައި ހޮސްޕިޓަލަށް ވަޑައިގެން ފަރުވާ ހޯއްދަވަން ޖެހިވަޑައިގަންނަވާ ކަމަށެވެ. އެހެން ނަމަވެސް އެކަން ނުކުރައްވަނީ، ހޮސްޕިޓަލުގައި އެޑްމިޓުކޮށްގެން ފަރުވާ ހޯއްދަވާނަމަ، އެމަނިކުފާނުގެ އާއިލާ ހިތްދަތިވާނެވަރު އިހުސާސްކުރެވޭތީ، އެ ހިތްދަތިކަން އާއިލާއަށް ނުދިނުމަށްކަމަށް ރައީސް ޔާމީން ވިދާޅުވި އެވެ.

އެކަން ފާހަގަކުރައްވާ ރައީސް ޔާމީން ވިދާޅުވީ އެމަނިކުފާނު މިހާރު ތަންފީޒު ކުރައްވަމުން ގެންދަވާ ހުކުމަކީ އެމަނިކުފާނު ކުށެއް ކުރައްވައިގެން ކޮށްފައިވާ ހުކުމެއް ނޫން ކަމުގެ ޔަގީންކަން ދެއްވާ ކަމަށެވެ. އަދި އެކަން ޝަރުއީ ކޯޓުގައި ސާބިތުކޮށްދެއްވާނެ ކަމަށެވެ. މީގެ ކުރިންވެސް އެމަނިކުފާނު ވާނީ އެމަނިކުފާނުގެ މައްޗަށް އިއްވި ހަމަ އެފަދަ ހުކުމަކީ ބާތިލް ހުކުމެއްކަން ކޯޓު މަރުހަލާއިން ސާބިތުކޮށްދެއްވައިކަމަށް ރައީސް ޔާމީން ވިދާޅުވި އެވެ.

އެކަންކަން ފާހަގަކުރައްވާ ރައީސް ޔާމީނު ވިދާޅުވީ އެމަނިކުފާނު ގޭ ބަންދަށް ބަދަލުކޮށްދިނުމަކުން ދައުލަތުން ވާނެ އެއްވެސް ގެއްލުމެއް ނޯންނާނެކަމަށް ވިދާޅުވެފަ އެވެ.

ދުނިޔޭގެ އެހެން ސަރަހައްދުތަކުގައި ވެސް ހާއްސަ ހާލަތްތަކާ ގުޅިގެން ޖަލު ބަންދުގައި ތިބޭ މީހުން ކަފާލާތުގެ ދަށުން ގޭބަންދަށް ދޫކުރާ ކަމަށާއި، ރާއްޖޭގައި ވެސް މީގެ ކުރިން އެ އުސޫލުގެ ދަށުން ގޭ ވަންދަށް މީހުން ބަދަލުކޮށްފައިވާކަމަށް ރައީސް ޔާމީން ވިދާޅުވި އެވެ.

އެހެން ނަމަވެސް މިހާރު އެއީ ގާނޫނުގައި ބަޔާންކޮށްފައި އެއްޗެއް ނޫންކަމަށް ބުނެ ކަފާލާތު ނުދޭކަން ރައީސް ޔާމިނުގެ ވާހަކަފުޅުގައި ފާހަގަކުރެއްވި އެވެ.

އެއާއެކު އެމަނިކުފާނު ވިދާޅުވީ ގާނޫނުގައި ވަކިގޮތަކަށް ކަމެއް ބަޔާންކޮށްފައި ނެތުމަކީ ފަރުދެއްގެ ހައްގަށް އުނިކަން ލިބެންޖެހޭނެ ކަމެއްކަމަށް ގަބޫލު ނުކުރައްވާ ކަމަށެވެ. އަދި އެފަދައިން އެކަން ކުރާނަމަ ފަރުދުންނަށް ލިބިގެންދާނީ އިޔާދަ ނުކުރެވޭނެ ގެއްލުންތަކެއް ކަމަށާއި، މީގެ ކުރިންވެސް އެމަނިކުފާނާއި ދޭތެރޭ އެފަދައިން ކަންކަން ވެފައިވާކަމަށް ރައީސް ޔާމީން ވިދާޅުވި އެވެ.

ގޭ ބަންދަށް ބަދަލުކުރި ނަމަވެސް އިސްތިއުނާފު މަރުހަލާ ނިމި ހުކުމް ތަންފީޒު ކުރަން ޖެހިއްޖެ ނަމަ، އެކަން ކުރުމަށް ދައުލަތަށް އެއްވެސް އުނދަގުލެއް ނުވާނެ ކަމަށާއި، ގެއަށް ބަދަލުކޮށްދީފިނަމަ ސިއްހީ ހާލުކޮޅި ހުރިގޮތުން އެމަނިކުފާނަށް ފަސޭހަފުޅުވެ އާއިލާއަށް ވެސް ތަސައްލީއެއް ލިބިގެންދާނެކަމަށް ރައީސް ޔާމީން ވިދާޅުވި އެވެ. 

މި މައްސަލައިގައި ފަނޑިޔާރުން ގޮތެއް ނިންމަވާއިރު އެކަމަށް ވަރަށް ބޮޑަށް ރިއާޔަތްކޮށްދެއްވުމަށް ރައީސް ޔާމީން ވަނީ ވަރަށް އަސަރާއި އެކު ފަނޑިޔާރުންގެ އަރިހުން އެދިވަޑައިގެންފަ އެވެ.