ރައީސް ޢަބްދުﷲ ޔާމިން ޢަބްދުޤައްޔޫމަށް ރިޔާސީ އިންތިޚާބުގައި ވާދަނުކުރެވޭ ޙާލަތެއް އަތުވެއްޖެނަމަ ޕީޕީއެމްގެ ރިޔާސީ ޓިކެޓް ލިބިލައްވާނެކަމަށް އުންމީދު ކުރެއްވެވި ކަމަށް ރާއްޖޭގެ ކުރީގެ ރައީސް ޑރ މުޙައްމަދު ވަޙީދު ޙަސަން މަނިކު ވިދާޅުވެއްޖެއެވެ.

ޑރ ވަޙީދު މިހެން ވިދާޅުވީ ޖޭޕީގެ ކެމްޕޭނަށް ޖޭޕީގެ ރިޔާސީ ކެންޑިޑޭޓް ޤާސިމް އިބްރާހިމް ކުރައްވަމުން ގެންދަވާ ކެމްޕޭނު ދަތުރުފުޅުގައި ކުޅުދުއްފުށީގައި ބޭއްވުނު ޖަލްސާގައި ވާހަކަފުޅު ދައްކަވަމުންނެވެ.

"އަޅުގަނޑު ހީކޮށްގެން ހުރީ އަޅުގަނޑަށް އެފުރުސަތު ލިބިދާނެކަމަށް، ރައީސް ޔާމިނަށް ކުރިމަތިނުލެއްވޭ ހިނދެއްގަ، ޕާޓީތެރޭގަ އޮތީ ތިން އޮޕްޝަނެއް ކަނޑައަޅާފަ، ފުރަތަމަ އޮޕްޝަންއަކީ ޕްލޭން އޭ، އެއީ ރައީސް ޔާމިން މިނިވަންވެޑައިގެން ނިކުމެވަޑައިގަތުން، ދެން އޮތީ ޕްލޭން ބީ ޕްލޭން ބީގައި އޮތީ ނުކުމެވަޑައިނުގަނެވޭ ހިނދެއްގައި ޕީޕީއެމުން އެހެން ކެންޑިޑޭޓަކު ނެރުން، ދެން އަޅުގަނޑު ހުރީ އެއުންމީދުގަ، ދެންއޮތީ ޕްލޭން ސީ، ޕްލޭން ސީގަ އޮތީ ޕްލޭން ބީ މަސައްކަތް ނުކޮށްފިއްޔާ ޕީއެންސީގެ ކެންޑިޑޭޓަކު ނެރެން، ވަގުތު ލިބުނު، ރައީސް ޔާމިން އެންގެވި ގޮތަކަށް ނޫން ކަންތައް ހިނގައިގެންދިޔައީ" ޑރ ވަޙީދު ވިދާޅުވިއެވެ.

Advertisement

ޑރ ވަޙީދު ވިދާޅުވީ ރައީސް ޔާމިން އެންގެވީ ދެން އެމަނިކުފާނަށް ނުކުމެވަޑައި ނުގަނެވޭނެ ކަމަށާއި، ބޮއިކޮޓް ކުރަން ގަސްތު ނުކުރައްވާ ކަމަށެވެ. އަދި ޕީޕީއެމްގެ ކެންޑިޑޭޓަކު ނެރުމަށާއި، ނުނެރެވިއްޖެނަމަ ޕީއެންސީގެ ކެންޑިޑޭޓަށް ތާއީދުކުރައްވަން ހުންނެވި ކަމަށް ރައީސް ޔާމިން ވިދާޅުވިކަމަށް ރޭ ޑރ ވަޙީދު ވިދާޅުވިއެވެ.

ޑރ ވަޙީދު އިތުރަށް ވިދާޅުވީ 10 އަހަރު ވަންދެން ޕީޕީއެމްގައި ހުންނެވުމުންވެސް އެއްވެސް އިޚްތިރާމެއް އެއްވެސް ބަލާލުމެއް ނެތި ކަންކަން އެ ގޮތަށް ދިޔައިމަ، އެޕާޓީގައި ހުންނަވަން ނުޖެހޭނެކަމަށެވެ.

ރައީސް ވަޙީދަކީ 2008 ވަނަ އަހަރު ރައީސް މުޙައްމަދު ނަޝީދުއާއި އެކު ރަނިންގމޭޓޭއްގެ ގޮތުން ވާދަކުރައްވައިގެން ރައީސް ނަޝީދު އާއި އެކު ރާއްޖޭގެ ނައިބު ރައީސް ކަން ކުރެއްވެވި ބޭފުޅެކެވެ. އެއަށް ފަހު 2012 ވަނަ އަހަރު ރައީސް ނަޝީދު ވެރިކަމުން އިސްތިއުފާ ދެއްވުމުން އެދައުރުގެ ނިމުމާއި ހަމައަށް ރާއްޖޭގެ ވެރިއަކަށް ހުންނެވީ ޑރ ވަޙީދެވެ.