ސެޕްޓެމްބަރު 9 ވަނަ ދުވަހު އޮންނަ ރިޔާސީ އިންތިހާބު ކާމިޔާބު ކުރައްވައި ވެރިކަމަށް އިންތިހާބުވެ ވަޑައިގެންފި ނަމަ އއ. އުކުޅަސް ކައިރީ ސީޕްލޭން ޕްލެޓްފޯމް އެއް އަޅައި، އެރަށުގައި ފުލެޓް އަޅުއްވައި ދެއްވާނެ ކަމަށް އެމްޑީޕީީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

ރިޔާސީ ކެންޕެއިނަށް ރައީސް ޞާލިހު އއ އަތޮޅަށް ކުރެއްވި ދަތުރުފުޅުގައި، އެ އަތޮޅު އުކުޅަހަށް ވަޑައިގެން ރޭ ބޭއްވި ޖަލްސާގައި ވާހަކަ ދައްކަވަމުން އެމަނިކުފާނު ވަނީ ކުރިއަށް އޮތް ދައުރަށް އިންތިހާބުވެ ވަޑައިގެންފި ނަމަ އެ ރަށަށް ކޮށްދެއްވާނެ ކަންކަން ހާމަކޮށްދެއްވާފައެވެ.

ރައީސް ޞާލިހު ވިދާޅުވީ، އުކުޅަހު ރައްޔިތުން އެންމެ ބޭނުންވި އެއް ކަމަކީ އެ ރަށު މަގު ހަދައި ބިން ހިއްކުން ކަމަށާ، އެކަން ބާރު ސްޕީޑްގައި މިހާރު ކުރިއަށްދާ ކަމަށެވެ. އަދި ކުރިއަށް އަޮތް ދައުރަށް އިންތިހާބުވެ ވަޑައިގެންފި ނަމަ އެ ރަށު ރައްޔިތުންނަށް އެންމެ މުހިންމު ކަން ކަމުގައިވާ ބޯހިޔާވަހިކަމުގެ މައްސަލަ ހައްލުކޮށްދިނުމަށް ފުލެޓް އަޅައިދެއްވާނެ ކަމަށް ރައީސް ޞާލިހު ވިދާޅުވި އެވެ. 

މީގެ އިތުރުން އުކުޅަހަށް ރައީސް ޞާލިހު ކޮށްދެއްވާނެ ކަމަށް ވަޢުދުވެވަޑައިގެންނެވި ކަންކަމުގެ ތެރޭގައި؛

• މިހާރު ހަދަމުންދާ މަގުތަކުގެ އިތުރަށް ރަށުގެ ބާކީ ހުރި މަގުތައް ހަދައި ނިންމުން

• ކައުންސިލްގެ އައު އޮފީހާއި އެކު އޮފީސް ކޮމްޕްލެކްސް އެއް އެޅުން. 

• ބޮޑު މިސްކިތެއް އެޅުން

• ރައްޔިތުން އެދިފައިވާ ގޮތަށް އުކުޅަހު ކައިރީ ސީޕްލޭން ޕްލެޓްފޯމް އެއް އެޅުން

• ގަލަގިލި ފަޅު ހިއްކައި ޕިކްނިކް އައިލެންޑެއް ތަރައްޤީ ކުރުން

• އުކުޅަސް ހިމެނޭ ސަރަހައްދުގައި ރަނގަޅު ހޮސްޕިޓަލެއް އަޅައިދިނުން

ރައީސް ޞާލިހު ވިދާޅުވީ، އުކުޅަހުގެ ރައްޔިތުން މި އަހަރުގެ ރިޔާސީ އިންތިހާބުގައި ނިންމާނެ ނިންމުންވެސް ވަރަށް ސާފު ކަމަށެވެ. އެގޮތުން، 2018 ވަނަ އަހަރެކޭ އެއްފަދައިން އެރަށުންވެސް އެމްޑީޕީއަށް ބޮޑު އަގުލަބިއްޔަތެއް ލިބޭނެ ކަމަށް ޔަގީން ކުރައްވާ ކަމަށް ރައީސް ޞާލިހު ވިދާޅުވި އެވެ.