އަމިއްލަ ގޮތުން ކައުންސިލްގެ މެންބަރު ކަމަށް އިންތިހާބުވެވަޑައިގެންނެވި އއ. ބޮޑުފުޅަދޫ ކައުންސިލްގެ ރައީސް, ޝުޖާއު އާދަމް, އެމްޑީޕީއަށް ސޮއި ކުރައްވައިފިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރިޔާސީ ކެންޕެއިނަށް އއ.ގެ އަތޮޅުގެ ރަށްތަކަށް ކުރައްވަމުންދާ ދަތުރުފުޅުގެ ތެރެއިން ބޮޑުފުޅަދޫއަށް ވަޑަިއގަތުމުން ޝުޖާއު އާއި އެރަށުގެ ކައުންސިލުގެ އެހެން މެންބަރަކު ވެސް ވަނީ އެމްޑީޕީއަށް ސޮއި ކުރައްވައި އެމަނިކުފާނާއި ފޯމު ހަވާލު ކުރައްވާފައެވެ.
އެގޮތުން ދެން އެމްޑީޕީއަށް ސޮއިކުރެއްވީ ޕީޕީއެމްގެ ޓިކެޓުގައި ކައުންސިލް ގޮނޑިއަށް އިންތިހާބުވެވަޑައިގެންނެވި މުހައްމަދު ނާޝިދުއެވެ. އެއާއެކު ބޮޑުފޮޅުދޫ ކައުންސިލްގެ އަގުލަބިއްޔަތު އެމްޑީޕީއަށް ވަނީ ލިބިފަ އެވެ. އެގޮތުން މިހާރު އެ ކައުންސިލުގައި ތިބި މެންބަރުންގެ ތެރެއިން އެމްޑީޕީ މެންބަރުންގެ އަދަދު ވަނީ ތިނަކަށް ވެފައެވެ. ދެން ކައުންސިލްގައި ތިއްބަވާ ދެ މެމްބަރުންނަކީ މިނިވަން ދެ ކައުންސިލަރުންނެވެ.
ރައީސް މިއަދު ބޮޑުފުޅަދޫއަށް ވަޑައިގަތުމުން, އެރަށުން އަލަށް އެމްޑީޕީއަށް ސޮއި ކުރެއްވި 63 މެމްބަރުންގެ ފޯމު ވެސް ވަނީ އެމަނިކުފާނަށް އަރުވާފައެވެ.
ރައީސް ޞާލިހު ގެ ކެންޕެއިން ދަތުރުގެ ތެރެއިން އެމްޑީޕީއަށް މެންބަރުން އިތުރު ކުރުމުގެ މަސައްކަތް ވެސް އެޕާޓީ އިން އަންނަނީ ވަރަށް ބޮޑަށް ކުރަމުންނެވެ.
Advertisement
This content is created and paid for by advertisers and does not involve Voice Journalists
