ދިވެހިރާއްޖޭގައި ވެރިކަން ކުރި 100 ވެރިންނަށް ވުރެ ގިނައިން މި ވެރިކަމުގައި ދަރަނި ނަގައިފި ކަމަށާއި އަދި 100 ވެރިން ނުކުރާހާ ހަރަދު މި ވެރިކަމުގައިކޮށްފި ކަމުގައި ރައްޔިތުން މަޖިލީހުގެ އުނގޫފާރު ދާއިރާގެ މެންބަރު މުޙައްމަދު ވަޙީދު (ވައްޑެ) ވިދާޅުވެއްޖެއެވެ.
ވައްޑެ މިފަދައިން ވިދާޅުވީ، އެމަނިކުފާނަކީ ރާއްޖޭގެ 101 ވަނަ ވެރިމީހާ ކަމަށާއީ ނަމަވެސް އެމަނިކުފާނު ފިޔަވައި އެހެން އެއްވެސް ވެރިއަކަށް ފުޅަދޫ ފަދަ ކުދި ރަށްރަށް ފެނިފައިނުވާ ކަމަށް ރިޔާސީ އިންތިހާބުގެ ކެމްޕެއިންގައި ބ އަތޮޅު ފުޅަދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ރައީސް ޞާލިޙް ދެއްކެވި ވާހަކަފުޅަށް ރައްދު ދެއްވައި ކުރެއްވި ޓުވީޓެއްގައެވެ.
"އެކަމަކު ކަމަކަށްވާވަރުގެ ކަމެއް ނުކުރެވުނު" މި ސަރުކާރުގެ މަޝްރޫއުތަކަށް އިޝާރާތް ކުރައްވައި ވައްޑެ ވިދާޅުވިއެވެ.
ވައްޑެގެ ޓުވީޓުގައި އިތުރަށް ވަނީ ލިޔެފައި ދިނުމުން ކިޔޭ ނުކިޔޭ އެއްޗެއް ނޭނގި، ކިޔޭ އެއްޗެއް މޭރުން ނުވުމުން އެއީ ބޮޑުތަކުރުފާނާއި ދޮންބަންޑާރައިންނަށްވެސް ކުރެވޭ މަލާމާތެއް ކަމުގައެވެ.
ސަރުކާރަށް މީގެ ކުރިން ތާއީދު ކުރެއްވި ވައްޑެ ފާހަގަކުރެވެނީ އެމްޑީޕީއާއި ރައީސް ޞާލިޙްގެ ސަރުކާރަށް ވަރަށް ބޮޑަށް ފާޑުވިދާޅުވާ ބޭފުޅެއްގެ ގޮތުގައެވެ.
Advertisement
This content is created and paid for by advertisers and does not involve Voice Journalists
