މި ސަރުކާރުން ވަޒީފާދިން އެއްވެސް އާންމު ރައްޔިތަކު ވަޒީފާއިން ވަކިނުކުރާނެ ކަމުގެ ޔަގީންކަން ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ދެއްވައިފި އެވެ.
ޑރ މުއިއްޒު ތިލަދުންމައްޗަށް ކުރައްވާ ކެމްޕޭނު ދަތުރުފުޅުގައި، ހއ ދިއްދޫއަށް ވަޑައިގެން އެ ރަށުގައި ބޭއްވި ކެމްޕޭނު ޖަލްސާއެއްގައި ވާހަކަދައްކަވަމުން ވިދާޅުވީ، ޕީޕީއެމް-ޕީއެންސީ ކޯލިޝަންގެ ވެރިކަމެއްގައި އެއްވެސް ރައްޔިތަކު ވަޒީފާއިން ވަކި ނުކުރާނެކަމުގެ ފުރިހަމަ ޔަގީންކަން ދެއްވާ ކަމަށެވެ.
މި ސަރުކާރުން އެކި އިންތިޚާބުތަކާއި ދިމާކޮށް ކުންފުނިތަކަށް ބޭނުންވާ ވަރަށް ވުރެ އިތުރަށް ވަޒީފާތަކަށް މީހުންނަގާކަން ފާހަގަކުރައްވާ ޑރ މުއިއްޒު ވިދާޅުވީ، އެކަން ސަރުކާރުން ކުރަމުންދަނީ އެ ކުންފުނިތަކަށް މާލީ ބުރަކަން ލިބިގެންދާނެ ގޮތަށް ކަމަށެވެ. އަދި ކުންފުނިތަކަށް ބޮޑެތި ގެއްލުންތަކެއް ލިބުނަސް އެކަން "ވަރިހަމަކޮށްލައިގެން" ކަމަށެވެ.
އެހެން ނަމަވެސް އެއްވެސް މީހަކު މިހާރު ހުރި ވަޒީފާއިން ވަކިނުކުރައްވާނެކަމަށް ޑރ މުއިއްޒު ވިދާޅުވި އެވެ. އެއާއެކު އެމަނިކުފާނު ވިދާޅުވީ، ބޭނުންނުވާ މިންވަރަށް ވަޒީފާތަކަށް ނަގާފައިވާ ކުންފުނިތަކުން މީހުން އެހެން ދިމަ ދިމާލަށް ބަދަލުކުރަން ޖެހިދާނެ ކަމަށެވެ.
އެކަން ކުރައްވާއިރު، ރަށެއްގައި ވަޒީފާއަދާކުރާ މީހަކު ނަމަ، ވަޒީފާ އަދާކުރާ ތަން ބަދަލުވި ނަމަވެސް ރަށުގައި ހުރެގެން އަދި ހުރި ވަޒީފާއިން ލިބޭ މުސާރައިގައި މަސައްކަތް ކުރެވޭނެ އިންތިޒާމުތއް ހަމަޖައްސަވާދެއްވާނެ ކަމަށް ޑރ މުއިއްޒު ވިދާޅުވި އެވެ.
"އަޅުގަނޑު ދޭން ބޭނުންވާ ޔަގީން ކަމަކީ އެއްވެސް މީހަކަށް އެއްވެސް ރައްޔިތަކަށް ލިބޭ ފުރުސަތަކުން އަޅުގަނޑުމެންގެ ސަރުކާރަކުން މަހުރޫމެއް ނުކުރާނަމޭ. ވަޒީފާގެ ޔަގީންކަން އަޅުގަނޑުދެން. އިރާދަކުރެއްވިއްޔާ އެއްވެސް މީހަކު ބާކީނުވާނެ، ވަޒީފާއަކުން ވަތްކެއް ނުކުރާނަން"
ޑރ މުޙައްމަދު މުއިއްޒު
އެކަން ފާހަގަކުރައްވާ ޑރ މުއިއްޒު ވިދާޅުވީ ސަރުކާރުގެ ކުންފުނިތަކުން ގިނަ އަދަދެއްގެ ވަޒީފާތައް ރައްޔިތުންނަށް ދިން ނަމަވެސް މިއަދު ތިވީ އެ ވަޒީފާތަކުގެ ބިރުދައްކައި ރައްޔިތުން ފިއްތާލާފައި ކަމަށެވެ.
އެހެން ނަމަވެސް އެއްވެސް މީހަކު ވަޒީފާއިން ވަކި ނުކުރައްވާނެ ކަމަށާއި، އަދި މުސާރަ ވެސް ކުޑަ ނުކުރައްވާނެކަމުގެ ޔަގީންކަން ދެއްވާކަމަށް ޑރ މުއިއްޒު ވިދާޅުވި އެވެ. އަދި އެމަނިކުފާނު ވަނީ ވަޒީފާގެ ބިރުވެރިކަން އެއްވެސް ރައްޔިތަކު ހިތުގައި ނުބާއްވާ މިނިވަންކަމާއި އެކު ވޯޓު ލެއްވުމަށް އިލްތިމާސްކުރައްވާފަ އެވެ.
"ދަންނަވާލަން އޮތީ ވަޒީފާގެ ބިރު ނުގަންނަވާށޭ! އެ ބިރު ހިތުގައި އޮތަ ނުދެއްވާށޭ! ވަޒީފާއަކުން މީހަކު ވަތްކެއް ނުކުރާނަމޭ!"
ޑރ މުޙައްމަދު މުއިއްޒު
Advertisement
This content is created and paid for by advertisers and does not involve Voice Journalists
