އިދިކޮޅު އިއްތިހާދުގެ ރިޔާސީ ކެންޑިޑޭޓު ޑރ.މުޙައްމަދު މުޢިއްޒު، ބޮޑުތިލަދުންމަތީގެ ބައެއް ރަށްތަކަށް ކުރެއްވި ދަތުރުފުޅުގެ ތެރެއިން، ވަޑައިނުގަންނަވާ ދެ ރަށެއްގައި ދެއްކެވި ވާހަކަފުޅުތަކެއްކަމަށް ބުނެ ދޮގު ވާހަކަތަކެއް ރައީސް އިބްރާހީމް މުޙައްމަދު ޞާލިޙުގެ ކެންޕެއިން ތަރުޖަމާނު ޑިފެންސް މިނިސްޓަރު މާރިޔާ އަޙްމަދު ދީދީ ހައްދަވައިފިއެވެ.
ރައީސް ޞާލިހު ގެ ކެންޕެއިން މެނޭޖަރުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މާރިޔާ ވަނީ މުޢިއްޒުއަށާ، މުޢިއްޒު ވެވަޑައިގަންނަވަމުންދާ ވަޢުދުފުޅުތަކަށް ވަރަށް ބޮޑަށް ފާޑުވިދާޅުވެފައެވެ.
އެގޮތުން، ފާޑުވިދާޅުވަމުން ގޮސް، ޑރ.މުޢިއްޒު ހއ.މޮޅަދޫއަށް ވަޑައިގެންނެވިކަމަށާއި، އެ ރަށަށް ފާބާވަޑައިގަތީ ރައީސް ޞާލިހު އަޅުއްވާފައިވާ ބަނދަރަކުން ކަމަށް މާރިޔާ ވިދާޅުވިއެވެ. އަދި އެ ރަށަށް ވަޑައިގެން އެ ރަށުގައި ބަނދަރެއް އަޅުއްވަން ޑރ.މުޢިއްޒު ވައުދުވެވަޑައިގެންފައިވާކަމަށާ ނަމަވެސް އެ ރަށުގައި މި ސަރުކާރުން ބަނދަރު އަޅާފައިވާކަމަށް އޭނާ ވިދާޅުވިއެވެ.
މާރިޔާ މިފަދައިން ވިދާޅުވެފައިވާއިރު ޑރ.މުޢިއްޒުގެ ދަތުރުފުޅުގައި އެރަށަށް ވަޑައިގެންފައި ނުވެއެވެ.
އެއަށްފަހު މުޢިއްޒުގެ ކެންޕެއިންގެ ތެރެއިން ދައްކަވާ ވާހަކަފުޅުތަކަށް އިތުރަށް ފާޑުވިދާޅުވަމުން މާރިޔާ ވިދާޅުވީ މުޢިއްޒު މާރެންދޫއަށް އަރާވަޑައިގެން އެ ރަށުގައި ފުޓުބޯޅަދަނޑު އަޅުއްވާނެކަމަށާއި މަލްޓި-ޕާޕަސް ހޯލެއް ބިނާކުރައްވާނެކަމަށް ވިދާޅުވި ކަމަށެވެ. ނަމަވެސް އެ ރަށަށްވެސް މުޢިއްޒު ވަޑައިގެންފައި ނުވެއެވެ.
މުޢިއްޒުގެ ކެންޕެއިންގެ ތެރެއިން ރާއްޖޭގެ ހުރިހާ ރަށަކަށް ވަޑައި ނުގެންނެވޭނެކަން އޭނާ އަންނަނީ ވަޑައިގަންނަވަމުންދާ ރަށްތަކުގައި ވިދާޅުވަމުންނެވެ. އެފަދައިން ކަން ދިމާވީ، ވަގުތު ވަރަށް ބޮޑަށް ކުޑަތަން ވެފައިވާތީ ކަމަށް ވެސް މުޢިއްޒު ވިދާޅުވިއެވެ.
އެހެންކަމުން، ވަޑައިނުގަންނަވާ ރަށްރަށުގައި ދެއްކެވި ވާހަކަ ކަމަށް ވިދާޅުވެ މާރިޔާ ހެއްދެވި އިތުރުފުޅުތަކަށް ގިނަ ބައެއްގެ ފާޑުކިޔުންތައް އަންނަނީ އަމާޒުވަމުންނެވެ.
Advertisement
This content is created and paid for by advertisers and does not involve Voice Journalists
