ރައީސް އިބްރާހިމް މުހައްމަދު ސާލިޙްގެ ސަރުކާރުން އިންޑިއާ މެދުވެރިވެރިކޮށް ނަގަމުންދާ ދަރަނިތަކާއި ގުޅިގެން ރައީސް ނަޝީދުވެސް ހުންނެވީ ހަނުކަމަށާއި އެ ވާހަކަތައް ދައްކަވަން އެމަނިކުފާނަށް ކެރިވަޑައިނުގަންނަވާކަމަށް ކުރީގެ ޓުއަރިޒަމް މިނިސްޓަރު އަދި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމްގެ އިންތިހާބީ މަންދޫބު އަލީ ވަހީދު ވިދާޅުވެއްޖެއެވެ.

ށ ނާވައިދޫގައި މިއަދު ކުރިއަށް ގެންދިޔަ ގާސިމް އިބްރާހިމްގެ ރިޔާސީ ކެމްޕެއިން ހަރަކާތުގައި ވާހަކަދައްކަވަމުން އަލީ ވަހީދު ވިދާޅުވީ، ރައީސް ޔާމީންގެ ވެރިކަމުގައި ރައީސް ނަޝީދުވަނީ ޗައިނާއިން ރާއްޖެ ދަރަނީގެ ދަންތުރައެއްގައި ޖައްސަމުންދާކަމުގެ ވާހަކަތައް ދައްކައި އެކަމާއި ދެކޮޅަށް އަޑު އުފުލާފައިކަމަށާއި އަދި ޗައިނާގެ ފަތުރުވެރިން ދިވެހިރާއްޖެއަށް ނާންނަ ވަރަށް އެ ވާހަކަތައް ވަނީ ދައްކަވައިފަކަމަށެވެ.

މީގެ އިތުރުން އަލީ ވަހީދު ވިދާޅުވީ، އެ ވާހަކަތައް ދައްކަވަން ނަޝީދަށް ކެރިވަޑައިނުގަންނަވާ ކަމަށާއި އިންޑިއާގެ ނަންވެސް ކިޔަން ކެރިވަޑައިނުގަންނަވާ އޭނާ ފާހަގަކުރެއްވިއެވެ.

ހަމައެއާއެކު އަލީ ވިދާޅުވީ، ދިވެހި ރައްޔިތުން އެކަމާއިމެދު ވިސްނަވަން ޖެހޭކަމަށެވެ. އޭނާ ވިދާޅުވީ، ޒުވާން ޖީލުތަކަށް މިސާލު ދައްކަން ޖެހޭ ވެރިކަން އެކަންކަން ނުފެންނަކަމަށް ހެދުމުން ސުވާލު އުފެދިގެންދާކަމަށެވެ.

އޭނާ ވިދާޅުވީ، ކުރީގެ ރައީސ ޔާމީން އަބްދުލް ގައްޔޫމްގެ ވެރިކަމުގައި ބުރިޖުވެސް އަޅާ ނިންމެވިކަމަށެވެ. އޭނާ ވިދާޅުވީ، އެ ދައުރުގައި ހުޅުމާލޭގެ ދެވަނަ ފިޔަވަހި ހިއްކައި އިމާރާތްތައްވެސް އަޅާފައިވާކަމަށާއި ދަރަނިވެސް ނެންގެވިކަމަށް އޭނާ ވިދާޅުވިއެވެ. އަލީ ވިދާޅުވީ، އޭރު އެ ވާހަކަތައް ދެއްކެވީ އެކަމަކީ ނުރައްކާތެރިކަމެއް ގޮތުގައި ދެކިގެންކަމަށެވެ.

އެހެންނަމަވެސް ރައީސް ސާލިހުގެ ވެރިކަމުގައި ރައީސް ޔާމީން ނެންގެވި އަދަދަށްވުރެ ބޮޑު އަދަދެއް އެހެންކަމަކުން ދަރަންޏަށް ނަގާއިރު، އެ ގައުމުގެ ނަން ބުނަން ނުކެރޭ ހިސާބަށް ދިއުމުން އެކަމާއި ސުވާލު ކުރަންޖެހޭކަމަށްވެސް އޭނާ ވިދާޅުވިއެވެ. އަލީ ވަހީދު ވިދާޅުވީ، މި ޒަމާނުގައި ގައުމެއް ހިފުމުށް އަމަލުކުރަމުންދަނީ ކުރިން ކުރާ އުސޫލުން ބަޑި ފަދަ ހަތިޔާރު ބޭނުންކޮށްގެން ނޫންކަމަށެވެ. އޭނާ ވިދާޅުވީ، މިއަދު އަންނާނެ ބަޔަކު ތިބީ އަންނާނެ ގޮތަކަށް ހާޒިރުވެކަމަށެވެ.

ރިޔާސީ އިންތިހާބުގެ ކެމްޕެއިންގައި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމާއި ކެމްޕެއިން ޓީމުން އަތޮޅު ތެރޭގެ ރަށްތަކަށް ވަޑައިގެން ކެމްޕެއިންގެ ހަރަކާތްތައް ކުރިއަށް ގެންދަވާއިރު މިހާރުގެ ސަރުކާރަށް ވަރަށް ބޮޑަށް ފާޑު ވިދާޅުވަމުން އަންނަކަން ފާހަގަކޮށްލެވެއެވެ.