ވެރިކަމަށް ކުރިމަތިލުމުގެ ފުރުސަތު ވެސް ޕީޕީއެމުން ނުދެއްވިކަމަށް އެޕާޓީގެ މުސްތަޝާރެއްގެ ގޮތުގައި ހުންނެވުމަށް ފަހު ޕާޓީން ވަކިވެވަޑައިގެން ޖުމްހޫރީ ޕާޓީއާއި ގުޅިވަޑައިގެން ކުރީގެ ރައީސް ޑރ މުޙައްމަދު ވަޙީދު ހަސަންމަނިކު ވިދާޅުވެއްޖެ އެވެ.
ޑރ ވަހީދު މިފަދައިން ވިދާޅުވެފައި ވަނީ މާމިގިލީގައި ބޭއްވި ޖުމްހޫރީ ޕާޓިގެ ރިޔާސީ ކެންޑިޑޭޓު ޤާސިމް އިބްރާހިމްގެ ކެމްޕޭނު ޖަލްސާގައި ވާހަކަދައްކަވަމުން ނެވެ.
ފާއިތުވި ހަފްތާ ސިޔާސީ މައިދާނުގައި ހިނގައިދިޔަ ކަންކަންތަކާއި އެކަންކަމާއި ގުޅިގެން ސިޔާސީ ގޮތުން އެމަނިކުފާނު ނިންމެވި ނިންމުންތަކަށް ޑރ ވަހީދުގެ ވާހަކައިގައި އަލިއަޅުވާލެއްވި އެވެ.
އެގޮތުން ޑރ ވަހީދު ވިދާޅުވީ ރާއްޖެގައި އޮތް އެންމެ ބޮޑު އެއް ޕާޓީގައި ހުންނެވުމަށްފަހު ވަކިވީ ޕާޓީ ޑިމޮކްރަސީގެ އުސޫލުތަކާއި ދުރަށް ގޮސްފައިވާ މިންވަރުން ކަމަށެވެ.
ސިޔާސީ ޕާޓީތަކުން ހިންގާނެ އެންމެ މުހިންމު ހަރަކާތަކީ އިންތިޚާބުތަކުގައި ވާދަކުރުން ކަމަށް ވާއިރު، ރިޔާސީ އިންތިޚާބުގައި ޕީޕީއެމުން ވާދަކުރުމުގެ ފުރުސަތު ވެސް ދީފައި ނުވާކަމަށް ޑރ ވަހީދު ވިދާޅުވިއެވެ.
"އަޅުގަނޑު ނުދަންނަވާނަން މަގުމަތިވީ އެކޭ، އެކަމަކު ދަންނަވަން އޮތީ އަޅުގަނޑު އޭރު ހުރި ޕާޓީގައި (ޕީޕީއެމް) ބޮޑު ޕާޓީއެއް، އެ ޕާޓީގެ އެތެރޭގެ ޑިމޮކްރަސީ ނެތުމުގެ ސަބަބުން އެއްވެސް މީހަކަށް އެ ޕާޓީން ރިޔާސީ އިންތިޚާބުގައި ނިކުތުމުގެ ފުރުސަތެއް ނުލިބުނު. ނުދިން، އޭގެ ސަބަބުން މިއަހަރުގެ ރިޔާސީ އިންތިޚާބުގައި ޕީޕީއެމްގެ ކެންޑިޑޭޓެއް އިންތިޚާބުގެ ބެލެޓް ކަރުދާހުގައެއް ނެތް. ޕީޕީއެމްގެ ކުލައެއްވެސް ނިޝާނެއް ވެސް ނެތް"
ކުރީގެ ރައީސް ޑރ މުޙައްމަދު ވަހީދު
އެކަންކަން ފާހަގަކުރައްވާ ޑރ ވަހީދު ވަނީ ޕީޕީއެމުން ރިޔާސީ އިންތިޚާބުގައި ވާދަނުކުރުމުގެ ސަބަބުން ޕީޕީއެމްގެ އާންމު މެމްބަރުންގެ ހައްގު އުނިވެފައިވާކަން ފާހަގަކުރައްވާފަ އެވެ. ޑރ ވަހީދު ވިދާޅުވީ އެމަނިކުފާނު މަގުމަތިވި ކަމުގައި ވާނަމަ، ޕީޕީއެމްގެ 40000 މެމްބަރުން ވެސް ތިބީ މަގުމަތިވެފައި ކަމަށެވެ.
އެއާއެކު ޑރ ވަހީދު ވަނީ ޤާސިމް އިބްރާހިމަށް ޕީޕީއެމްގެ މެމްބަރުން ވޯޓުދިނުމަށް ގޮވާލައްވާފަ އެވެ. އެމަނިކުފާނު ވިދާޅުވީ މީ ވަކި ބެފުޅަކާއި ދެތެރޭގައި ވިސްނަވަންވީ ވަގުތު ނޫން ކަމަށެވެ. އަދި މީ ގައުމަށް ދިމާވެފައިވާ މައްސަލަތައް ޙައްލުކުރެވޭ ެބޭފުޅަކު އިޚްތިޔާރުކުރަންވީ ވަގުތުކަން ވެސް ޑރ ވަހީދު ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
